Harei ini (5/6), Mbang nyaom biai ka 5, Quốc hội mbang 15 yam tapa adit ngak bruk ka 3. Dalam harei ini, Quốc hội pang Harak pathau khan ka danak dak Hukum dom kapul brei masaiy jien (masiam veik) saong ginum biai di kapul ka 3 danak dak Hukum. Nan lac danak dak hukum Sang danaok (pasiam veik); danak dak hukum kaya ia (pasiam veik) saong danak dak hukum dom gah brei masaiy (pasiam veik). Bruk njauk mayai nan lac di adit ngak bruk ini, Quốc hội caik tabiak 2 harei mateh piah peih bruk sua tangi saong javap jaloi. Phó Thủ tướng Lê Minh Khái haong 4 akaok Mintri, lac Mintri lao dong, thương binh saong xã hội; Mintri jalan mbak pajeng ba Mintri Khoa học saong công nghệ saong akaok Mintri, Chủ nhiệm Ủy ban Bangsa meda javap jaloi anak Quốc hội.

Pambuak tal bruk kurang tapuk bac da-a, Thứ trưởng Mintri Pato Megru Hoàng Minh Sơn brei thau, tukvak tapa, hu bruk duh hatai huac kurang tapuk bac da-a tal 4, tal 8 saong tal 11. Hu meneing makna lac kayua dom tinh ban pilih ruah tapuk suai, meneing lac kayua bruk mbaoh tangin brei adat di dom tinh ban. Min mbiah tal urak ini, dom tinh ban hu pasang iek, mbaoh tangin brei tapa ginup abih. Mintri Pato megru hu rilo mbang ngak bruk haong Nhà xuất bản Giáo dục Việt Nam piah lang talaih kan kandah, caga bruk in tapuk saong meda lac ngak salah bruk in tapuk giáo khoa dom thun dahlau.

Kapul bác sĩ Nhân Ái Ban raya Hồ Chí Minh (dalam Kapul daong urang ruak kan kathaot di Ban raya Hồ Chí Minh) pambuak haong Kapul daong urang jaoh jo saong Uranaih matui madar di Bình Thuận daok peih bruk iek ruak saong blac raih mata ngak pahla ka urang kan kathaot, uranaih matui madar di tỉnh Bình Thuận. Dalam danak dak ini, dom y, bác sỹ iek ruak ka labaih 500 urang ruak saong blac raih mata oh mek jien ka 250 urang ruak. Langiu di nan daok pabak brei jru oh mek jien. Ini lac sa bruk ngak hu makna praong, rik daong klah rabha saong ba meta hadah ka rilo urang kan kathaot, urang gaok kan kandah di Bình Thuận.

Di dalam tỉnh Trà Vinh hu rilo labik glut jaleih, trak abih lac di 2 palei: Đông Thành saong Hồ Thùng, xã Đông Hải, huyện Duyên Hải, haong labik glut jaleih atah labaih 3km, ngak kan kandah tapak tal 166 sang bhap bini. Piah khik caga salamat ka menuac urang saong drap ar di rahra, tỉnh daok samar peih ngak dom jalan dak padang labik daok bharau piah ba jaik 60 sang bhap bini tabiak truh labik glut jaleih. Gah chức năng jeng hu caik dom bảng brei thau di dom labik mbuan glut jaleih, pasang iek veik taong abih dom sang danaok, dom danak dak daok hu mbaok di labik nan saong caga taoh talaih, panduan ba nao labik karei tuk mboh lac tal tuk njauk ngak.        

Pambuak tal bruk cuh bilik sang tro di huyện Long Thành, tỉnh Đồng Nai, urak ini hu 2 urang metai kayua kadung trak, dalam nan hu urang likei umo 46 thun  medil lac menuac cuh pui khuah. Yau nan, langiu di 2 urang metai, kuhria tal tukvak ini, dom sang iek ruak di Ban raya Hồ Chí Minh daok taong ruak  ka 5 urang njauk bala dalam bruk khuah pui. Dahlau di nan, dah page harei 3/6, sa binah sang tro 15 bilik di puk 2, xã Phước Bình, huyện Long Thành khuah apui. Labik khuah hu brei thau lac bilik sang tro ka 3 saong ka 10, hu taong abih tih 11 urang daok. Dahlau di abih công an hu brei thau makna lac kayua ma-yau haong gauk, Nguyễn Trí Hiếu daok di bilik sang tro ka 10 nao cuh  bilik ka 3, lac labik payo drei daok, hadei di nan cuh gam sang tro di drei.

Urang jakar Ấn Độ daok peih bruk pasang iek, duah thau piah duah tabiak makna ba tal bala trak damak di 3 radaih pui, ngak brei takik di abih 288 urang metai saong labaih 850 urang njauk rambus. Gah jalan pasei Đông Nam Ấn Độ brei thau, radaih pui tốc hành njauk di nyu brei nduac tame jalan ray praong, min gom tín hiệu hadah tagok tacei nao gah jalan sit, ngak ka nyu ginuh tapak tame radaih pui pajeng pandap daok pataok di labik nan. Hadei di tuk ginuh radaih pui pajeng pandap, rilo toa di radaih pui pajeng menuac tableik gar jalan ray taphia nan. Dom minit hadei di nan, sa radaih pui pajeng menuac karei nduac mai haong tốc độ labaih 116 km/h saong ginuh tapak tame dom toa di radaih pui bahrau blait kong nan.      

Đĩa bay hu manuac peih camriep di dunya hu ngak tabiak di Thâm Quyến, Trung Quốc, hu par tagok dalam sa mbang par iek di mblang bein Tài năng Thâm Quyến harei /6. Baoh đĩa bay hu manuac peih meda par tagok par trun tapak  di mangaok thu saong mala ia, saong lac đĩa bay meng điện par tagok par trun dang tapak hu manuac peih camriep di dunya. Tukvak par di đĩa bay hu manuac peih meda hu 15 minit saong par glaong 200 mét, prein par meda lac 50 km/h saong meda hu salih lagaih di bruk peih tu dong atau hu manuac peih.

Kapul dom taneh ia pablei menyek tabiak negar langiu OPEC saong dom gah pambuak bruk kayua Nga ba akaok (ieu katut lac OPEC +) bahrau taom gauk di Viên (Áo) piah ginum biai ka sa thỏa thuận bahrau ramik veik hạn ngạch sản lượng di dom taneh ia dalam thun ini saong thun 2024. OPEC+ pabak jaik 40% dom menyek tamo di dunya, jeng hu makna lac dom bruk ba tabiak di kapul ini meda pambak khang tal yaom menyek. Tui dom panuac khan, OPEC+ meda cakak trun sản lượng, dalam tuk yaom menyek trun saong dalam tuk menyek pabak rilo, ba tal labaih./.