Dah page ini (14/8), di sang Quốc hội, Ủy ban Thường vụ Quốc hội (TVQH) peih  Mbang nyaom ka 25. Di mbang nyaom ini, Ủy ban TVQH brei panuac ka rilo asal kadha hu makna praong, dalam nan Ủy ban TVQH caik tabiak sa harei ngak bruk piah peih mbang sua tangi saong javap jaloi ngan haong 2 nyaom asal kadha di gah bruk ngak di Mintri Tư pháp, Mintri ngak nong saong patagok palei pala. Dalam dah page ini, brei panuac ka bruk langyah, taduan mek panuac, ramik ngak pasiam dự thảo Hukum kaya ia (pasiam veik), Akaok Quốc hội Vương Đình Huệ brei thau lac, dalam danak dak hukum ini ia lac sa janih kaya. Dalam định nghĩa ka kaya ia hu pataom iek abih gah piah langyah dom bruk ba tabiak di kinh tế tuần hoàn. Hukum kaya ia (pasiam veik) mbang ini hu pasiam, pabak dom adat khik ramik mbaok ia, taphia di nan jeng njauk pabak dom adat ka bruk pandar ia patak pataom.

Tỉnh Đồng Nai urak ini hu 19 danak dak praong daok peih tabiak ngak, dalam nan rilo meng lac dom jalan radaih min bruk ngak daok suai damuai kayua bruk peih mbaok taneh suai damuai. Pagap yau bruk ngak jalan cao tốc Biên Hòa - Vũng Tàu, urak ini tỉnh Bà Rịa - Vũng Tàu peih hu labaih 90% mbaok taneh, min Đồng Nai bahrau peih hu 10%, ba tal suai peih ngak dom danak dak. Tỉnh Đồng Nai hu padang 5 kapul ngak bruk tui iek, tacei pato pasang iek, peih ngak hu siam bruk hu jao brei, pataom prein yava tame dahlau ka bruk peih taneh brei ka dom danak dak praong.

 Tỉnh Tiền Giang daok peih bruk buh jien tame danak dak jalan tỉnh 864 (jalan rah tui kraong Tiền) haong yaom jien buh tame ngak abih tih lac 3.262 tỉ đồng. Jalan ini hu makna biak praong dalam bruk pambuak bhum, ba kein lagaih biak praong ka jalan pablei salih, nao mai saong pajeng ba pandap panda tapa tinh, ban karei saong dalam bhum. Gam tui di nan, danak dak hu daong pambuak Tiền Giang haong dom tinh, ban karei di bhum kraong Tiền saong bhum ĐBSCL. Danak dak tui kuhria meda hu ngak salah dalam bilan 11 anak tal.

Di sang ilamu palei Tầm Phô, xã Tân Đông, huyện Tân Châu, tỉnh Tây Ninh dom harei hè ini, tal pato sap Khmer oh mek jien di gru Danh Con tuk halei jeng mehit sap bac di anek saih. Labaih 30 anek saih pakat Tiểu học dalam bhum hu jak ba mai bac, nan ye tal pato di gru Danh Con tuk halei jeng bak anek saih. Rilo thun ini mai, meng hu tal pato di gru, taong abih uranaih palei Tầm Phô praong tagok jeng thau akhar haroh Khmer, rik daong khik ramik sap ndom, akhar vak saong dom yaom glaong ilamu di bangsa.

Di Nam bộ, hajan khang di rilo labik praong meng harei ini (14/8) saong meda hu rilo jang tal harei 20/8. Abih tih ia hajan bhian hu meng 150 - 200mm, hu labik labaih 200mm sa mbang di dom tinh gah Timun saong bhum tapen tasik di dom tỉnh bhum ĐBSCL. Dom labik karei di dom tỉnh dalam bhum ĐBSCL ia hajan bhian hu meng 80 - 150mm, hu labik hu tal labaih 150mm. Dalam tuk hajan hangin meda hu rabuk, jakla, hajan patau saong hangin khang. Njauk caik hatai caga hajan khang ngak brei ia dauk di dom bhum dhaong, bhum bier di đô thị.

Ngoại trưởng 3 taneh ia Mỹ, Japon saong Hàn Quốc daok peih bruk ginum biai online dahlau di tuk peih nyaom biai pakat glaong abih di 3 gah di harei suk tal. Asal kadha ginum biai tui kuhria lac patagok bruk pambuak gauk gah kinh tế piah khik caga dom chuỗi pabak plaih dom kan kandah pambuak tal Trung Quốc saong bruk Triều Tiên, taneh ia urak ini daok jhul tagok bruk ngak hạt nhân saong tên lửa di drei tapa dom bruk ngak iek jaik di ini.

Hajan ia sua saong glut jaleih taneh di ban Tây An, tỉnh Thiểm Tây, gah Tây Bắc Trung Quốc ngak ka 21 urang metai, 6 urang lahik, dui seik 2 baoh sang, ngak tayah tayaic 3 labik saong ngak khut 21 jalan mbak nao mai, ngak ka 900 baoh sang lahik dien. 14 kapul daong duah urang njauk bala ngan haong labaih 980 urang, gam haong labaih 1.100 pandap panda saong asau nghiệp vụ hu ba mai piah peih bruk daong duah urang njauk bala. Dalam tuk nan, sa mbang hangin rabuk khang di huyện Đại Phong, ban Diêm Thành, tỉnh Giang Tô di bier harei 13/8 ngak ka takik di nyu 2 urang metai, 15 urang njauk rambuac, 283 baoh sang  khut tayah.

Karja ban ine Jakarta di Indonesia bahrau ini hu khan brei thau bruk kuhria padang 23 mblang bein bahrau piah pasiam chất lượng không khí di ban ini. Tui panuac khan di dom urang ngak praong di Jakarta, nerak tachauk alam langik tasik di Jakarta lac mai meng khí thải yau ye radaih peih nduac angaok jalan atau dom labik ngak kong jaik ban ini. Langiu di bruk padang rilo jang dom mblang bein, karja ban ine jeng daok kham merat salih dom janih radaih bus meng dom janih radaih siam jang ka alam langik tasik yau ye radaih bus điện./.