Tui Mentri Y tế, meng harei 8/4 mbiah tal ini, dom urang njom COVID-19 birau dalam negar gam gam tagok. Ta-eng harei 13/4 hu 497 urang birau njom ruak, ini lac dom urang njom ruak glong abih kuhria meng akok thun tal ini. Urang ruak COVID-19 tagok rilo ngak ka bhap bini haduh hatai. Birau ini, angaok mang XH (Zalo) rilo kapol nyaom hu klah rabha asal kadha:  Biến thể COVID-Omicron birau: Trak jang 5 mbang biến thể Delta nan ye urang metai meda rilo jang. Langiu di nan, daok ba panuac lac: “Bruk karei jang, lac oh hu patuk, oh pandiak…”. Mentri Y tế  brei thau lac urak ini oh ka hu khaw tin ka bruk duah mboh biến thể COVID-19 birau.

Cục pato pakai, pasram megru, paglaong ilamu ka urang jakar Mban Tổ chức Trung ương pambuak bruk haong Sang bac ĐH Trà Vinh bahrau peih tal pasram paglaong ilamu sap Khmer brei ka urang jakar tui  Kết luận 39 di Mintri Chính trị. Dalam 4 bilan, dom urang bac hu pabak brei dom ilamu ka sap Khmer (pang, ndom, bac, vak) piah meda ndom biai nao mai hu meng sap Khmer. Hadei di tuk bac salah, dom urang bac hu tabiak negar langiu bac veik 4 bilan piah paglaong ilamu pandar sap negar langiu tame bruk ngak, thau dalam jang ka ilamu Khmer.

 UB bhap bini  TP.HCM hu harak payua dom sở, dom gah, karja palei brei jhul khang bruk peih jien brei ka dom danak dak di karja di Ban dalam tuk quý 1 Ban birau peih paok jien brei labaih 4%. Chủ tịch UBND TP.HCM Phan Văn Mãi hu panuac phe binh dom đơn vị peih jien zero đồng dalam quý I/2023. Tui nan eiw Sở KH - Đầu tư  dang tabiak pasang iek, ba tabiak bruk phe binh dom đơn vị  oh ka padang jalan peih ngak, pasang iek saong tui iek brei peih phun jien karja. Sở ini pataom abih dom asar kadha peih ngak, phun jien saong bruk peih brei phun jien  di dom đơn vị tui yaok bilan, pathau khan mai Ban raya dahlau di harei 20/4.

Di Sóc Trăng, dalam dom bilan akaok thun ini, hu rilo mbang glut jaleih takai kraong biak khang, rilo meng lac di dom huyện tapen kraong Hậu. Karja palei hu kakei bhap bini daok di dom labik mbuan glut jaleih brei caga dahlau, patrun khat lahik tal tanut biar di abih. Tui Chi cục Thủy lợi tỉnh Sóc Trăng, makna ba tal glut jaleih lac kayua ia ndik glaong saong ngin khang, rayak praong. Urak ini tỉnh Sóc Trăng hu panuac ieu Mintri ngak nong saong patagok palei pala daong phun jien piah pasiam bruk pacang caga glut jaleih. Anak meta, tinh brei ngak pakhang pakajap dom labik glut jaleih, ngak kè lamin tani tanat ka bhap bini nao mai hu salamat.

Urang ngak nong di huyen Bác Ái, tỉnh Ninh Thuận daok yam tame akok bilan  paik pa-ok blait( điều). Yaom lac phun pala pacang halui di taneh mbon ceik, thu lagu min phun pa-aok blait hu daong ka mikva urang Raglai  duah hu jien tame biak ralo dalam bilan thu pandiak. Langiu di nan, daok hu daong pacang taneh klak bilau, mbon ceik, patagok taneh hu glai me-om. Dalam huyen  Bác Ái hu labaih 1.490 ha taneh pala pa-ok blait. Tui tacei pato jalan salih janih phun pala, athur raong, karja palei jak ba bhap  bini iek glang saong ramik pasiam dom bein pa-ok blait, dom phun pa-ok blait taha salih tapa dom pajaih pa-ok blait pagam brei rilo baoh rilo asar. Langiu di nan, patui bruk pambuak haong dom HTX pablei pandap asar pa-oh blait, daong ka mikva paglaong jien mek tame.

Dom gah chức năng Mexico daong hu ka  209 urang di cư njauk kreik dalam sa thùng radaih pajeng pandap di mangaok 1 jalan cao tốc daok di gah meraong taneh ia Mỹ Latinh ini. Dahlau di nan, hu menuac khan brei karja palei thau tuk mehit sap hia di gah dalam thung sa sruh radaih pajeng pandap daok pataok di jalan cao tốc. Gah chức năng hu mbaok di labik nan piah daong peih talaih. Tuk peih thùng radaih nan, mboh dom menuac di cư daok gah dalam thùng biak glaih glar, trun prein yava biak trak damak. Tui Mintri Nội vụ Mexico, jaik 70% urang di cư oh hu harak gar tui rup, mai meng bhum Trung Mỹ duah jalan tame Mỹ suan adat hukum meng jalan radaih, saong brei bayar jien ka kol ba jalan takik di abih lac 4.500 USD sa urang.

Urang brei panuac di UB chau Au ( EC) hu tabiak panuac anak bruk urang di cư saong tị nạn mai chau Au meng jalan tasik dak harei dak rilo dalam dom adit jaik di ini, EC oh salih karei jalan ngak di drei di labik bhum kreh Địa Trung Hải. Tui yaok pataom di LHQ, meng bilan 1 tal bilan 3 thun ini, dom urang di cu metai tuk tapa  Địa Trung Hải glong abih kuhria meng thun 2017. Tui Gah Di cư dunya (IOM), meng thun 2014 mbiah tal ini hu abaih 20.000 urang metai di jalan di cư ini.

Mintri Y tế Indonesia khan lac taduan hu bruk daong di rajaei Mỹ saong Australia lac labaih 24.000 mbang jru Paxlovid taong ruak COVID-19. Ini lac jru pacang vius meda pandar ka dom urang ruak njauk COVID-19 meng hanjul tal mbiah saong mbuan ba tal trak. Akaok Mintri Y tế taneh ia ini ndom lac, Indonesia brei hu ginup vaccine saong jru taong ruak COVID-19 meyah dom urang ruak tagok glaong./.