Kapul urang ngak hu angan je di ban raya Hồ Chí Minh

Dah page harei 2-6, di Quảng trường Ba Đình (Hà Nội), Liên đoàn lao động ban raya Hồ Chí Minh hu peih bruk brei ka kapul urang ngak hu angan je di ban raya tame Lăng ravang Chủ tịch Hồ Chí Minh. Nan lac dom urang taduan hu Giải thưởng Tôn Đức Thắng mbang ka 21 thun 2021; urang mek hu giải thưởng 28-7 thun 2021; urang mek hu harak Lao động sáng tạo, hu angan je dalam danak dak 75.000 bruk hadah krah duah jalan yam tapa kan kandah, cak rok patagok, urang ngak kham marat yam tapa kan kandah, duah jalan ngak bahrau, kham marat jayah jit praong Covid-19.

Dom urang njauk ruak pandiak tabiak drah dalam tỉnh Bình Dương gam gam tagok. Kuhria meng akaok thun tal ni, Bình Dương hu labaih 3.600 urang njauk ruak pandiak tabiak drah song 7 urang metai. Piah trun dom urang njom ruak, gah Y tế Bình Dương hu pambuak bruk song mintri Y tế, Viện Pasteur TP.HCM nao tal dom boh sang hu urang metai piah pasang iek labik taom dar. Gam song nan, tuk hu urang ruak, dom sang iek ruak ba tagok hệ thống phần mềm song dom labik y tế samar drah langyah sruh jit. Langiu di nan, dom tỉnh ban peih bruk pametai lăng quăng, pruh jru hóa chất di dom labik hu sruh jit.

UBND huyện Long Thành, tỉnh Đồng Nai daok jao jaik 70 ha taneh duh ka bruk ngak mblang kapar haoh Long Thành tukvak 1. Tal urak ini, bruk jao taneh ngak hu labaih 91%. Urang par akaok huyện Long Thành brei thau, mblang kapar haoh Long Thành njauk pataom mek mblang taneh biak praong, saong bruk mek taneh nan tamuh tabiak rilo kan kandah. Piah ka bhap bini chreih hatai jao taneh, karja hu pathau khan, jak ba, gam haong nan jeng ba tabiak sarak brei daok tạm, daong bhap bini duah labik daok dalam tukvak cang nao daok di labik bahrau.

Vĩnh Long lac labik hu taneh pala bei java prong abih di bhum taneran krong CL, ngan haong labaih 13.000 ha, rilo abih lac di huyện Bình Tân. Yaok thun, Vĩnh Long hu pablei bei java biak prong ka drak pasa dalam saong langiu negar. Min, dom thun jiak di ni yaom bei trun biak beir . Kayua pala ngak khat lahik rilo thun, urak ni, hu labaih 80% mblang taneh pala bei di pak ni hu urang nong salih jeng bein phun boh kayau yau panat thái, durian, kruac, kruac bung song dom janih njam patam karei karei. Dom harei tapa, dom gah chức năng tỉnh Vĩnh Long peih bruk pathua khan jak ba bhap bini jhui pala phun karei, kayua ni lac bhum pala bei java di tỉnh

Ndem ka bruk sa uranaih likei 18 bilan metai, medil lac kayua njauk taong paoh, rahtabiak di xã Mỹ Yên, huyện Bến Lức, Long An, urak ini, công an hu cap khik 2 urang piah pasang iek ngak brei cambaih bruk. Labaih sa thun dahlau, saai T saong saai T.H klaak gauk, saai T raong anek kumei, anek sit daok haong amaik. Saai H daok ngak công nhân saong daok dalam sang trọ haong sa urang likei karei. Saai T medil lac anek di drei njauk taong paoh, nan ye hu panuac ieu jabat chức năng ngak brei cambaih bruk.

Liên hợp quốc pok meyaom mbang par hu peih meng ban ine Sanaa di Yemen tal Ai Cập dalam harei 1/6. Ni lac, mbang par pajeng tuai camereip pambuak 2 labik ni, kuhria meng di thun 2016, jeng lac jalan nao bahrau di abih dalam ngak tui thỏa thuận padeih cuh dui atah 2 bilan tapa. Ni lac mbang par ka 7 meng di tuk adat padeih cuk kayua Liên hợp quốc dang tabiak pambuak bruk ginum biai ba brei njauk gauk, hu pandar meng bilan 4 meng blaoh. Bruk mesruh di Yemen ngak ka labaih 150.000 urang metai song yaok triệu urang njauk klak sang danaok nao daok di labik karei, ba tal bruk khủng hoảng nhân đạo trak damak abih di dunya .

Rajaei Tổng thống Mỹ Joe Biden hu klaak rilo bruk pacang patakik brei par ngan haong Cuba piah daong ka bhap bini Cuba saong kayua kein laba di sarak đối ngoại di Mỹ. Hu thau, karja Tổng thống Mỹ dahlau daih lac Donal Trump hu ba tabiak dom bruk pacang patakik par ngan haong Cuba piah patagok bruk ngak brei kan kandah kinh tế rajaei Cuba.

Dom urang ilamu Australia hu panuac lac, negar ni dok dang anak cuang kandah meng sa janih hareik thải bahrau bak môi trường, nan lac pataih pacang mbaok song dom bộ dut iek samar. Meng di tuk cuk pataih pacang mbaok jeng bhian randap, hareik thải pataih pacang mbaok patagok rilo. Bruk njauk duh hatai nan lac bruk ngak veik dom janih hareik thải bahrau ni, oh ka duah hu jalan, kayua nyu hu ba tame angan hareik thải sinh học kan kandah. Dom jabat chức năng Australia dok kuhria tal bruk brei pandar veik dom pataih pacang mbaok pandar blaoh ka dom bruk ngak karei./.

Urang lang: Hani Pha & Thu Thao – 02/06