Dah page 30/5, di Phủ Chủ tịch, akaok negar Võ Văn Thưởng hu taom mbaok Kapul 70 urang lambaok dom urang hu buh prein yava ka CM di tỉnh Vĩnh Long lac dom thương binh, bệnh binh, urang bhian daok guk, urang njuak jru mek kalik kruac dioxin, gauk gar liệt sỹ saong sang hu prein haong CM. Di mbang taom mbaok, akaok negar pok mayaom rilo urang hu prein haong CM saong gauk gar hu yam tapa dom pandik harao di ruak kik, kan kandah, patagok hatai kham marat dalam raidiuk, padang diukrai siam makre, ilamo di puk palei. Akaok negar caong maong lac hatai ini hu patagok veik hu khik ramik, patagok yaom glaong dalam taong abih rahra hu prein haong CM di dalam taneh ia, rik tame bruk dak padang palei Vĩnh Long saong taneh ia dak harei dak siam mekre, kaya mada.

Tui Tổng cục Thống kê, abih tih yaom pandap pablei lẻ saong jien mek tame meng bruk blei pandar dalam 5 bilan tapa tagok glaong abih duk haong dom bilan ini di dom thun meng thun 2015 mai ini saong tagok 28,3% duk haong 5 bilan akaok thun 2019 – thun dahlau di tuk hu jit Covid-19. Sangka ngak ka Darak pasar dalam taneh ia hu siam, lac sa dalam dom jalan ngak praong daong patagok veik bruk ngak tabiak pandap panda, pablei salih. Tui dom urang ilmamu, brei hu dom jalan ngak samu gauk tui iek kajap bruk rah tabiak, bruk pandap panda takik rilo yau habar saong yaom kaom dom janih pandap piah hu jalan ramik veik ka nyu lagaih, khik kaja bruk parabha pandap panda ka nyu njauk, lagaih di dom bhum palei.

Mintri pato magru brei thau lac, taong abih 6 anek saih Việt Nam hu mbaok tame pilih ruah pakacah jai Olympic Tin học Châu Á Thái Bình Dương thun 2023 jeng mek hu huy chương, dalam nan hu 4 Huy chương praik saong 2 Huy chương ban.  Dalam abih tih 1471 anek saih hu mbaok tame pakacah hu 95 anek saih mek hu jai. Kapul Việt Nam hu 6 anek saih hu mbaok tame dak padang jai jeng mek hu Huy chương, meblah mek hu abih tih. Tui jalan dak padang huy chương, Việt Nam dang ka 9. Bruk ini brei mboh bruk kham marat di anek saih, gru pato, sang bac saong di gah patao magru dalam pato naih, bac siam.

Tui Mintri ngak nong saong patagok palei pala, Trung Quốc hu pasang iek brei pabak tame 47 mã bhum pala saong 18 mã labik tame paok piah blei durian meng Việt Nam. Trung Quốc lac darak pasar blei durian praong abih di dunya, blei janih baoh ini meng Việt Nam di thun 2022 hadei di tuk pasang iek brei angan 51 mã bhum pala, urak ini mã bhum pala hu tagok  293 gam haong 115 mã labik tame papak

Dalam bilan 5 ini, Bình Thuận hu raok labaih 800.000 urang, tagok labaih 66% dut saong tukvak ini thun 2022. Nan ye, meng akaok thun tal urak ini, dalam tinh, tui kuhria daok hu labaih 3 triệu 6 rituh urang, tagok jaik 2 mbang dut saong tukvak ini thun 2022. Ong Bùi Thế Nhân, Yam ndok Sở Ilamo thể thao saong du lịch tỉnh Bình Thuận brei thau lac, sa dalam dom makna ngak ka tuai du lịch mai tal pak ini tagok khang lac kayua 2 danak dak jalan cao tốc Phan Thiết - Dầu Giây saong Vĩnh Hảo - Phan Thiết hu brei nduac radaih, tapa nan daong katut veik tukvak saong panak veik jalan meng TPHCM saong dom tinh, ban gah maraong mai tal Bình Thuận.

Mesup ini (30/5), tên lửa đẩy Trường Chinh 16 ba tui kapal haoh vũ trụ hu menuac peih Thần Châu 16 di Trung Quốc hu cuh tagok di pasak cuh vệ tinh Tửu Tuyền di taneh ia ini. Dalam tukvak ngak bruk saong daok di mangaok bilai vũ trụ, dom urang dalam kapul Thần Châu 16 meda peih ngak dom bruk di gah langiu bilai vũ trụ, peih ngak dom bruk ngak iek khoa học không gian saong ngak dom bruk karei karei yau caik pagam, pasiam veik dom jamriak mac moc gah dalam saong gah langiu bilai vũ trụ. Ini lac bruk cuh ka 29 kuhria meng di tuk danak dak hu peih tabiak ngak, saong jeng lac mbang par ka 475 di dom tên lửa đẩy Trường Chinh.

Akaok Mintri Rami ramik dom bruk Chính trị, Sarak saong An ninh Indonesia brei thau lac, caong langyah dalam taneh ia bruk palao urang peih ahaok negar Niu Di-lân, daok njauk kol phiến quân Bol lin peih paha negar Tây Papua (TPNPB)  cap khik ngak con tin rilo bilan tapa. Langyah makna ka bruk ini, Indonesia brei thau lac, bruk hu mbaok tame di dom kapul dunya meda ngak ka bruk catang tagok jang. Rajaei Indonesia jeng hu payua Kapul đặc nhiệm piah peih bruk daong ba tabiak urang peih ahaok. Min, kham marat ngak tal urak ini ka oh hu hagait.

Hadei di tuk khan lac mek hu jayah dalam mbang 2 di bruk pilih ruah Tổng thống Thổ Nhĩ Kỳ, ông Erdogan hu panuac ieu bhap bini jum pataom gauk khang kajap. Ndom ka jayah di ong Erdogan, dom urang tui iek chính trị dunya mboh lac, caong khin praong di urang Thổ Nhĩ Kỳ tuk ini, lac yam tapa dom kan kandah dalam raidiuk kayua srau kadau kinh tế saong khat lahik praong hadei di bala megei baoh taneh di bilan 2 meng blaoh. Tổng thống Erdogan hu taong yaom glaong kayua hu dom rik daong praong ka bruk patagok di Thổ Nhĩ Kỳ, paglaong angan je saong labik dang di taneh ia ini mangaok dunya./.