Di mbang nyaom biai haong dom mintri, dom gah, dom tinh, ban piah ba tabiak jalan buh jien tame padang ngak jalan cao tốc Ninh Bình - Nam Định - Thái Bình saong Gia Nghĩa (Đắk Nông) - Chơn Thành (Bình Phước) hu peih tabiak di harei 12/3, Thủ tướng Phạm Minh Chính brei thau: ini lac 2 jalan hu makna praong, ngak jeng prein khang, peih tabiak bruk cak rok patagok bahrau ka bhum taneran kraong Hồng, Bhum Đông Nam Bộ saong dom tinh, ban karei. Abih di nyu nan lac dom tinh, yau ye Nam Định, Thái Bình, Bình Phước hu rilo kein lagaih, prein khang min bruk cak rok patagok daok gaok rilo kan kandah kayua jalan mbak nao mai ka oh samu gauk, abih di nyu nan lac kurang jalan cao tốc piah pambuak gauk. Thủ tướng ieu kakei bruk caga buh jien tame njauk siam lagaih, tani tanat, chất lượng jang.

Mintri Ilamu, Thể thao saong Du lịch bahrau ba bruk ngak meng kan ahar tapei racam Thuận Hưng (phường Thuận Hưng, quận Thốt Nốt, TP. Cần Thơ) tame angan Inem krung ilamu phi vật thể pakat negar. Bruk ngak ahar tapei racam Thuận Hưng hu meng labaih 200 thun tapa, hu patoa veik meng rilo rairah mikva dalam palei piah ngak saong khik bruk. Di phường Thuận Hưng urak ini hu 58 sang ngak ahar tapei racam, ba bruk ngak brei ka labaih 250 urang ngak hu jien mek tame tani tanat, rik daong cakrok kinh tế dalam palei. Labik ini daok jeng labik ravang iek hu rilo tuai mai duah thau ka dom palei ngak meng kan, pandap mbang huak, ilamu di bhum taneh Tây Đô.

Kapul y bác sĩ haong dom urang daong jien meng TPHCM bahrau peih mbang iek ruak, alin brei jru oh mek jien ka nội khoa, ngoại khoa; pasang iek saong tacei jalan iek ruak dom janih ruak karei saong pato tacei ilamo, jalan pacang caga ruak kik ka rahra di tỉnh Bến Tre. Di mbang iek ruak, alin jru oh mek jien, Phó akaok UBND TPHCM Võ Văn Hoan hu payua panuac thau dhar phol tal mikva Bến Tre hu rik tame bruk cak rok patagok di TPHCM dalam tukvak tapa. Tapa nan, hu labaih 300 paok pandap di kapul hu jao tal tangin rahra gaok kan kandah di Bến Tre, kuhria tui yaom jien abih tih lac 200 triệu đồng.

Tỉnh đoàn Kiên Giang bahrau peih bruk tabiak mbaok "harei ngak bruk tabung glaong ba gauk tame padang ngak palei pala bahrau pambuak haong peih ngak danak dak "Kayua 1 Việt Nam hijao" thun 2023. Dalam danak dak, yaok urang pala saong iek glang 1 phun hijao daong dak padang langik tasik hijao mekre, hacih sa-at, an sinh xã hội, quốc phòng, an ninh di dalam tỉnh. Tapa nan, Tỉnh đoàn Kiên Giang hu daong ngak sa mblang me-in ka uraniah; daong phun jien peih bruk ngak mbang ka dam dara urang đoàn; brei 25 pok pandap ka urang dahlau daih ngak thanh niên xung phong, sang kan kandah saong uraniah kham merat yam tapa kan kandah, bac da-a siam di dalam xã Sơn Kiên, huyện Hòn Đất.

Dom thun jaik di ini, Bình Phước tamuh tabiak bruk raong cim yến kayua ini lac bruk ngak ba mai  kein laba biak glaong, ba jien mek tame tui kuhria yaok tỷ đồng yaok thun. Dalam tỉnh urak ini hu labaih 1.400 labik pachreih hu anek cim, raong cim yến... Dom sang raong cim yến bhian pambuak haong sang daok haong danak dak ka rahra karei dalam bhum rahra nan ye ngak kan kandah tal raidiuk di rahra vil val nan, abih di nyu nan lac sap danei biak catang meng loa ieu pachreih  cim yến. Gam tui di nan jeng ngak tachrauk nerak alam môi trường, tamuh tabiak jit ruak meng aih saong bilau cim yến laik trun… bruk dom baoh sang eng drei raong cim yến ngak kan kandah ka bruk khik ramik. Langiu di nan, kayua ka oh hu quy chuẩn dalam bruk padang ngak sang yến nan ye bruk khik ramik saong pabak harak adat brei raong cim yến daok gaok rilo kan kandah. 

Hãng thông tấn karja KCNA di CHDCND Triều Tiên brei thau lac taneh ia ini bahrau cuh hu siam dua baoh tên lửa meng sa sruh tàu ngầm pamaong tal sa labik daok mala ia. Tui KCNA, sa bruk pasram mesruh cuh tên lửa mala ia hu peih ngak di mesup harei adit (12/3), dalam nan tàu ngầm "8.24 Yongung" hu cuh 2 baoh tên lửa di bhum negar langiu di takai tasik gah pai di Triều Tiên. Bol lin Hàn Quốc daok dalam báo động glaong saong gah tình báo taneh ia ini daok ngak bruk haong Mỹ piah duah thau cambaih laih ka bruk cuh nan.

Tui hãng tin Reuters, dom cty praong di Nhật Bản tui kuhria meda pathau khan tanut tagok jien bilan khang abih dalam 26 thun tapa, hadei di tuk tamat mbang ginum biai di gah doanh nghiệp saong công đoàn urang ngak dalam adit ini. Dalam thun 2022, Nhật Bản hu bruk lạm phát tagok glaong abih. Yaom cai pandar tagok khang ngak ka bruk caong tagok jien bilan di urang ngak dak harei dak glaong. Thủ tướng Nhật Bản Kishida Fumio brei thau lac, tagok jien bilan lac jalan piah pachreih bruk patagok bahrau saong pachreih  kinh tế cak rok patagok.

Rajaei Mỹ kuhria ba tabiak panuac khan brei thau hu makna biak praong dalam harei ini (13/3) tui mon Việt Nam, piah patagok khik caga dom pok jien payua saong pacang cakak dom bruk oh siam di mangaok darak pasar jien padai, hadei di tuk Gilang pariak Thung lũng Silicon (SVB) jaleih di harei 10/3 meng blaoh. Dom urang jakar ngak praong di Mỹ hu ngak bruk luac adit bloh piah taong yaom dom bruk tamuh tabiak mai meng bruk phá sản gilang pariak praong abih kayua srau kadau jien padai thun 2008, abih di nyu lac biak caik hatai sangka tal gah đầu tư mạo hiểm saong dom gilang pariak khu vực./.