Thiếu tướng Phan Mạnh Trường, Phaok akaok Cục Cảnh sát duah thau kol duas gah trật tự xã hội (C02), Bộ Công an brei thau, meng jhung thun 2023 saong 6 bilan akaok thun ini, bruk pablei salih menuac daok rah tabiak srau kadau di grauk dom labik taphia negar Việt Nam – Campuchia, Việt Nam – Trung Quốc saong Việt Nam – Lào. Jalan ngak di kol duas pablei salih menuac hu salih karei biak praong saong dak harei dak kan thau, yau ye palua pachot ngak payo, pilih ruah menuac nao ngak bruk di negar langiu haong yaom jien bilan glaong, min biak di nyu lac ba nao pablei ka urang mek ngak diuk, ngak kamei ma-in, ngak bruk dalam dom kapul bleik pachot di Campuchia…  

Adit blaoh, canh sat jalan mbak dalam taneh ia hu pasang iek labaih 26.960 urang peih radaih tapa ung dung Định danh negar VNeID; mek 499 harak adat peih radaih tapa điện tử, tích hợp tame VNeID. Tukvak anak tal, Canh sat jalan mbak pataom prein tame pasang iek, langyah biak catang dom urang ngak suan bruk peih radaih bo manyum alak mbia, piah ngak trun manieng dom bala rahtabiak di jalan mbak, pamaong tal bruk ngak tabiak jalan bhian randap, ilamo “manyum alak mbia lac oh peih radaih”. Langiu di nan, patui veik peih ngak jalan ba tabiak lac pacang caga, pakacah nduac radaih suan adat hukum; paglaong bruk langyah urang peih radaih oh cuk tamo bao hiem tuk ndik radaih môtô, radaih mac, radaih juak dien...

Mesup ini, HĐND tỉnh Vĩnh Long peih mbang nyaom ka 8 piah iek veik bruk peih ngak sarak 6 bilan akaok thun, gam haong nan, ba tabiak jalan ngak 6 bilan jhung thun. Di mbang nyaom, ong Bùi Văn Nghiêm, Bí thư Tỉnh ủy, akaok HĐND tỉnh Vĩnh Long caong lac dom urang HĐND patagok bruk ngak di drei, pataom tame ginum biai dom kan kandah tavak tavaiy, ba tabiak dom jalan ngak dalam dom bilan daok veik di thun ini. 6 bilan tapa, kinh tế Vĩnh Long tagok biak glaong saong tagok samu gauk di abih 3 gah lac ngak nong, ngak kong saong dịch vụ; jien mek tame kadung jien karja yam tapa tanut hu jao brei. 

Urang thac si bahrau gah Văn học Việt Nam, lac ong Nguyễn Tấn Thành (umo 87 thun) bahrau hu Sang bac Đại học Cần Thơ alin brei paok jien bac “urang praong thun hu hatai bac luac rai”. Phó Giáo sư, Tiến sĩ Trần Trung Tính, Akaok Sang bac Đại học Cần Thơ brei thau lac: hadei di 58 thun dak padang saong cak rok patagok, sang bac hu raok sa urang bac hu hatai pachreih bac biak karei, nan lac ong Nguyễn Tấn Thành. Dak karei jang veik kayua ong Thành yau dahlau deih lac sinh vien bac dom thun camriep di sang bac. Ini lac kreih camin hadah hadei ka hatai pachreih bac saong bac taa tal luac rai di urang Việt Nam.

Meng harei 29/7 tal, Cty cổ phần kapal nduac samar Phú Quốc (Phú Quốc Express) brei padeih nduac jalan TP.HCM - Côn Đảo mbiah tal tuk hu panuac khan brei thau veik. Makna di bruk brei padeih ini, lac kayua oh hu kein laba. Tui nan, kayua cảng Sài Gòn - Hiệp Phước daok atah di pasak ban raya, tuai nao tal cảng lahik rilo tukvak nan ye tuai takik nao. Kapal nduac jalan TP.HCM - Côn Đảo peih tabiak meng harei 13/5/2024. Kapal tabiak meng Cảng Sài Gòn - Hiệp Phước (Nhà Bè) 3 mbang sa adit. 

Dom urang pan akaok di Gah Hiệp ước Bắc Đại Tây Dương (NATO), saong 4 taneh ia pambuak bruk di dalam bhum Ấn Độ Dương - Thái Bình Dương (lac Nhật Bản, Hàn Quốc, Australia, saong Niu Zilan) meda hu mbaok tame nyaom biai pakat glaong pak Mỹ. Tui dom urang jakar Nhật Bản, taphia di jalan ba tabiak ka dom bruk caong ngak bahrau, dalam nan hu ndem tal bruk paglaong prein pacang caga saong răn đe, Mỹ, NATO saong 4 taneh ia pambuak gauk dalam bhum Ấn Độ Dương - Thái Bình Dương, tui kuhria meda mek hu sanya peih praong bruk pambuak gauk dalam dom gah pambuak tal an ninh, abih di nyu nan lac pacang veik dom mbang taong tame mạng, khau tin oh njauk, kong nghe bahrau ndaong tagok yau trí tuệ nhân tạo (AI).

Hukum bahrau di Indonesia brei tukvak padeih ndih tapui anek tagok tal 6 bilan, tagok jang 3 bilan duk haong dahlau daih, ngak ka po pandar urang ngak duh hatai ka năng suất saong bruk ngak di urang kamei. Nan ye, Akaok Mintri Du lịch saong Kinh tế Sáng tạo Indonesia caong padang dom labik khik uraniah pak di labik ngak bruk, dalam nan hu dom bruk palagaih ka anek mum saong iek glang anek naih, brei adat ka urang kumei daok haong anek dalam sa bilik. 50% dom urang ngak gah du lịch saong kinh tế di Indonesia lac urang kamei. Nan ye bruk brei quyền ka urang kamei gam khik caga quyền di urang ngak lac urang kamei hu brei ngak dahlau piah khik samu gauk jeng yau kein laba di bruk ngak. 

Dalam adit blaoh, Costa Rica hu 361 urang ruak njom ký sinh trùng “dòi xoắn” meng janih anek ruai xám mbang ralaow, patagok urang njauk ruak “dòi mbang ralaow” ini tagok labaih 3.000 urang dalam ka oh tal 1 thun tapa, dalam nan hu 2 urang metai. Urak ini kapul chuc nang daok samar drah ba dom urang ruak trak nao tal labik y te piah taong ruak, gam tui di nan jeng paglaong bruk pruh jru pametai anek ruai saong pametai anek ruak di rilo bhum palei dalam taneh ia. Costa Rica urak ini jeng daok pambuak haong Colombia saong Uruguay piah pacang caga janih ruak kan kandah ini.