Dah page ini (19/4), di TP.HCM hu peih tabiak dom bruk ngak camriep pachreih tui Harei tapuk saong ilamo puac tapuk Việt Nam 2023. Thun ini dom danak dak hu peih praong di 15 quận, huyện saong ban Thủ Đức piah daong pambak tabiak hatai anit ranam bruk puac tapuk tal yaok rahra. Peih mbaok ka labaih 80 bruk pachreih tui Harei tapuk saong ilamo puac tapuk Việt Nam thun 2023 di TP.HCM lac danak dak taom gaok ndom biai nao mai haong urang roh duah Nguyễn Đình Tư ngan haong dom baoh tapuk “Gia Định - Sài Gòn – ban raya Hồ Chí Minh”. Harei tapuk saong ilamo puac tapuk Việt Nam thun ini di ban raya pambuak haong bruk jhul khang dom bruk salih số, tapa bruk rami ramik labik ka dom kapul tapuk meda yaih khan tapuk bahrau piah ka urang puac tabuk hu thau. Harei tapuk saong ilamo puac tapuk Việt Nam di TP.HCM hu peih tabiak meng ini tal harei 23/4.

Dhar pajeng ba jalan pasei Sài Gòn brei thau, ga Sài Gòn pablei blaoh hu labaih 60.000 harak vé radaih pui tuk lễ 30/4, glaong jang tukvak ini thun blaoh 10%. Piah duh ka bruk nao mai di bhap bini dalam tuk padeih 30/4, 1/5, langiu dom radaih pui peih gam gam yaok harei yau ye SE1/2, SE3/4, SE5/6, SE7/8, SE21/22, SNT1/2, SPT1/2, dalam dom harei meng 27/4 tal 3/5/2023, Cty Cổ phần Pajeng ba jalan pasei Sài Gòn brei peih rilo jang 56 mbang radaih pui nao mai Sài Gòn haong dom tỉnh, thành.

MBan tacei jalan pacang caga bala di langik tasik saong daong duah urang njauk bala tỉnh Tiền Giang saong tỉnh Bến Tre bahrau hu harak payua tal dom Sở, dom gah saong Mban tacei jalan pacang caga bala langik tasik saong daong duah urang njauk bala di dom huyen, labik dalam tỉnh ka bruk peih ngak dom jalan pacang caga haong hajan ribuk, hangin khang phun jaleih di mbaok taneh saong hangin khang magei di mangaok tasik. Tui pathau khan di Jabat kuhria mboh dahlau bruk langik tasik, meng ini tal akaok bilan 5, meda hu dom mbang hajan salih bilan, lac tukvak salih meng hangin gió mùa Đông Bắc tapa hangin gió mùa Tây Nam bhian rahtabiak dom bruk sarau kadhau di langik tasik. Tui nan, meda gam haong tala, hajan ribuk, hajan patau. Hangin magei di mangaok tasik meda ngak khat lahik tal anek manuac, drap ar di Kanja saong rahra.

Mesup ini (19/4), Pasak pambuak bruk duah, daong bruk pajeng ba jalan tasik Việt Nam bhum III brei thau, kapal SAR 413 hu ba urang nao gilai njauk bala angaok tasik mai TP. Vũng Tàu, jao ka dom jabat chức năng piah ba tal sang iek ruak. Dahlau di nan, tuk mon 1 jala pandiak harei 18/4, Pasak pambuak bruk duah, daong bruk pajeng ba jalan tasik Việt Nam (Mintri jalan mbak pajeng ba) taduan hu panuac meng thuyền trưởng gilai NEA ELPIS, quốc tịch Bahamas brei thau lac angaok jalan meng Trung Quốc tal Singapore, tuk tal labik atah di mũi Vũng Tàu jaik 245 hải lý nao gah Đông - Đông Bắc, 1 urang angaok gilai lac Laride Jerry Abapo, quốc tịch Philippines njauk bala tuk ngak bruk. Urang njauk bala sraiy darah labik tanye haong dhung, brah labik akaok saong meta gah hanuak. Thuyền trưởng hu panuac ieu daong, ba urang njauk bala tame cấp cứu samar drah.

Jabat Cảnh sát khik ramik hành chính ka trật tự xã hội (PC06) Công an tỉnh Đồng Nai bahrau pasang iek 9 labik padang pandap, brei masaiy jien di Công ty F88 di dalam ban. Tapa pasang iek, dom labik di Công ty F88 rilo meng lac hu dom bruk ngak suan, yau ye padang ngak tapuk khik ramik, khik piah số liệu, bruk pablei salih oh njauk saong oh ginup; dom harak hợp đồng ka oh brei mboh njauk adat di công ty mbaoh tangin tame harak gar padang pandap bo bahrau hu angan haong angan mbaoh tangin tame di urang ngak. Công an mboh lac jien laba di mangaok dom hợp đồng lac 1,1% min tuk pasang iek harak gar hu pambuak tal yau ye harak gar chứng từ, pathau khan jien padai, harak hạch toán oh mboh hagait.

Sa bộ talang khủng long bạo chúa hu blei haong yaom labaih 5 triệu đô la tapa to yaom di Thụy Sỹ. Gah to yaom Cô-lơ (Koller) di Thụy Sỹ harei 18/04 pablei to yaom hu jak jeng sa bộ talang khủng long bạo chúa atah 11,6m, glaong 3,9m haong yaom 5,3 triệu đô la, biar jang duk haong yaom daok cang maong. Bộ talang ini oh lac tamo, bo hu pagam veik meng 293 candaih talang hu kuac raok di 3 labik karei gauk di Mỹ. Ini lac mbang camereip abih sa bộ talang khủng long bạo chúa hu pablei to yaom di châu Âu. Urang blei lac sa urang sưu tập tư nhân châu Âu, saong angan di urang ini oh hu khan brei thau.

MBan peih bruk po sang Campuchia di SEA Games 32 hu khan lac oh mek jien mbang, jien daok saong jien nao mai ka taong abih dom kapul thể thao hu mbaok tame Nyaom roya ini. Nan lac sa bruk ngak ka oh bhian hu. Mbang camereip abih, sa po sang di Nyaom roya thể thao bhum Đông Nam Á peih ngak yau nan. Ong Thong Khon, Phó akaok Ủy ban negar peih bruk SEA Games 32 (CAMSOC) brei thau: "Tui pato tacei di Thủ tướng Campuchia Hun Sen, Campuchia oh mek jien mbang huak, ndih daok saong jien radaih nao mai ngan haong dom kapul hu mbaok tame SEA Games 32. Taong abih dom adat hu pambuak tal tukvak daok veik meda hu khik tamo. Campuchia sanya taduan raok dom kapul thể thao dalam bhum saong tuai negar langiu dalam jumpataom, siam makre”.

Piah khik kajap an ninh, tani tanat padai brah pandap mbang, rajaei Philippines hu ba tabiak dom jalan ngak praong jhul patagok sản xuất, pamaong tal bruk eng drei pabak brah mbang dalam 4 thun tal. Mintri ngak nong Philippines brei thau, taneh ia ini pamaong tal bruk eng drei pabak taong abih dom brah mbang di thun 2027 tapa danak dak padai brah Masagana tukvak 2023 – 2028. Danak dak ini hu Philippines ba tabiak di bilan 10 thun bloh, piah patagok sản lượng brah meng bruk pabak ka urang nong dom pajaih padai hu năng suất glaong. Tapa nan, Philippines caong khin patagok bruk pabak brah di taneh ia meng 24 triệu 990 rabau tấn tagok 26 triệu 860 rabau tấn./.