Dalam 2 harei 26 saong 27 bilan 10, Quoc hoi ginum biai ka jak jeng di Bruk peih ngak  jalan patagok kinh tế - xa hoi thun 2022; ba tabiak jalan ngak ka thun 2023…Tui pathau khan, dalam thun hu 14 dalam 15 bruk ba tabiak saong yam tapa dut saong bruk  QH jao ngak, ta-eng bruk patagok năng suất ngak bruk xa hoi oh ngak hu, kuhria mboh tagok 4,7 - 5,2% nan lac biar jang bruk ba tabiak meng 0,3 tal 0,5%. Ini lac bruk hu makna praong brei mboh bruk meriak gauk dalam bruk ngak kinh te. Dalam tuk patagok kinh tế tui kuhria tapa labaih 2% dut saong bruk ba tabiak saong kuhria rah tapa taong abih pandap ngak tabiak tui yaok urang jeng hu tagok dut saong bruk ba tabiak. Tapa nan brei mboh bruk ngak kinh te daok kurang, patagok daok pambak tame rilo bruk yau  phun jien saong urang ngak.

“Darak Tết Công đoàn" tuk Tết Nguyên đán 2023 hu peih tabiak di 20 labik. Tui Tổng Liên đoàn Lao động Việt Nam, ini lac dom labik hu rilo urang đoàn, urang ngakl, rilo urang bangsa takik, bhum trung du, bhum ceik, bhum tapen negar. Tapa nan, piah pabak dom janih pandap pandar yaok harei haong yaom lap, peih dom bruk me-in bui sambai tết; tacei jalan, pasang iek prein yava, brei jru, alin hadiah pandap brei ka urang ngak gaok kan kandah. Danak dak “Tết taom gauk - Xuân jum pataom” hu pataom ngak di cơ sở haong pakat mangaok cơ sở, labik hu rilo urang đoàn, urang ngak.

  Di Đồng Nai, Cục Chính trị Quân khu 7 birau ba tabiak jalan peih ngak danak dak “Xuân Urang lin” thun 2023, kuhria peih ngak di huyện Vĩnh Cửu dalam dom harei 29, 30/12/2022 saong 10, 11/1/2023. Dom bruk ngak nan lac: cuh gilau di Căn cứ Trung ương Cục Miền Nam, pasiam jalan mbak di palei 4 xã Mã Đà (huyện Vĩnh Cửu), alin pandap ka urang jakar ngak bruk cách mạng umo praong,  baoh sang dalam sarak karja saong peih bruk “Darak Xuân zero đồng- pambak hatai ranam”…Danak dak piah sangka kuhria tết ka baoh sang, urang jakar, urang lin saong bhap bini hu radiuk kan kandah di bhum atah bayah, bhum taphia negar, kaoh pulao saong bhum căn cứ CM.

Mesup 26/10, di Pasak parang iek ilamu Cam (Bắc Bình, tỉnh Bình Thuận) hu peih ngak dom bruk ilamu bhap bini Cam saong taduan mek pandap. Thun 2022, Pasak hu jak ba alin brei hu  25 pandap klak pambuak tal ilamu Cam, tui nan, abih tih pandap di pasak urak ini hu labaih 1.500. Hu thau, tapa ini, hu peih rilo bruk ngak karei, yau ye: Parang iek rup thaot mek hu giải dalam bruk pakacah rup thaot mekre ka labik du lịch Bàu trắng huyện Bắc Bình, ngak iek bruk ngak lan am, menyim khan bai, pakacah vak akhar Cam, ravang iek Sang parang iek, pambuak tour ravang iek gilang peih Po Patao Cam, bimaong Po Klaong Mâhnai, bimaong Po Anit, ngak iek har naong ya meng kan di urang Cam. 

Pahadar  190 thun harei Padang tỉnh An Giang ( 1832-2022), Sở Ilamu, The thao saong Dulich tỉnh peih ngak danak dak Caravan du lịch An Giang ngan haong kadha “An Giang - Sambo mau bhum taphia negar” meng harei 2 tal harei 4/11 angaok jalan atah labaih 162km. Hu mbaok labaih 30 radaih saong 100 D.N mai meng Ban raya HCM saong dom tỉnh, ban dalam bhum taneran karaong Cuu Long. Ini lac hu tour dulich Caravan praong abih meng dahlau mai tal ini dalam tỉnh An Giang. Ini lac bruk ngak dulich hu rilo tuai damuai sangka, palih ruah saong dak harei dak jeng bruk bhain randap birau.

Klau taneh ia Mỹ, Japon saong Hàn Quốc ndom lac meda ngak khang oh ka bhian mbohmeyah Triều Tiên peih bruk ngak iek bom hạt nhân ka 7 di drei. Hadei di tuk Triều Tiên ngak iek, Mỹ, Hàn haong Japon duah jalan cagar veik meng dom panuac ndom atau pasram mesruh, saong bruk nan daok ngak ka Triều Tiên hu jei piah ngak iek gac. Bilan 9 thun ini, kapal USS Ronald Reagan di Mỹ haong dom kapal hộ tống hu pasram quân sự haong Hàn Quốc piah cagar veik bruk ngak iek tên lửa đạn đạo của Triều Tiên.

Harei 26/10, gah khik caga takai tasik Ý brei thau dalam melam, urang hu daong ka labaih 1.150 urang di cư angaok 2 kapal chap ikan di tasik Địa Trung Hải saong sraong hu 2 atau urang di cư metai. Dahlau di nan, dalam kadha ndem meyai anak QH meng tuk tagok ngak bruk  di adit dahlau, muk Giorgia Meloni - Thủ tướng birau di Ý lac brei pacang dom urang di cư mai meng châu Phi, ralo lac meng Libya, tal châu Âu. Tui Reuters, meng lavik mai Ý daok angaok jalan di cư praong di urang châu Phi  khin tame châu Âu. Yaok thun taneh ia ini taduan hu yaok pluh urang oh huac metai lahik nao tapa tasik metai ralo abih di dunya di tasik Địa Trung Hải.

Mintri Viễn thông saong Công nghệ thông tin Ai Cập brei thau, taneh ia ini hu buh labaih 2,5 tỷ USD tame dom danak dak salih kỹ thuật số, piah patagok bruk pablei tabiak negar langiu gah công nghệ thông tin haong truyền thông. CNTT haong TT mboh lac tagok 16,3% dalam thun jien padai 2021-2022 saong lac gah tagok glaong abih di Ai Cập. Urak ini Ai Cập hu 30 pasak salih bharau công nghệ, pablei tabiak negar langiu kỹ thuật số saong mek tame hu 4,9 tỷ USD dalam thun jien padai ini./.

Urang lang: M.P & Ai Nghiem