Hadei tuk peih bruk “Menyum kaphe page - Ndom meyai haong rahra di Ndang bo Ban Thủ Dầu Một, tinh Binh Duong hu pok meyaom lac sa bruk naih gheih di negar dalam bruk bac megru saong ngak tui hatai sahneng, ilamo, bruk daok dang di Hồ Chí Minh, tal ini taong abih dom khu pho di ban Thủ Dầu Một jeng patui gauk peih bruk ini. Meng bruk ini bo rilo asal kadha cuang kandah srau kadau hu langyah samar drah saong siam lagaih, daong paglaong raidiuk rahra. Tapa nan, hatai jia di rahra ngan haong karja palei dak harei dak hu pasiam.

Pasang iek bruk peih ngak Danak dak ngak brei oh daok baoh sang taik tahak di xã Hòa Thành saong xã Định Bình, Ban Cà Mau, Bí thư Tỉnh ủy Cà Mau Nguyễn Hồ Hải caong khin, karja dom bhum palei jak ba manuac sia rahra rik jien daong prein tame, jak ba dom kapol nyaom, urang abih di nyu lac urang jakar, urang đảng piah daong dom baoh sang di danak dak padang ngak sang hu siam jang. Hu jalan kuhria daong bruk ngak mbang, ba mbuan lagaih ka dom baoh sang kham merat yam tagok dalam raidiuk. Tinh Ca Mau hu 4.400 baoh sang taik tahak. Mbiah tal ini, hu padang ngak birau, ramik pasiam labaih 2.270 baoh sang.

So Y te Ban raya Ho Chi Minh bahrau pandar UB Bhap bini Ban raya Ho Chi Minh khan brei thau abih jit soi di 22 phuong, xa tuk labik ini gam gam hu rilo adit patui gauk oh hu urang njauk ruak soi bahrau. Meng kreh bilan 1 tal ini, dom urang ruak soi yaok adit hu trun samar di taong abih dom thun umo. Hadei tuk khan brei thau abih jit ruak, Ban raya Ho Chi Minh jeng patui veik khik tani tanat bruk pasang iek, duah mboh samar drah dom urang ruak hu medil dalam bol bhap rahra saong dalam sang bac piah samu langyah, pacang cakak bruk mbuan tamuh jit gilac.

Tui Pasak Y te huyen Bù Đăng, tỉnh Bình Phước, tal harei ini 27/3, huyen hu 14 mbang urang ruak patuk ho gà, dalam nan hu 7 uranaih. Hadei tuk dut iek mboh ruak, Pasak Y te  hu pasang iek jit ruak, ba dom uranaih ruak mai Pasak Y te huyen brei daok karei piah taong ruak tui bruk ba tabiak; tui nan pambuak haong karja xa Bình Minh tui iek dom baoh sang hu anek sit, pruh jru pametai anek ruak, puh ramik hacih labik hu uranaih ruak saong labik meda mbuan pambak ruak. Tui pathau khan jak ba dom baoh sang  ba uranaih mai klauk jru caga ruak; khik brei labik daok lahei, hacih, pacang ruak njom mbak.

Dom harei puac bilan 3 ini lac tukvak paik amraik kalu njauk bilan. Di dom bein amraik kalu di tinh Dak Lak, bruk laih paik biak chreih chrai bui sambai. Min bilan paik thun ini, po bein kurang urang ngak. Kayua nan, rilo bein hu tagok jien pah urang ngak tal 300.000 dong/harei. Bruk kurang urang ngak oh lac ngak suai bruk laih paik bo daok ngak tagok jien buh tabiak, ngak kateik geik praong ka dom baoh sang rahra. Dak Lak lac sa dalam dom tinh hu taneh pala amraik kalu praong abih dalam Viet Nam, ngan haong labaih 28.000 ha.

Dom harei jiak ini, ban ine Phnom Penh saong dom do thi praong di Campuchia bhian dang labik akok dalam angan dom ban yawa langik njom nerak trak abih di dunya. Tui IQAir, pandar ung dung dut iek yawa langik di dunya, Phnom Penh dang labik akaok di ban yawa langik njom nerak abih di dunya dalam harei 26/3, dut iek mboh yawa langik njom nerak tanut 291 lac “Biak jhak ka prein yawa”. Hu iek lac harei njom nerak jak abih di ban ine Phnom Penh meng akaok thun 2025 tal ini.

Hadah page ini (tui mon Viet Nam), Tong thong Mỹ Donald Trump hu khan brei thau bruk ba tabiak tanut jien je 25% ngan haong taong abih radaih oto blei tame meng langiu negar. Kadung jien Mỹ meda mek tame 100 ty USD yaok thun meng paok jien je bahrau. Kuhria bruk pambuak meng jien je ini lac biak praong. Kayua jaik meteh oto bo urang Mỹ daok pandar lac blei tame meng langiu negar. Urak ini, Mexico, Canada, Japon, Han Quoc lac dom negar pablei oto tame negar Mỹ rilo abih.

Rajakar Mexico chap mek urang pan akaok gah pato urang di kapol pablei matuy biak praong Jalisco New Generation. Dom urang nan bhian pandar mang xa hoi piah ba dom khaw tin bleik saleik pagat urang, abih di nyu lac uranaih, hadei di nan ba tame dom kapol nyaom  ngak bruk suan hukum. Urak ini, Mỹ hu ba angan kapol nan tame sarak  dom kapol nyaom duis rilo taneh ia jak abih saong ba tabiak paok jien alin tagok tal 10 trieu USD ka thei khan brei thau piah mek hu El Mencho./.