Dah page harei ini (30/8), di ban ine Hà Nội, Thủ tướng Rajaei Phạm Minh Chính hu mbaok peih pakah tatua Vĩnh Tuy – tukvak ka 2.  Tatua Vĩnh Tuy (dalam nan hu gam tatua tukvak ka 1 ) lac tatua praong abih di ban ine Hà Nội haong 8 jalan radaih ô tô (40m). Meng bruk ngak salah tukvak ka 2, Tatua Vĩnh Tuy, rik tame pabak ka bruk nao mai dak harei dak tagok samar di Pasak ban ine haong dom bhum gah barak saong Đông Bắc di ban ine; trun trak damak ka dom jalan praong di ban ine, abih di nyu nan lac trun manieng dom sruh radaih nduac di mangaok tatua Thanh Trì saong jalan Vành đai 3; dak harei dak pasiam jalan mbak nao mai di ban ine Hà Nội tui bruk ba tabiak.

Pamaong tal pahadar 78 thun harei negar taneh ia Cộng hòa xã hội chủ nghĩa Việt Nam, salam uan pahadar 20 thun harei padang tỉnh Hậu Giang, harei 29/8, Tỉnh đoàn Hậu Giang peih nyaom pakacah “jalan sahneng Hồ Chí Minh – pui hadah pasang jalan ka dam dara Hậu Giang” thun 2023. Nyaom pakacah dui pachreih hu jaik 4.200 urang tame pakacah tui jalan trắc nghiệm saong javap jalei dom tangi sua. Piah patui jalan jhul tagok khang saong paglaong bruk bac megru saong ngak tui jalan hadah krah siam mekre di Chủ tịch Hồ Chí Minh, ong Trần Văn Huyến, Phó Bí thư Thường trực tỉnh ủy Hậu Giang caong dom pakat urang jakar Đoàn ngak brei cambaih laih asal bac megru saong ngak tui jalan di Chủ tịch Hồ Chí Minh dalam bruk ngak yaok harei, ngak jeng bruk pakacah gauk praong, dalam, chreih chrai, rik daong tame bruk dak padang palei negar Hậu Giang siam mekre, kaya meda. 

Tỉnh ủy Đồng Tháp bahrau peih mbang taom gaok, ndem mayai nao mai haong urang jakar, kapul urang nong di tỉnh Đồng Tháp. Di mbang taom gaok hu 26 panuac pathau khan di urang nong saong urang jakar dalam kapul, dalam nan hu rilo panuac caong maong jalan langyah piah daong ka urang nong pambuak gauk duah jalan pablei tabiak piah cak rok patagok saong peih praong bruk ngak padai tui jalan hacih; jalan langyah piah ngak patakik dom kan kandah di bruk biến đổi khí hậu tal bruk pala drak; patakik bruk pablei salih pandap panda kaya nong ja; daong pablei tabiak negar langiu bingu kiểng... Tukvak ini, tỉnh Đồng Tháp jeng alin labaih 80 baoh phone par tangin ka urang nong naih joi piah daong ka urang nong pandar bruk salih so ngak nong.

Dalam thun bac bahrau 2023 - 2024 ini, tỉnh Tây Ninh kurang 1.350 gru pato dom pakat bac. Piah langyah bruk ini, Sở Pato Megru hu likau UBND tỉnh pok tagok HĐND tỉnh patabiak sarak karei daong ka SV tame gah sư phạm. Gam haong nan, brei jhul khang bruk pato pakai, pathau khan, piah paglaong labik dang di dom gru pato, ba jalan bac bruk ngak ka anek saih piah ka dom adei tui bac gah Sư phạm, blaoh mai ngak bruk di palei. Tỉnh brei daong siam di abih ka gru pato sahanang hatai tuk mai pato, abih di nyu lac di bhum atah bayah, bhum tapen negar. 

Melam 29-8, di Miuyim TPHCM, Ban Thường vụ Kapul gah Dân - Chính - Đảng TPHCM hu peih danak dak ba drei tame “daong apui anit ranam” saong pok mayaom dom manuac urang mek hu Jai thuong văn nghệ sĩ, huấn luyện viên, vận động viên ranaih angan je di ban raya thun 2023. Văn nghệ sĩ, huấn luyện viên, vận động viên ranaih hu pok mayaom mbang ini oh lac biak naih dalam bruk parang iek saong pakacah, rilo kreih camin văn nghệ sĩ, huấn luyện viên, vận động viên ranaih hu halain hatain hu mbaok tame dom bruk ngak pahla, pabak ka rahra, hu mbaok tame bruk pacang caga jit ruak Covid-19; yaom lac daok di labik ngak bruk halei jeng hu saong daok lac dom bol lin di dalam gah ilamo, thể thao.

Dalam 6 bilan tapa, Trung Quốc hu langyah labaih 36.000 bruk tham nhũng mbang tame kein laba di bhap bini. UB pasang iek Kỷ luật TW Đảng Cộng sản Trung Quốc sanya tah klaak abih dom bruk mboh lac tham nhũng, tiêu cực di puk palei dalam dom gah yau bruk ngak saong padang mbang ngui, pato megru saong y tế, khik caga alam langik tasik, salamat ngak bruk, salamat pandap mbang menyum saong jru tavao…. Jabat pacang tham nhũng dang akaok Trung Quốc jeng ndom tal bruk njauk pasang iek catang bruk praong ngak kan kandah tal jalan ngak mbang di rahra. 

Tòa án France hu kaoh duas labaih 2.000 urang hu pambuak tal dom mbang trun jalan taong paoh gauk dalam taneh ia meng puac bilan 6 blaoh. Pathau khan di mangaok papar sap RTL di France, akaok Mintri Tư pháp negar ini daok ieu dom thẩm phán hu dom bruk ngak “samar drah, khang hatai saong njauk gauk” anak bruk trun jalan taong paoh gauk biak trak damak tamuh tabiak di dom ban pak France meng di thun 2005. Dom mbang trun jalan hu ngak ka labaih 20 baoh sang di jabat tư pháp di rilo ban njauk taong tayah, tui kuhria ngak khat lahik 5 triệu euro (lac labaih 5,4 triệu USD).

Labaih pluh harei tapa, glai di bhum Evros, jaik ban Alexandroupoli di Hy Lạp, njauk pui mbang ralai rilo glai praong di Hy Lạp.  Pui mbang ralai abih labaih 800 km2, lac praong jang ban New York, Mỹ. Khuah glai ngak brei takik di nyu 20 urang metai . Urang jakar Hy Lạp daok huac lac meda hu rilo menuac metai jang kayua daok hu menuac gar dalam dom labik khuah. Ini hu maong lac bruk khuah glai praong abih meng dahlau mai di dom taneh ia Liên minh châu Âu.