HĐ bhap bini tỉnh Bình Dương mbang X birau peih mbang nyaom ka 15 brei tapa ho so brei Quy hoach tinh Binh Duong vaktu 2021-2030, pamong tal thun 2050. Tui Quy hoach, bruk patagok tal thun 2030, Bình Dương  gam haong dom tỉnh, ban dalam bhum ĐNB jeng bhum patagok khang di taneh ia, jhul pakhang saong pambak praong bruk cak rok patagok  gam haong dom taneh ia dalam bhum, sa dalam dom pasak cak rok patagok sami samar, taong abih gah; pasak kong nghiep jit vu birau…Pamong tal thun 2050, Bình Dương  hu jeng bhum đô thị, kong nghiep, jit vu birau, sumu bhum taneh saong dunya, lac sa dalam dom labik jhul khang bruk ngak kinh te dunya.

Danak dak halan hatian bilan hè hijao thun 2024 di tỉnh Đồng Tháp hu peih tabiak meng ini tal abih bilan 8, tui kuhria hu labaih 3.500 urang đoan dam dara hu mbaok tame. Tui panuac khan di sa-ai Huỳnh Minh Thức, Bí thư tỉnh Đoàn Đồng Tháp, danak dak dam dara halan hatian Hè hu peih ngak di taong abih dom puk palei dalam tỉnh. Dalam nan, pataom tame ngak dom bruk halan hatian di dom labik kan kandah, bhum tapen negar, dom xã ngak hu salah bruk padang ngak palei pala bahrau saong dom xã daok ngak dom kadha di palei pala bahrau paglaong, palei pala bahrau kiểu mẫu.

Tỉnh Ninh Thuận daok peih ngak catang dom jalan pacang caga chap mek kaya ikan suan hukum, oh khan brei thau, oh tui hukum IUU; caga siam dom asar kadha piah ngak bruk haong Kapol Thanh tra di UB chau Au mbang ka 5 piah samar langyah talaih “the kanjik” IUU. Dalam nan UB bhap bini tỉnh iew dom urang dang akok dom đơn vị, bhum palei pambuak tal bruk tacei ba ngak  saong taduan bruk pacang caga chap mek tui hukum IUU; pasang iek taong abih gilai ikan atah abih meng 15mét tagok pataok tame piah mek kaya ikan tagok; brei cih vak, pasang iek nhat ky taong chap, nhat ky blei njauk adat hukum.

Harei ini (7/6), anek saih di TP.HCM hu ngak salah môn pakacah puac abih pakacah tame tal bac 10 di karja dalam 120 minit. Thun ini, ban raya pilih ruah labaih 77.300 anek saih tame tal bac 10 karja dalam abih tih 98.000 anek saih tut angan pakacah. Điểm pilih ruah lac abih tih dom điểm di 3 môn Ngữ văn, Toán, Ngoại ngữ saong điểm ưu tiên (meyah hu). Anek saih tut angan tame tal bac chuyên, tích hợp brei pacah rilo jang sa môn tui bruk bac. Điểm pakacah tal bac 10 tui kuhria hu khan brei thau di harei 20/6.  

Đồn Biên phòng Lai Hòa, Bộ đội Biên phòng tỉnh Sóc Trăng pambuak haong baha  Prey Chóp, xã Lai Hòa, ban sit Vĩnh Châu peih tal pato bac akhae huroh Khmer dalam tuk padeih hè ka dom adei anek saih kan kandah di xã Lai Hòa. Tapa tal bac nan hu daong ka dom adei anek saih ngak randap, pang hu, vak hu dom huroh bangsa piah ngak bruk dalam palei saong dang dom adei paglong ilamo dalam tuk bac megru di dom sang bac. Tapa nan, Mban peih bruk hu alin brei  5 thung ia tasau, 2.000 baoh siphau saong 5 paok jien bac, yaok paok 500 ribau đồng ka dom adei sang kan kandah.   

Dom giáo sư y khoa di Đại học Quốc gia Seoul Hàn Quốc saong 4 sang iek ruak di Đai hoc ini hu buh phiếu pachreih tui bruk bruk đình công oh hu tukvak meng di harei 17/6, yaom lac rajaei daok hu dom bruk ngak piah langyah bruk meriak gauk urak ini haong gah y tế. Bruk ini hu maong lac ngak brei trak damak jang bruk srau kadau gah y tế kayua dom bác sỹ pasram bruk đình công dui atah labaih 3 bilan tapa piah cagar veik bruk rajaei brei tagok rilo jang bruk pilih ruah anek saih bac trường y.

Ruak kum manuk ada daok njom mbak khang di Australia, tuk dalam labaih 1 bilan tapa, jit ruak njom mbak tapa var raong ka 5 di negar ini. Urak ini, manuk ada di dom var raong  nan njauk ba nao am cuh klak saong var raong hu puh ramik pruh jru brei hacih. Anak bruk karja bang Victoria iew dom baoh sang daok di labik jaik taphia nan brei kareik manuk ada dalma var atau labik hu tauk tabung pacang piah plaik njiak njom mbak. Kuhria meng thun 1976 tal ini, Australia hu 9 mbang jit kum manuk ada. Yau nan min mbiah tal ini, taneh ia ini meng hu manuac njom ruak kum manuk ada lac uranaih mai veik meng negar langiu.

Đại hội đồng Liên hợp quốc hu pilih ruah pok ong Philemon Yang, lac urang ngak Thủ tướng dahlau daih di taneh ia Cameroon, ngak Chủ tịch bahrau. Ong Philemon Yang jeng Chủ tịch patui di nan dalam mbang nyaom ka 79 di Đại hội đồng, meng di bilan 9. Ong Philemon Yang dahlau daih bhian ngak Chủ tịch UB dom menuac naih gheih abih châu Phi di Liên minh châu Phi, hu taong yaom lac menuac abih drei ka dom bruk sron mbon hòa bình, cakrok khang kajap saong phẩm giá anek menuac.