Dalam nan dom sang bac dự bị đại học; Sang bac Hữu Nghị 80, Sang bac Hữu Nghị T78, Sang bac Phổ thông Bhum glong Việt Bắc peih ngak bruk di thun bac 2023-2024 ngan haong  bruk pato megru bangsa yau ini: Patui bruk peih ngak hu siam meng dom  sarak, nghi quyet, jalan tacei ba di Đảng, Quoc hoi saong Karja ka bruk salih birau saong cak rok patagok bruk pato megru di bhum urang bangsa takik saong bhum ceik; Njauk brei buh jien buh prein tame piah ngak pakajap sang bac, tal bac di bhum biak kan kandah; paglong ilamu dom cei gru, nai gru. Peih ngak siam sarak ngan haong urang pato, urang bac, labik bac megru di bhum urang bangsa takik, bhum ceik.

Ủy ban MT negar Việt Nam tỉnh Bình Dương bahrau peih Nyaom biai pataom iek veik 20 thun Harei jum pataom bangsa tukvak 2003 - 2023. Dalam 20 thun tapa di tỉnh Bình Dương, hu 10.600 baoh sang jumpataom hu padang ngak alin ka dom urang kan kandah; jaik 224.000 sang hu daong cak rok patagok bruk ngak mbang, pala drak; yaok ratuh paok pandap alin ka dom sang sarak kanja, sang kan kathaot, uranaih kan kathaot pachreih bac ngan haong phun jien labaih 490 tỷ đồng. Rahra jeng hu rik tame jaik 68.500 harei ngak bruk, alin labaih 67.000m2 taneh hu yaom labaih 84.000 tỷ đồng piah peih praong jalan mbak puk palei.

Meng akaok thun mbiah tal ini tỉnh Sóc Trăng hu jaik 2.700 mbang urang ruak pandiak tabiak darah, tagok jaik dua mbang dut saong tukvak ini thun blaoh saong meda ruak daok rah tabiak kan thau dahlau. Pasak Pasang iek ruak tỉnh Sóc Trăng urak ini  daok peih bruk tui iek catang jit ruak dalam tỉnh, ngak brei hacih chip taong abih dom sruh jit ruak tuk duah mboh. Langiu di nan, dom bruk ngak yau peih bruk pametai  lăng quăng, pruh jru pametai  jamoh pambak ruak SXH, tui nan kakei bhap bini juai iek lap jit ruak.

Pambuak tal bala apui khuah di phố Khương Hạ, phường Khương Đình, quận Thanh Xuân, ban ine Hà Nội di melam 12/9, jabat chức năng brei thau lac 56 urang metai saong 37 urang njauk rambuac (dalam nan hu brei thau angan di 39/56 urang metai). Jabat Cảnh sát điều tra, Công an ban ine Hà Nội jeng hu tabiak Sarak ba tabiak langyah tui hukum bị can saong Harak cap mek bị can piah cap khip (4 bilan) ngan haong Nghiêm Quang Minh, lac po sang chung cư labik rahtabiak bala apui khuah, ka duas Ngak suan adat ka bruk Pacang caga apui khuah tui Paka 313 di Hukum Hình sự.

Kong an tỉnh Cà Mau brei ba tabiak kaoh tui hukum bruk ngak suan, urang ngak suan saong chap mek kareik 5 urang dalam dom bruk co klaik ameh yaom 10 tỷ đồng. Dahlau di nan, di harei 21/5/2023, Jabat Cảnh sát  hình sự  Kong an tỉnh Cà Mau hu taduan lac tiem ameh Minh Đức, xã Khánh Hải, huyện Trần Văn Thời njuak kol co klaik tame, mek rilo ameh jien saong ameh kuhria taong abih tih  labaih 10 tỷ đồng. Di harei 24/8 meng blaoh, trinh sát  mboh hu sa urang tame tiem ameh di ban sit Sông Đốc pablei ameh biak ralo saong blei veik ameh karei, mboh karei yau nan ye da-a tame ngak bruk brei cambaic laic. Hadei tukvak tangin sua catang, urang khan lac tame tiem ameh Minh Đức  klaik ameh, jien saong khan angan je dom urang karei haong gauk. 

Harei ini, Akaok Ủy ban châu Âu hu puac Harak Thông điệp liên bang yaok thun, brei thau dom bruk brei ngak dahlau dalam sarak di Liên minh châu Âu. Akaok Ủy ban châu Âu brei thau, Liên minh châu Âu hu ngak salah 90% dom jalan ngak hu khan brei thau atah di ini 4 thun, tuk dom urang pan akaok Liên minh châu Âu yam tame tukvak pan bruk. Châu Âu daok padang ngak sa nền kinh tế pasamu bruk tathuak nerak, haong panuac sanya khik kajap bruk samu gauk tuk peih ngak “Thỏa thuận Xanh”. Thông điệp liên bang jeng brei thau lac Liên minh châu Âu daok pachreih tui bruk Ukraine khik caga brei daok tamo taneh ia palei negar.

Dom urang jakar di gah Timun Liby mboh lac, dom urang metai dalam mbang ribuk ia sua khang tame ban Derna harei 10 -11/9 meng blaoh meda  tagok tal 20.000 urang. Dalam tuk nan yaok ribau rup tau  oh ka ba nao dar kayua daok cang duah thau angan je urang. Jaik abih dom rup tau  nan oh hu papaoak dalam kadung nilong  saong daok mbau bruk, mbuan ngak jhak nerak alam moi truong trak. Tui bruk ba tabiak, harei ini, QH Liby brei ginum biai  oh hu caga dahlau piah ndem biai ka bruk pasiam veik khut khat hadei di ribuk ia sua.

Tập đoàn công nghệ rilo taneh ia di Mỹ Apple hu panuac cagar veik  bruk di jabat pasang iek di France tuk tabiak bruk brei padeih pablei Iphone 12 di Apple haong makna lac ngak suan tanut phơi nhiễm bức xạ di Liên minh Châu Âu (EU). Bruk ngak ini di France meda ba tal dom bruk ngak patui di nan di rilo taneh ia pak châu Âu. Dalam pathau khan hu ba tabiak di harei 13/9 bahrau blaoh, Apple brei thau lac janih iPhone 12, hu rilo jabat dunya brei thau lac ngak njauk tui dom tanut chuan di bức xạ dunya. Apple jeng hu pabak dom bruk ngak dalam bilik ngak iek di gah ka klau hu brei thau cambaih ka bruk ngak njauk di phone par tangin ngan haong jabat pasang iek di France. Kayua yau nan ye, Apple brei thau panuac di France lac oh njauk, oh hu hagait piah ngak cambaih./.