Hadei di tamat bruk pakacah, tui jalan ba tabiak di Mintri Pato magru, bruk brei thau ka mbang pakacah tamat THPT thun ini hu khan brei thau di maong 8 harei 18/7/2023. Anek saih pakacah meda pasang iek điểm pakacah di mangaok hệ thống pilih ruah di Mintri Pato magru, Sở Pato magru atau di mangaok harak mbao. Tukvak suai di abih lac harei 20/7 meda hu peih bruk pok brei angan tamat THPT. Meng harei 18/7 tal harei 27/7, pataom mek harak phúc khảo saong padang angan phúc khảo.

Dalam mbang nyaom ka bruk KTXH 6 bilan akaok thun, bruk ngak, jalan ngak praong dalam 6 bilan puac thun ini, akaok UBND TPHCM Phan Văn Mãi ndom lac, bruk KTXH ban raya 6 bilan akaok thun hu rilo siam lagaih. Ban raya hu peih bruk padang ngak rilo danak dak praong, bruk lang talaih kan kandah, tavak tavaiy di doanh nghiệp hu dom jak jeng siam mekre. Gam haong nan, Quốc hội hu brei tapa Sarak 98 ka ngak iek dom sarak, jalan ngak karei ka patagok TPHCM. Tui kuhria, harei 7-7 tal, Thành ủy meda peih nyaom biai brei thau cambaih Sarak 98 di Quốc hội, ka  Chỉ thị di Thành ủy, jalan ngak di UBND, HĐND TPHCM.

Dah page ini (30/6), UBND tỉnh Long An hu peih bruk padang ngak Danak dak jalan Vành đai 3, labik nao tapa huyện Bến Lức, labik akaok daok di jalan tapen TP.HCM – Long An, labik puac di tanut canah jalan nduac samar Bến Lức – Long Thành, TPHCM – Trung Lương. Danak dak jalan Vành đai 3 nao tapa TP.HCM, Bình Dương, Đồng Nai saong Long An, hu padang ngak tukvak ka 1 atah labaih 76 km, haong yaom jien abih tih jaik 75.400 tỷ đồng. dalam nan, labik nao tapa Long An dài gần 7km haong yaom jien buh tame ngak abih tih lac labaih 4.200 tỷ đồng. Ini lac bruk ngak hu makna praong dalam cak rok patagok kinh tế - xã hội di bhum kinh te praong gah maraong.

Pambuak tal bruk lac yaok ratuh rahra payua harak yak bak, pathau Cty bảo hiểm Manulife haong Gilang pariak TMCP Sài Gòn (SCB) ba jien payua di tuai jeng harak pambuak bruk bảo hiểm nhân thọ, Thiếu tướng Nguyễn Văn Thành, Phaok akaok Cục Cảnh sát điều tra tội phạm ka tham nhũng, kinh tế, buôn lậu, Mintri Công an khan lac, daok duah thau cambaih laih bruk nan dalam tukvak anak tal, saong hu panuac kakei rahra njauk sahneng kuhria cambaih laih, oh mboh laba glaong bo mbaoh tangin tame harak pambuak bruk, dalam tuk oh ka thau cambaih dom bruk kak gauk di gah likuk nan

Hajan khang gam haong hangin khang di bier harei 29/6 ngak par tabung yaok piluh baoh sang di dom huyện Long Hồ, Mang Thít saong Tam Bình, tỉnh Vĩnh Long, ngak khut rilo drap ar di rahra. Urak ini dom bhum palei daok samar drah jak ba kapul mai daong ka rahra puh ramik, ngak pasiam veik dom khut tayah, daong rahra tani tanat raidiuk. Gam haong nan, daok pasang iek, yaok pataom dom khut khat piah samar drah daong ka rahra, pathau khan ka rahra pacang cakak sang danaok piah khik salamat dalam bilan hajan ribuk.

Ausralia saong Japon bahrau peih bruk pasram mesruh haong gauk di Biển Đông. Dalam mbang pasram mesruh dui atah 2 harei, dom sruh kapal mesruh saong kapal haoh di 2 taneh ia hu nao mai di bhum tasik daok hu bruk meriak gauk. Bruk pasram mesruh hu pataom tame ngak dom jalan mesruh pacang kapal gilai angaok mbaok tasik saong angaok langik. Tui sa urang ngak praong di Japon khan lac, “Australia, sa ayut di Mỹ, lac gah pambuak bruk biak praong dalam bhum Ấn Độ Dương - Thái Bình Dương”. Dua taneh ia “oh lac klah rabha yaom glaong haong gauk bo daok hu haong gauk kein laba jalan ngak praong dalam gah an ninh”.

Dom urang Islam nao ngak rukun Haji di palei Mecca daok glaih glar haong langik pandiak khang tal 48 độ C. Tui urang ngak praong di Saudia Arabia hu labaih 2.000 urang mebuk pandiak saong hu takik di nyu 230 urang metai dalam tuk nao ngak rukun haji. Tui Tổng lãnh sự Indonesia, hu takik di abih lac 209 urang Indonesia metai dalam mbang nao ngak rukun Hajj thun ini, kayua ruak tai baoh saong ruak jalan suak yava. Hu oh takik menuac var drei jar tuk nao ngak rukun haji dui atah rilo harei kayua langik biak pandiak. 

Negar Anh khan lac hu brei tagok khang dom jalan ngak piah khik caga dalam danak dak hukum salamat online, tui nan, pacang cakak bruk uraniah mbuan taom gaok dom văn hóa phẩm kanjah jhak. Tui dom ramik veik bahrau abih di rajaei, Anh meda brei paglaong tanut chuẩn piah thau cambaih umo thun ngan saong dom nền tảng pabak asal kadha urang praong. Dom jalan ngak bahrau jeng duah jalan pacap dom urang dang akaok dom mạng xã hội brei taduan trách nhiệm dalam bruk khik kajap salamat ka urang pandar uranaih