Di Nyaom biai iek veik bruk pambuak gauk patagok dulich bhum Đông Nam Bộ peih tabiak di Bình Phước, 6 tỉnh lac: Ban raya HCM, Bà Rịa - Vũng Tàu, Đồng Nai, Bình Dương, Bình Phước saong Tây Ninh jeng mboh lac, bruk cak rok patagok dulich Đông Nam Bộ oh ka sumu haong bruk patagok di bhum tanehhu rilo ilamu - sajarah dakrai, ralo labik rivang main saong biak rilo prein khang, menuac ngak. Nan ye, dom bhum palei hu panuac brei jhul khang bruk roh duah darak pasar piah padang ngak pandap dilich lagaih; pambuak khang kajap dalam bruk peih ngak, yaih khan dulich di bhum.

 UBND tỉnh Bạc Liêu bahrau peih bruk pok angan baha Xiêm Cán lac labik ravang ma-in hu angan di ĐBSCL. Baha hu padang ngak di thun 1887 di puk Biển Đông A (xã Vĩnh Trạch Đông, ban Bạc Liêu), di mangaok mblang taneh praong jaik 5.000m², ndung mbak ilamo kiến trúc Angkor Khmer meng kan. Di pak ini hu rahtabiak rilo bruk sajarah cách mạng di tỉnh Bạc Liêu. Di baha Xiêm Cán, mikva bangsa Khmer Nam bộ bhian pataom gauk piah bac akhar huruh, bac daoh tamia. Di pak ini, jeng bhian peih ngak dom adat cambat, tanarakun di urang Khmer, pachreih hu rilo mikva bangsa Khmer Nam bộ saong tuai damuai.

 Hadei di tuk hu mbaok tame dom danak dak khuyến mãi puac thun saong danak khuyến mãi “ Shopping Season" kayua Sở Công Thương TPHCM peih ngak, rilo labik pablei lẻ, siêu thị di Ban raya HCMmek jien tame biak rilo. Mbang khuyến mãi ini daong bhap bini meda patak pataom hu jien pandar cai, saong pachreih urang blei pandar puac thun. Bruk njauk biai di danak dak thun ini lac njau tame tuk jaik Tết Nguyên đán 2023 gam haong Danak dak khuyến mãi pataom tame pakat negar. Kayua yau nan ye, tukvak khuyến mãi meda dui atah tal harei 25.1.2023 ( lac harei 4 bingun Tết Qúy Mão).

Dom harei ini, bruk glut jaleih takai tasik di Cà Mau rahtabiak trak damak jang. Tui panuac khan di bhap bini, meng bilan 6 tal urak ini, bruk glut jaleih takai tasik rah tui xã Tam Giang Tây daok rahtabiak khang, rayak paoh mbang tame mbaok taneh meng 30 tal 50m. 5 danao raong hadang harieng njauk ia tasik ba theik, 16 baoh sang bhap bini njauk kan kandah tapak, 5 baoh sang njauk panduan ba nao daok di labik karei. Dalam 254km takai tasik, urak ini hu 189km njauk glut jaleih, hu dom labik glut dalam, hu 19km njauk langyah samar drah. Meng di thun 2015 tal urak ini, labaih 2.000 ha glai pacang caga njauk ia tasik ba theik, oh daok prein piah pacang caga haong bala di langik tasik.

Tui Jabat Cảnh sát Jalan mbak, Công an tỉnh Bình Thuận dalam klau harei tapa, Balai Cảnh sát Jalan mbak Hàm Tân chap mek saong langyah gam gam rilo urang peih radaih dương tính haong jru matuy. Dom urang peih radaih taduan lac dahlau di nan hu nao mbang tiệc hu pandar dom janih matuy yau cần sa, matuy patau, matuy tổng hợp…Taong abih dom urang peih radaih dương tính haong matúy brei chap khik radaih, taong phạt jien meng 30-40 trieu đồng, mek harak adat peih radaih meng 22 tal 24 bilan.

Akaok Mintri ngoại giao dom taneh ia Hà Lan, Canada saong Ecuador brei thau lac pachreih tui bruk jak ba padang tabiak sa tòa án pacang caga tham nhũng di dunya. Ngoại trưởng Hà Lan ndom lac sa tòa án haong gauk meda lac jalan daong ka dunya peih bruk pacang caga tham nhũng di urak ini. Tui pathau khan di Liên hợp quốc, tham nhũng ngak palai pajoa labaih 2.000 tỷ USD yaok thun di dunya. Labaih 181 taneh ia, hu tut angan tame Công ước Liên hợp quốc ka bruk pacang caga tham nhũng dalam kham marat pacang cakak tham nhũng di dunya.     

 Sa roh duah birau abih brei thau, bruk patuh phao đạn ngak metai labaih 1 trieu urang di Mỹ  dalam 30 thun tapa. Urang metai  kayua patuh phao  đạn dalam dua thun akaok jit COVID-19 tagok biak ralo, labaih 25%. Urak ini oh ka thau cambaic laic  kayua meng halei ba tal metai kayua phao đạn tagok samar min dom urang ilamu langyah lac, dom bruk ba tal dalam nan hu bruk lahik bruk ngak kayau jit ruak, kinh tế sraw kadau saong bruk patagok urang ruak dom janih tâm thần dalam tuk jit ruak. 

 Trung Quốc hu cuh gilai Thần Châu-15 di melam 29/11, ba 3 phi hành gia tagok langik dalam dom bruk ngak puac abih di tukvak padang ngak bilai vũ trụ. Tui urang brei panuac di Danak dak vũ trụ hu urang peih di Trung Quốc, ini lac bruk cuh tagok mbang ka 6 di danak dak vũ trụ hu urang peih Trung Quốc dalam thun ini, jeng lac bruk ngak puac abih dalam tukvak padang ngak bilai vũ trụ. Bruk ngak praong di mbang ini lac ngak cambaih prein daong salih gauk di dom phi hành đoàn di bilai vũ trụ, mbang camriep lac peih bruk salih 2 kapul phi hành gia di mangaok quỹ đạo./.