Dah page ini (18/9), di Sang Quốc hội, Ủy ban Thường vụ Quốc hội (TVQH) patui veik danak dak (mbang 2) di Nyaom biai mbang ka 26. Di dah page ini, Ủy ban TVQH brei panuac ka danak dak Hukum khik piah (pasiam veik). Jeng dalam harei ini, Ủy ban TVQH brei panuac ka danak dak Hukum peih bruk Tòa án bhap bini (pasiam veik); brei panuac ka bruk caga ka Nyaom biai ka 6 di Quốc hội. Ủy ban TVQH jeng pasang iek dom pathau khan di Rajaei, Tòa án bhap bini pakat glaong, Viện kiểm sát bhap bini pakat glaong, Pasang iek dom khau tin jien padai di kanja saong pathau khan di Tổng Thư ký Quốc hội pataom veik dom asal kadha pasang iek ka bruk peih ngak dom sarak di Quốc hội mbang XIV ka bruk pasang iek asal kadha, sua tangi saong sarak di Quốc hội ka bruk pasang iek asal kadha, sua tangi meng akaok tukvak mbang XV tal abih mbang nyaom ka 4.

Bí thư Tỉnh ủy Bình Dương Nguyễn Văn Lợi bahrau nao pasang iek tapak palei ngak sơn mài Tương Bình Hiệp, phường Tương Bình Hiệp, TP. Thủ Dầu Một. Ong Nguyễn Văn Lợi tacei pato dom gah di tỉnh saong TP.Thủ Dầu Một ba mbuan lagaih jang piah ka palei ngak sơn mài gam cakrok bruk ngak mbang, pablei salih, gam khik ramik, patagok dom ilamu pambuak haong du lịch – ravang iek. Dalam nan, sangka tal dom sarak patagok palei ngak meng kan piah ka bhap bini gam ngak, gam khik ramik saong cakrok patagok. Bí thư Tỉnh ủy Bình Dương jeng caong khin ba dom bruk ngak meng kan tame sang bac piah daong ka anek saih thau ka yaom glaong, piah ba drei tame duah thau, piah paglaong hatai sahneng saong anit dom bruk ngak meng kan.

Tui yaok pataom di Sở Lao động - Thương binh saong Xã hội tỉnh Tiền Giang, meng thun 2004 tal urak ini, dalam tinh hu 4.130 urang nao ngak bruk di dom taneh ia. Dalam nan, hu labaih 60% urang pilih ruah ngak bruk di Nhật Bản, lac labaih 2.540 urang; di Malaysia hu 913 urang, Hàn Quốc 319 urang saong 353 urang ngak bruk di dom taneh ia karei. Jaik di ini, darak pasa Nhật Bản hu rilo dam dara ngak bruk pak tỉnh Tiền Giang pilih ruah saong tut angan hu mbaok tame kayua jien mek tame tani tanat, caong pilih ruah rilo, labik ngak bruk bahrau. Bruk tabiak negar langiu daok hu tỉnh Tiền Giang iek praong. Tỉnh hu adat brei masaiy  tín chấp ka taong abih urang ngak nao ngak bruk di negar langiu tui harak pambuak bruk meng kadung jien kanja bhum palei jao tapa Gilang paraik sarak kanja.   

Urak ini, yaom cà phê di Việt Nam tagok glaong abih dalam 30 thun tapa. Tui kuhria mboh dahlau, dom bilan puac thun, tuk tame bilan paik bahrau, yaom cà phê jeng daok di tanut glaong kayua daok hu blei rilo. Yaom cà phê di Tây Nguyên urak ini meng 66.900 - 67.900 đồng/kg. Hiệp hội Cà phê - Ca cao Việt Nam brei thau, ca phê daok khik piah urak ini biak takik. Tui nan, bruk pablei cà phê tabiak negar langiu meda trun 10 - 15% kayua langik tasik oh lagaih. Min bruk pablei ca phê tabiak negar langiu meng ini tal jhung thun jeng daok hu siam kayua daok hu blei rilo, dalam tuk ca phê daok hu oh rilo. Tui kuhria mboh dahlau di Mintri ngak nong saong patagok palei pala, cà phê pablei tapa negar langiu thun ini meda hu 1,72 triệu tấn, jien mek mai hu 4,2 tỷ USD.

