Janih jru ni hu pablei angaok drak pasa 

Bruk Mintri y tế brei adat pandar  3 janih jru pacang  virus hu  hoạt chất Molnupiravir – ngak tabiak di Việt Nam taduan hu bruk sangka praong di bhap bini .Urak ni, dom jabat ngak jru pacang virus ni jeng dok patagok bruk ngak tabiak, caga pablei ka drak pasa.Tui dom chuyên gia, bruk jru pacang virus ngak tabiak di  Việt Nam hu pablei tabiak drak pasa, hu daong patrun bruk bhap bini blei dom janih jru  oh thau meng halei mai, abih di nyu nan lac rik dong pacang cakak bruk mbuan si ruak trak di dom F0.

Meng harei 25-2, Cục Cảnh sát khik ramik hành chính ka bruk saron mbon di xã hội (C06, Mintri Công an)  meda peih bruk pabak tài khoản định danh online ka rahra tapa bruk ngak bahrau, salih bahrau, pabak gilac căn cước công dân di dalam taneh ia. Tui urang lambaok C06, bhap bini pandar tài khoản định danh online hu dom kein laba yau ye patak pataom hu rilo tukvak, jien padai kayua oh njauk ngak rilo harak gar, trun rilo janih harak gar tuk ngak dom bruk hành chính công. Langiu di nan, tuk pandar tài khoản định danh online ka rahra meda hu khik kadauk khau tin, plaih njauk ngak ja, daong ka dom mbang ngak harak gar hu salamat.  

Di mbang nyaom Mban tacei jalan pacang caga  jit COVID-19 song pasiam veik kinh tế ban raya .HCM rah tabiak beir harei kabroi  (22/2),Sở Y tế TP.HCM brei thau, dalam adit tapa, ban raya hu  7.505 urang njom COVID-19 dalam sang bac. Kuhria meng harei 14/2 tal urak ni, dom urang njom  COVID-19 di uranaih tagok glong jang  3 mbang dut song adit dahlau . Ong Tăng Chí Thượng, Yam ndoc Sở Y tế TP.HCM brei thau, dom urang y tế hu padang jalan ngak  tuk uranaih  njom  COVID-19 patagok. Meyah bruk rah tabiak jhak, dom urang tame sang iek ruak  rilo, ye brei cấp cứu song tame sang iek ruak di dom sang iek ruak  quận, huyện hu  khoa nhi. Abih di nyu nan lac, tuk tong abih uranaih dok iek ruak brei dong labaih  100 mbang sa harei, Sở Y tế hu panuac daong ka  UBND ban raya pasang iek brei padeih bac tapak di sang bac.

Tỉnh Sóc Trăng bahrau peih tabiak danak dak padang ngak sang danaok ka dom baoh sang kan kathaot, sang kan kandah oh hu sang daok dalam tỉnh mbang 2/2022. Urak ini, di dalam tỉnh daok jaik 2000 baoh sang caong hu sang danaok ngan haong abih tih jien buh tame jaik 99 tỉ đồng. piah ngak hu bruk ini, ong Lâm Văn Mẫn, Bí thư Tỉnh ủy Sóc Trăng jak ba dom jabat, kapul nyaom, dom urang ngak pahla gam sa tangin haong gauk daong ka dom baoh sang kan kathaot hu sang daok tani tanat, sahanang hatai ngak bruk,  daong jalan saong pabak prein yam tagok tabiak truh kan kathaot khang kajap.

Piah pachreih ba, dong ka mik va bangsa Khmer dahlau di tuk  Tết Chôl Chnăm Thmây 2022, beir harei 22/2, Công an tỉnh Bạc Liêu pambuak bruk song baha  Pôthivong (ban raya Hồ Chí Minh) peih bruk alin hadiah  400 pok pandap dalam nan hu brah, mì gói song pandap mbang ka mik va  Khmer hu rai duik kan kandah dok di  xã Vĩnh Trạch, ban  Bạc Liêu, kuhria tui yaom jien abih tih lac 160 triệu đồng. Bruk ngak ni hu rik dong haong karja palei ngak siam bruk khik ramik  an ninh chính trị, khik caga trật tự, siam mekre  xã hội, dak padang phum, sóc di Bạc Liêu mek hu tanut palei pala bahrau paglon, palei pala bahrau  kiểu mẫu dalam tuk vak anak tal.

Dah page 22/2 (tui maong Việt Nam), Hội đồng Bảo an Liên hợp quốc hu peih mbang ginum biai samar drah ka bruk di Ukraine. Mbang ginum biai hu peih tabiak tui panuac ieu di Ukraine, Mỹ, 5 taneh ia châu Âu saong Mexico.Dom taneh ia phương Tây mboh lac bruk Nga bahrau công nhận độc lập di 2 taneh ia di gah timur Ukraine ngak brei patagok bruk daok catang. Dalam sa bruk pambuak tal, Tổng thống Mỹ Joe Biden brei thau lac Mỹ meda taong phat Nga piah pabak viek bruk ba lin mai tal labik gah timur Ukraine. Ong Biden brei thau lac, dom bruk ngak bahrau blaoh di Nga lac sa bruk peih mbaok ka sa mbang taong tame meblah mek Ukraine.

Mblang kapan haoh dunya Đu-bai, Dom Tiểu vương quốc A Rập thống nhất mbang ka 8 gam gam hu brei angan  mblang kapan haoh thar var abih di dunya. Yaom lac jit prong COVID-19, thun bloh mblang kapan ni  taduan labaih  29 triệu tuai du lịch dunya. Ni lac sa bruk biak chreih chrai  ka gah kinh tế tui jalan du lịch di  Đu-bai, saong lac bruk brei mboh du lịch dunya hu patagok meneing meng di tuk jit prong  COVID-19 tamuh tabiak, ba tal bruk kreik pabah mbang jalan tapen negar oh ka bhian  mboh  dalam thun 2020. Mblang kapan haoh dunya Đu-bai tui kuhria hu taduan  57 triệu mbang tuai dalam thun ni  song tal thun 2024 hu pasiam veik abih dut song tuk vak dahlau di jit prong.

Sa roh duah iek tui harak gar y tế di labaih 153.000 urang Mỹ, bahrau hu khan brei thau mangaok tạp chí Nature Medicine, hu mboh lac bruk mbuan njom dom janih ruak hatai baoh dak harei dak tagok dalam akaok thun camriep hadei di tuk njom ruak COVID-19, kuhria gam tuk urang ruak mboh hanjul. Sang bac Tim mạch Mỹ jeng hu brei thau lac dom kan kandah trak saong dui atah di virus SARS-CoV-2 meng bruk vak tabiak sa panuac pato tacei bahrau, tui kuhria hu ba tabiak khan brei thau di bilan 3, piah tui iek dom urang hadei di tuk njom ruak COVID-19./.

Urang lang: Hanipha- Thu thảo -23/2