Piah pabak veik ka jaik 3.500 labik duh ka bruk nao mai di tuai damuai dalam tuk Tết thun sak tapai 2023, Công ty cổ phần pajeng ba jalan pasei Sài Gòn meda peih nduac veik 7 sruh radaih pui nduac meng ga Sài Gòn (TP Hồ Chí Minh) nao dom tinh gah krein negar saong gah barak. Gah jalan pasei jeng daok pandar dom sarak daong trun yaom di dom sruh radaih pui ini yau ye trun yaom ka dom urang dalam sarak kanja, tui hu thẻ khách hàng; trun 5% yaom harak vé mbang mai ka tuai blei vé mbang nao, mai. Abih di nyu nan lac, sinh viên hu trun 20% yaom harak vé.

Pambuak tal bruk Cty Việt Á, Trung tướng Tô Ân Xô, Chánh văn phòng Bộ Công an brei thau, kuhria tal urak ini, gah pasang iek, duah thau hu khởi tố saong oh brei nao halei atah ngan saong 29 bị can, jabat cảnh sát điều tra Mintri Công an peih bruk tố tụng, dalam nan hu 2/3 lac urang đảng. Gah cảnh sát pasang iek, duah thau jeng hu pacang veik tài khoản giao dịch, sổ tiết kiệm, kê biên drap ar saong khik veik yaom jien bo dom bị can nộp brei jabat điều tra lac 1.700 tỷ đồng.

Urak ini yaom hadang sú, hadang thẻ takai putih di tỉnh Trà Vinh tagok meng 5.000 - 10.000 đồng/kg dut saong dahlau deih. Tui Chi cục Kaya ikan Trà Vinh, bilan raong hadang sú, hadang thẻ takai putih thun ini, dalam tỉnh hu labaih 20.000 sang raong 2 – 3 vụ dalam thun, di mangaok danao praong jaik 30.000 ha, tagok jaik 1.400 ha dut saong thun 2021. Mbang raong hadang thun ini gaok kein lagaih di tukvak akaok thun kayua dom binah kraong praong tapen tasik hu độ mbak lagaih, urang nong caga hu dahlau bruk puh ramik ngak hacih danao raong saong pilih ruah pajaih siam piah palao raong.

Tal urak ini, urang ngak nong bhum danak dak “Ia taba Gò Công” di tỉnh Tiền Giang, hu yuak bloh padai Hè Thu saong tam drak bilan Đông Xuân. Bilan padai Hè Thu meng bloh, urang ngak nong pala jaik 23.000 ha, mek hu 5,6 tấn/ha. Kayua jien blei khak drak, jru khik caga phun pala tagok glaong, năng suất padai hu takik, yaom padai brah oh tagok. Nan ye urang ngak nong daok khang hatai salih tapa pala dom janih njam patam Viet Gap piah hu laba jang di mangaok sa mblang taneh.

Jabat Cảnh sát pasang iek Công an huyện Phú Giáo, tỉnh Bình Dương hu ngak salah harak gar payua tagok Viện kiểm sát bhap bini huyện brei tapa Sarak langyah tui hukum ka duas ngak tathuak nerak tabiak alam môi trường rahtabiak di Labik ngak sara Dương Thị Vân. Dahlau di nan, jabat công an hu duah mboh labik ini hu tuh, lam suan adat hukum labaih 2.100 tấn dalam nan hu tanyiak klaak, takhaok klaak.

Rajaei Prang hu panuac ieu taong abih dom menuac “hu ruak dalam rup atau taom gaok yaok harei haong dom urang taha” di taneh ia ini klauk pabak mbang vắc xin pacang COVID-19 tdahlau di mbang padeih lễ jaik tal. Urak ini bahrau hu 20% dom urang mbuan njaom ruak di Prang hu klauk veik mbang 2, dalam tuk jit COVID-19 daok mbuan tamuh veik srau kadau.

Sa Cty di Nhật Bản hu cak rok patagok bruk pasang iek aval ruak ung thư tuyến tụy camriep di dunya meng jalan pandar giun tròn dalam dut iek. Tui nan, mau ia ma-ik dut iek hu caik tagok dom đĩa raong cấy tế bào hu janih giun tròn. Meng khứu giác biak siam, dom sinh vật nini nyu pamaong idung nao gah dom tế bào ung thư. Nyu meda duah mboh aval ung thư njauk haong dom tế bào biak sit. Paok dut iek hu yaom meng 70.000 Yen (labaih 12 triệu VNĐ).

Ban ine Budapest di Hungary bahrau ini hu sahneng tabiak sa bruk biak karei piah gam salam uan Noel, gam patak pataom jien padai dalam tuk yaom năng lượng tagok glaong. Nan lac sa sruh radaih juak dang salabik hu caik jaik mblang bein pasak piah ngak tabiak năng lượng pabak ka dom gom trang trí phun thông Noel. Phun nyu hadah tagok tuk radaih hu juak biak khang, bruk ini nyu pachreih urang tame juak iek./.