Harei kabroi, ban raya Hồ Chí Minh hu peih bruk brei nduac radaih di danak dak jalan nduac samar drah TP. Hồ Chí Minh - Long Thành - Dầu Giây, labik meng jalan Nguyễn Thị Định tal jalan Đỗ Xuân Hợp, phường An Phú, ban Thủ Đức atah labaih 3 km, hu dua labik jalan praong 20m, 4 jalan radaih, daok gah hanuak jalan nduac samar tui gah nao Long Thành – Dầu Giây. Bruk peih jalan nduac dua gah rik tame bruk ngak salah jalan mbak di jalan gah Timun TPHCM, daong trun manieng ka jalan nduac samar drah, radaih nduac luac ngan haong dom jalan jaik taphia yau ye Nguyễn Thị Định, Đỗ Xuân Hợp, Mai Chí Thọ, pambuak lagaih tal Vành đai 2 saong gam gam haong tanut pambuak haong An Phú.

Liên hợp quốc brei thau, kuhria tal harei 16/9, dom menuac metai kayua ia sua di Libya tagok tal 11.300 urang saong 10.100 urang daok lahik, dalam tuk dom kapul daong duah gaok rilo kan kandah piah duah dom menuac daok diuk atau sraong mek menuac metai. Dom kapul daong duah daok dang anak rilo kan kandah di ban Derna dalam bruk duah dom menuac daok gar mala dom sang jaleih. Tui khau tin di labik nan brei thau, dom jaing njuk ia khan lac duah mboh yaok pluh radaih ô tô pajeng tui dom menuac dalam sang di angaok tasik, saong brei thau lac, rilo sang kham merat duah jalan nduac tuk bahrau mboh hu ia sua, min ia sua khang dui ba seik urang trun tasik. 

Tui yaok pataom di Kapul radaih juak Trung Quốc, urak ini taneh ia ini daok hu 200 triệu sruh radaih daok hu pandar, dalam nan rilo meng lac radaih hu parabha brei. Tapa bruk yaok pataom di 8 ban praong, dalam nan hu Bắc Kinh, Quảng Châu, Thành Đô… brei mboh rahra daok di dom ban ini ndik radaih hu parabha brei saong radaih juak điện labaih 30 mbang dalam 100 mbang dom urang ini nao ma-in, daong ngak trun labaih 10.000 tấn tathuak nerak carbon yaok harei. Dahlau di nan, sa mbang pasang iek brei mboh labaih sa mateh urang pandar di Trung Quốc pilih ruah radaih parabha brei lac piah daong khik caga alam môi trường, pasram prein yava saong kayua oh khin nao takai; sa binah pak rahra pilih ruah radaih juak kayua yaom lagaih jang.

Jabat UB Y tế negar Thái Lan brei thau, bruk ndih tapui di Thái Lan trun gam gam dalam dom thun tapa saong daok di tanut lac labaih 502.100 uranaih menek tabiak dalam thun 2022. Thái Lan hu jeng xã hội daok taha nao abih gah haong dom menuac umo labaih 60 thun hu labaih 20% menuac sia dalam taneh ia. Tui nan, Thái Lan meda jeng xã hội taha di abih dalam 5 thun tal saong tal thun 2036, dom menuac umo labaih 60 thun tui kuhria mboh lac labaih 30% menuac sia dalam taneh ia. Bruk ndih tapui takik daok ngak kan kandah praong tal dom gah KTXH saong prein yava di Thái Lan, ngak patrun prein meriak gauk di nền kinh tế. Langiu di nan, naong trak gah phúc lợi xã hội ka urang praong thun jeng dak harei dak tagok./.