Par akaok mbang Ginum biai pataom iek veik 1 thun peih ngak Danak dak cak rok patagok bruk pandar dữ liệu ka rahra, định danh saong ngak cambaih laih điện tử pabak ka bruk salih so pakat negar tukvak 2022-2025, pamaong tal thun 2030 di Ủy ban pakat negar ka bruk salih số, peih tabiak di harei 25/12, Thủ tướng rajaei Phạm Minh Chính brei thau lac, urak ini, dalam taneh ia 266 puk palei daok kurang điện, kurang riyak internet. Kayua yau nan ye, Thủ tướng ieu kakei Mintri Cong thuong, Mintri Thong tin saong Truyen thong, Ủy ban khik ramik phun jien kanja di doanh nghiệp pataom tame pato tacei dom kapul, jabat hu pambuak tal dalam thun 2023 njauk ba dien, internet nao tal dom puk palei ini piah ka abih tih dom puk palei dalam taneh ia hu điện, riya internet, peih tabiak jalan cak rok patagok samu gauk ka yaok rahra, oh caik urang halei daok veik gah likuk.

 Mesup ini (26/12), di Hà Nội hu peih Nyaom biai Đoàn Chủ tịch UBTWMT negar Việt Nam mbang ka 15, khoá 9. Nyaom biai piah taong yaom bruk ngak Mat tran thun 2022, danak dak pambuak bruk saong yasa bruk ngak thun 2023. Kadha praong dalam thun 2022, UBMT negar Việt Nam dom pakat hu tabiak panuac ieu, daong Kadung jien "Brei ka urang kathaot" saong daong ka bhap bini dalam taneh ia njauk bala meng langik tasik, rabuk ia sua, rik daong ka bruk pacang caga jit COVID-19. Hu labaih 104 rabau labik daok di bhap bini dalam taneh ia hu peih Harei roya jum pataom abih bangsa. Rilo labik dalam negar hu jalan ngak gheih, ba mai siam lagaih, kein laba, pambak praong, peih var lisei jum pataom, brei sang jum pataom, brei pandap ka sang kan kathaot, jak ba padang ngak palei pala bahrau.

 Sở Tài Nguyên saong Môi trường Bình Thuận hu harak pathau khan UBND tỉnh  pamaong iek ka jalan ngak kadun veik 12 bilan ngan haong 43 danak dak suan hu peih ngak kayua njauk kan kandah di jit ruak COVID-19. Hadei di tuk abih tukvak kadun veik bo dom danak dak oh ba taneh tame pandar ye Sở Tài nguyên saong Môi trường pataom iek veik likau UBND tỉnh pataom mek tui adat di điểm I khoản 1 paka 64 Hukum taneh riya thun 2013.

Cty cổ phần Cảng Mỹ Tho (Tiền Giang) bahrau peih jalan radaih điện pajeng tuai ravang me-in dalam ban Mỹ Tho. Cty cổ phần Ô tô Tiền Giang jeng daok caga ba tame peih nduac 14 radaih buýt chất lượng glaong jalan Bến xe Tiền Giang - Bến xe Cần Đước (tỉnh Long An) meng harei 1/1/2023. Jalan peih nduac di dom radaih ini atah 66 km, hu pambuak pagam haong jaik abih dom jalan radaih buýt dalam tỉnh saong langiu tỉnh.

Urak ini, Bình Dương hu 12 pasak đăng kiểm. Bahrau blaoh, dom pasak đăng kiểm di TP.HCM njauk brei padeih ngak,  ngak ka rilo sruh radaih tuh mai dom pasak đăng kiểm di Bình Dương, ba tal bruk gar jalan. Dom sruh radaih tagok biak rilo, nan ye dom pasak đăng kiểm njauk pathau khan tukvak padeih taduan mek harak gar saong ieu kakei dom po radaih caong mai kiểm định ye ieu phone pagul sanya maong dahlau. Anak bruk ini, urang par akaok Sở Jalan mbak pajeng ba Bình Dương brei thau, hu harak pato tacei dom pasak đăng kiểm di pak ini paglaong bruk pasang iek, taong yaom, rami ramik veik maong ngak bruk piah langyah dom sruh radaih mai kiểm định.

Trung Quốc daok brei padeih khan brei thau hadom menuac njauk ruak COVID-19 yaok harei, bruk bo taneh ia ini hu ngak dalam jaik 3 thun tapa. Kuhria meng harei 7/12, Trung Quốc brei pacadu bruk nao mai. Rilo urang ilmau mboh lac, hadom menuac njauk ruak hu khan brei thau yaok harei yaok rabau urang lac oh njauk haong bruk biak di nyu. Hadei di 3 thun, dom menuac njauk ruak di Trung Quốc tui yaok pataom lac labaih 393.000 urang, hu labaih 5.200 urang metai.

Kadung jien dunya bahrau khan brei thau kadha piah peih veik danak dak brei masaiy ka Pakistan. Rajaei Pakistan njauk peih veik dom bruk ngak praong hu ba tabiak dalam 3 adit anak tal mayah caong peih gilac veik danak dak brei masaiy daok gar, gam tui di nan jeng ieu kakei taneh ia ini peih ngak chip dom bruk njauk ngak. Mbang hajan ia sua di Pakistan rahtabiak di bilan pandiak bahrau blaoh ngak ka labaih 1.700 urang metai, dauk labaih 1/3 mblang taneh saong ngak trun manieng bruk cak rok patagok di taneh ia ini. Hajan ia sua ngak khat lahik labaih 32 tỷ USD ka gah kinh tế di taneh ia.

Rabuk bilan brak daok rah tabiak khang di grauk taneh ia Mỹ dalam 2 harei tapa, ngak brei takik di nyu 23 urang di taneh ia ini metai. Mbang rabuk khang oh ka bhian mboh nyu pacang cakak bruk nao mai di dom labik dalam bang New York. Yaok ratuh rabau baoh sang saong labik pablei salih di Mỹ oh hu điện dalam melam Noel. Ta-eng dalam harei 24/12, labaih 3.300 mbang par brei klaak, jaik 7.500 mbang par brei kadun mon par./.