Chreih chrai, hadah mbaok meta, khang hatai lac bruk di dom urang lin bharau, dalam harei jao-raok lin thun 2022 hu dom tỉnh, ban dalam bhum taneran kraong Cuu Long ba gauk peih ngak tuk mesup ini 16/02. Njauk caik hatai lac dom urang lin bahrau ngak harak likau tame ngak lin biak rilo.  Tuk peih bruk jao-raok dam dara tagok jalan nao ngak lin di dom tỉnh dalam bhum taneran kraong Cuu Long jeng hu mbaok dom urang lambaok Tỉnh ủy, Thường trực HĐND, UBND, UBMT negar VN tỉnh, Hội đồng Nghĩa vụ quân sự tỉnh. Tapa nan hu daong pabak prein ka dom dam dara khang hatai jia tame harei pataom nao lin, ngak bruk praong, glaong di rahra brei ka taneh ia, palei negar.

Sở Công thương TP.HCM brei thau hu ngak salah mbang pasang iek bruk ngak njauk tui hukum negar ka bruk pablei salih xăng manyek di dalam ban meng harei 11/2 tal harei 15/2. Rilo labik pablei xang menyek di TP.HCM tagok tukvak pablei piah duh ka bhap bini. Taeng Petrolimex Sài Gòn hu tagok tukvak pablei ka dom labik pablei xăng manyek di drei. Dalam taong abih 75 labik pablei xang menyek di Petrolimex dalam TP.HCM, urak ini hu 27 labik pablei luac harei melam; dom labik daok viek jeng tagok tukvak pablei suai jang meng 2-4 maong. Petrolimex sanya lac khik tani tanat bruk pablei ginup xăng manyek ka darak pasa.

Piah daong ba dom sarak di Đảng, hukum di karja nao tal bhap bini bangsa takik, tukvak tapa, bruk pambuak gauk peih bruk jak ba di bhum bhap bini bangsa takik hu dom gah dalam tỉnh Bình Thuận sangka peih ngak. mBan Dân vận Tỉnh ủy haong mBan Bangsa tỉnh bhian tui iek, pambuak bruk, pachreih ba dom jabat, dom puk palei pambuak talei rohim haong dom xã harat saong palei pablak bhap bini bangsa takik. Tal urak ini, hu 17 sở, ngành, tapon nyaom bol pan phao kraong, MT negar VN, dom kapul nyaom chính trị - xã hội pakat tỉnh khik bruk pambuak talei rohim haong 17 xã harat bhap bini bangsa takik saong 86 jabat pakat huyện pambuak talei rohim haong 37 puk, palei pablak haong bhap bini bangsa takik dalam tỉnh.

Hadei di dom harei padieh Tết thun sak rimaong 2022, urang nong di tỉnh Bình Phước daok jar var tame bilan paik amriak kalu. Yaom lac yaom pablei urak ini daok hu siam viek dut saong dom thun dahlau, daok ba mai chrieh chrai ka urang nong, min tame tukvak tabung glaong paik baoh ye rilo urang nong daok njauk kan kandah kayua kurang manuac ngak. Anak dom kan kandah di bruk kurang manuac paik, rilo baoh sang daok mek halam tauk ala gha, paik meng bạt... Tui rilo baoh sang pala amraik kalu hu ilamo rilo thun lac, mayah asar amraik kalu tuk tathak bo oh paik samu meda thu, jruh trun saong oh siam ka asar, gam haong nan nyu ngak trun bruk tamuh tagok di phun dalam tukvak hadei.

Hadei di tuk mehit lac brei padeih radaih pajeng ba njam patam baoh kraoh tabiak Lạng Sơn di harei 16/2, rilo janih baoh kayau di tỉnh Tiền Giang laik yaom. Abih di nyu nan lac baoh thanh long daok laik yaom biak khang. Baoh  thanh long ralow bhong meriah tuk Tết yaom labaih 20 rabau đồng sa kg, urak ini trun daok 3000 tal 5.000 đồng sa kg tui janih. Dalam tuk nan, jien padai buh tame pala thanh long dalam bilan pandiak thu nyu tagok glaong. Langiu di  thanh long, yaom panat, pa-ok, baoh menaih di tỉnh Tiền Giang jeng daok laik yaom, urang mai blei takik.

Dalam 24 maong tapa, Indonesia hu urang njom ruak Covid-19 glaong abih ka oh bhian mboh, yam tapa tabung glaong di mbang tamuh jit Covid-19 ka 2 kayua biến thể Delta ba mai di thun blaoh. Tui pathau khan di Mintri Y tế Indonesia, hu 57.049 urang njom Covid-19 bahrau, patagok dom urang njom di taneh ia ini jaik 5 triệu urang. Menuac metai kayua biến thể Omicron meng di tuk biến thể ini njom tame Indonesia di puac bilan 12 thun 2021 tal urak ini lac labaih 1.000 urang; 68% dalam dom urang nan ka oh hu klauk vaccine ginup, 49% lac urang praong thun saong 48% lac urang hu ruak dahlau dalam rup. Langiu di nan, uranaih saong anek naih bahrau thau nao jeng lac urang njauk bala di biến thể Omicron ngan haong 37 uranaih umo meng 1 tal 5 thun metai kayua biến thể ni.

Harei 16/2, Akaok Hội đồng Liên bang (lac Thượng viện) Nga Valentina Matviyenko hu panuac lac Moskva meda ngak taong abih dom bruk dalam prein di drei piah pacang cakak bruk mesruh gauk haong Ukraine. Brei panuac di Nhà Trắng, Tổng thống Joe Biden jeng ndom lac Mỹ halan hatian pambuak bruk haong Nga dalam taom gaok, ndom biai nao mai piah patagok bruk tani tanat saong sron mbon di châu Âu.

Sa mbang hajan, tuyết bahrau daok laik trun jaik abih dom tinh, ban di Trung Quốc. Ini lac mbang hajan saong tuyết biak praong ka 3 laik trun taneh ia ini meng di tuk akaok bilan 2 tal urak ini. Mbang hajan tuyết tui kuhria meng 16/2 tal 18/2 ni rahtabiak praong saong ngak kan kandah tal takik di nyu lac 25 tỉnh, ban saong ribuk tuyết rahtabiak dom bhum ceik glaong./.

Urang lang: Thu Thảo & M.P -16/2/2022