Dah page ini (3/3) di jabat Rajaei, Thủ tướng Rajaei Phạm Minh Chính dang akaok mbang nyaom biai rajaei bilan 2/2023. Di mbang nyaom, Thủ tướng hu ba tabiak bruk, njauk patui veik lang talaih dom kan kandah di darak pasa taneh riya, darak pasa trái phiếu doanh nghiệp, dom kan kandah di doanh nghiep dalam bruk pambuak haong phun jien, darak pasa, patui veik jhul samar bruk ngak mbang pablei salih, ba bruk ngak ka rahra… Thủ tướng brei thau lac hatai pilih ruah bruk ngak hu makna praong, ngak njom pambak, ba siam lagaih [iah ngak dom bruk karei.

Harei 3/3, di kalan kakuh Chủ tịch Tôn Đức Thắng dalam mblang taneh pahadar Chủ tịch Tôn Đức Thắng (xã Mỹ Hòa Hưng, ban Long Xuyên), Tỉnh ủy, HĐND, UBND, Ủy ban MT negar Việt Nam tỉnh An Giang hu peih ngak biak praong prang Harei cuh gilau, pok bingu pahadar 43 thun harei lahik di Chủ tịch Tôn Đức Thắng – lac urang par akaok, urang hu angan je naih gheih di palei An Giang. Ngan haong umo 2 thun, jaik 70 thun gam ngak bruk cách mạng, 27 thun gam ngak akaok Mặt trận Liên Việt saong akaok Ủy ban Trung ương MT negar Việt Nam, labaih 10 thun ngak akaok negar, Wa Tôn hu rik prein tame luac rai di drei ka bruk cách mạng hadah krah di Đảng, rahra drei saong ayut saabat dunya.

Dalam thun 2022, Quân khu 7 hu padang ngak sang alin ka urang sarak kanja, sang mikva bangsa takik, sa agama 378 baoh sang, hu yaom labaih 33 tỷ đồng saong 57 danak dak ma-in ilamo, pahat rup dalam labik agama ngan haong yaom labaih 16 tỷ đồng. Dom urang halau janieng dom agama saong mikva hu agama di bhum Quân khu 7 hu halain hatain hu mbaok tame dom danak dak pakacah gauk anit ranam taneh ia; jak ba dom urang tui agama ngak njauk adat hukum, adat agama, cak rok patagok kinh tế, patruh eik patrun kathaot. Rilo labik rahra bhum mikva hu agama hu jeng lac labik hadah hadai ka bruk pacang caga tệ nạn xã hội, jeng lac dom palei ilamo, khu phố ilamo ngan haong dom bruk pambuak gauk di agama saong raidiuk biak siam lagaih.

Thun 2022, tỉnh Bình Dương hu 610 kapul, doanh nghiệp padeih ngak, yah klaak, lahik abih, po klaak nduac, tavak saiy bảo hiểm labaih 618 tỷ đồng. Bảo hiểm xã hội (BHXH) Bình Dương meda pambuak haong jabat Công an daa dom japuk suai kak jien bảo hiểm xã hội tagok ngak bruk piah jhul samar bruk kakei dom kapul ngak njauk adat hukum. Tui amuk Lê Minh Lý, Yam ndok BHXH Bình Dương, tavak saiy ngak kan kandah tal urang ngak saong jabat BHXH. Doanh nghiệp suai kak jien BHXH, dom kein lagaih di urang ngak jeng njauk kan kandah.

Công an huyện Nhơn Trạch, tỉnh Đồng Nai bahrau langyah harak pathau khan saong daok pasang iek, ngak cambaih bruk sa urang ngak kumei njauk urang khik ramik di doanh nghiệp lac urang negar langiu taong paoh. Bruk ini rahtabiak di Công ty TNHH OT Motor Vina di labik ngak kong Nhơn Trạch 6. Labaih maong 8 dah page harei 28/2, ong Seon Chang Hwa hu rahtabiak bruk camlak gauk haong saai Nguyễn Thị Anh Thư (ndih tapui thun 1991). Hadei di nan ong Seon Chang Hwa taong tame mbaok di saai Thư ngak ka saai jaleih trun haluk, blaoh ong mek takai juak tame rup saong katung mbuk di saai Thư nao labaih 1m ye hu manuac daok pak nan tame daong pacang. Bruk ini ngak ka saai Thư jaleih trun oh daok thau hagait saong hu ba tame nao cấp cứu di Sang iek ruak đa khoa bhum Long Thành. Saai Thư bahrau mai ngak bruk gilac hadei di tuk vak padeih manek, hu anit sit umo 7 bilan. 

Jabat Vũ trụ hu manuac peih di Trung Quốc brei thau lac, dom urang peih gilai Thần Châu-15 bahrau ini hu ngak salah mbang par tagok langik mbang ka 2 hadei di 3 bilan hu mbaok di mangaok bilai vũ trụ harei 30/11/2022, urang nao gam di gilai Thần Châu-15hu peih dua mbang nao takai di mangaok langik hadei di 3 bilan. Jabat Vũ trụ hu manuac peih di Trung Quốc hu brei thau lac, danak dak ngak iek ilamo di bilai vũ trụ daok hu peih ngak tui njauk jalan ba tabiak saong mek hu dom jak jeng tui tukvak.

Di mbang nyaom rami ramik negar 2023 ka bruk trun manieng bala langik tasik hu peih tabiak di harei 2/3, Tổng thống Indonesia Joko Jokowi brei thau lac, bruk huac kanda praong abih di mangaok baoh taneh lac bruk biến đổi khí hậu, lac sa makna ngak patagok biak glaong dom bala di langik tasik, oh njauk lac masuh metak atau jit praong. Kayua yau nan ye Tổng thống Jokowi ndem lac bruk pacang caga saong halain hatain pacang caga dahlau lac bruk ngak lagaih piah pacang caga haong bala di langik tasik. Di Indonesia dom bala di langik tasik mboh tagok 81% dalam labaih 1 piluh thun tapa, meng 1.945 mbang di thun 2000 tagok 3.544 mbang di thun 2022.

Labaih 2.000 urang pato hu pataom mbaok di ban Thessaloniki di gah barak Hy Lạp piah trun jalan tuk kanja negar ini hu brei thau bruk ngak di drei dalam tuk gaok bala ginup radaih pui ngak matai manuac di harei 28/2. Tui pakat bahrau hu pathau khan, mbang bala ini hu ngak ka 57 urang metai saong takik di nyu lac 56 urang karei lahik. Bala ginuh gauk ngak ka 4 toa radaih pui camriep njauk pableik tabiak truh di jalan pasei, 2 toa karei njauk khut abih saong hu toa njauk khuah apui./.