Mentri Chính trị birau ba tabiak bruk brei kaoh tui hukum Cảnh cáo Ban Thường vụ Tỉnh uỷ( TVTU) Đồng Nai dom vaktu lac 2010 - 2015 saong 2015 - 2020. Ban TVTU Đồng Nai dom vaktu 2010 - 2015 saong 2015 – 2020 ngak suan nguyen tac tap trung dan chu, jalan ngak bruk; kurang haong bruk ngak, palao bruk pan kaok ba jalan; kurang bruk pasang iek, tui iek piah Ban urang jakar đảng UB bhap bini tỉnh, UB bhap bini tỉnh saong dom kapol, dom urang  ngak suan bruk ba tabiak di Đảng, hukum di Karja dalam bruk khik jien padai, đầu tư, đấu thầu, pandar taneh di dom danak dak. Dom bruk ngak suan, kurang di Ban Thường vụ Tỉnh uỷ ngak khat lahik trak, kan pasiam, khat lahik saong mbuan ba tal lahik ralo jien di karja, ngak duh hatai manuac sia, ngak trun angan je di pakat uy, karja palei.

Kadung jien bac Vừ A Dính, Kalup kapul “kayua Hoàng Sa - Trường Sa anit ranam” pambuak haong UBND tỉnh Ninh Thuận bahrau jao 150 paok jien bac ka dom anek saih bangsa takik, anek di urang taong cap ikan gaok kan kandah di dalam tỉnh. Yaok paok hu jien mbaok 1 triệu đồng saong dom pandap panda pabak ka bruk bac ta-a. Dalam dom thun tapa, tỉnh Ninh Thuận tuk halei jeng sangka tal dom sarak, abih di nyu nan lac bruk paglaong chất lượng pato pakai bhum mikva bangsa takik, bhum tapen tasik; peih ngak siam bruk salih bharau  abih gah pato magru; padang labik pato pakai siam mekre, salamat...

Harei ini 31/3 lac harei puac abih di bhap bini brei pabak khaw tin njauk pandar laik phone. Cục Viễn thông - Mentri  Thong tin saong truyen thong kakei lac: Dom laik phone njauk cakak sa gah di harei paguh, meda tame dom labik giao dich, atau eiw phon tal tổng đài di gah mạng, piah hu daong brei pabak khaw tin. Hadei di pabak ginup khaw tin, laik phone hu peih veik. Hadei di harei 15/4, meyah urang pandar laik phone oh brei pabak khaw tin di drei, meda njauk cakak abih duah gah  saong hadei harei 15/5 meda njauk mek veik sim.

 Tui yaok pataom urak ini di TPHCM daok kadaong 20.000 harak gar di rahra saong doanh nghiệp daok tavak tavaiy. Kayua yau nan ye, Phó akaok UBND TP.HCM Võ Văn Hoan ieu kakei urang jakar công chức pasang iek dom harak gar daok kadaong, parabha janih, hu jalan ngak pasiam saong brei gaok tapak rahra, doanh nghiệp piah likau ma-ah am pul mayah ngak suai damuai. Gam tui di nan, ieu kakei dom sở, dom gah quận huyện peih ngak bruk salih bahrau hành chính thun 2023 di ban raya. Dalam nan, urang dang akaok brei khang hatai, ngak catang, saneng duah jalan ngak bahrau, kayua urak ini hu mboh bruk urang dang akaok jeng oh khin ngak.

Jabat kong an chap khik ong Yang Zhong Wu, umo 47 thun, negar  Trung Quốc lac manuac pametai urang kumei ngak ke toan kong ty di phường Khánh Bình, ban sit Tân Uyên, tỉnh Bình Dương. Dahlau di nan, mong 17 tuk harei 29/3, urang ngak di kong ty mboh sa-ai Lý Thị Mai umo 30 thun metai dalam jamar.  Atah labik urang metai dua klau met hu sa mbaik to bauk darah medil lac pandap pametai manuac. Tapa pasang iek labik nan jeng yau tame iek camera, jabat pasang iek mboh urang pametai manuac lac Yang Zhong Wu  nan ye peih bruk duah, pagui mek.

Mintri Y tế Thái Lan hu ba tabiak danak dak pachreih urang Thái pandar takik saradang jang. Asal kadha di danak dak lac yaok urang oh njauk pandar tapa 25 gram atau 6 hanuai cà phê saradang yaok harei. Danak dak jak ba rahra Thái Lan takik mbang yamen hu ba tabiak hadei di sa pathau khan mboh hu rilo urang Thái pandar biak rilo saradang. Tui yaok pataom meng di thun 2017 tal 2019 brei mboh urang Thái Lan, abih di nyu nan lac dom urang dalam umo ngak bruk, pandar 2,5-2,6 tấn saradang yaok thun, samu 25 hanuai cà phê yaok harei.

Dom menuac metai hadei di bala apui khuah gilai di Philippines melam 29/3 tagok tal 30 urang. Dahlau di nan, gilai kapal pajeng 250 tuai saong urang peih gilai nao meng ban Zamboanga tal ban sit Jolo ye apuh khuah patuah glong tagok. Bala nan rah tabiak tuk rilo urang daok ndih. Rilo tuai damuai huac padau trun tasik hu gah hải quân, urang nao tasik srong tagok paklak metai. Mbiah tal ini, dom urang daong duah takik abih nyu 7 urang daok lahik saong urang metai daok tagok veik. Jabat chuc nang daok pasang iek kayua halei ba tal gilai kapal njauk apui khuah trak.

Sa đại bồi thẩm đoàn di ban New York - Mỹ hu buh phiếu brei ba tabiak kaoh tui hukum ong Donald Trump ngan haong dom duas hình sự oh hu ndem cambaih laih. Ini lac mbang camriep, sa Tổng thống Mỹ dahlau deih njauk dang anak dom duas hình sự. Ong Trump  ieu lac nan lac sa bruk kateik geik chính trị saong bruk ba tangin tame bruk pilih ruah di tanut glaong abih dalam sajarah hu ngak kayua gah Dân chủ. Dalam tuk nan, luật sư di ong Trump brei thau lac, ong Trump lac nan nhân di hukum Mỹ njauk mua chuộc saong ngak sarau kadhau. Dom nghị sỹ Cộng hòa brei thau lac, gah Dân chủ daok hu dom jalan ngak piah taong tame dom urang cagar veik chính trị di drei./.