Dah page ini (9/2), dom tinh dalam bhum ĐBSCL peih bruk taduan jao lin thun 2023. Harei jao taduan lin rah tabiak dalam katut panak min praong prang, ndung bak makna. Di tỉnh An Giang hu jao brei bruk pilih ruah 1.670 dam dara nao ngak lin saong nao ngak Công an bhap bini. Dalam nan hu labaih 12% dom lin bahrau bac tamat Đại học, cao đẳng; labaih 3% hu ilamo trung cấp; hu 6 urang đảng halain hatain tame ngak lin. Dahlau di tuk jao lin, pakat ủy, kanja dom pakat, dom mban, dom gah, kapul nyaom hu peih rilo bruk ngak chính trị, xã hội nao rivang, pachreih ba dom sang saong dom dam dara.

UB bhap bini huyen Long Thành, tỉnh Đồng Nai birau peih bruk padang ngak hạ tầng labik tái định cư xã Long Đức. Ini lac labik tái định cư akaok meti duh ka bhap bini danak dak jalan cao tốc Biên Hòa - Vũng Tàu. Piah peih ngak danak dak, Đồng Nai brei mek veik taneh praong jaik 400 ha di ban Biên Hòa saong huyện Long Thành. Dom baoh sang brei hu labik daok tái định cư di danak dak nan tagok tal labaih 2.000 baoh sang. Labik tái định cư di xã Long Đức hadei di tuk ngak salah blaoh meda pabak labik daok ka jaik 3.400 urang, sumu labaih 843 baoh sang.

Tui Mintri Ngak nong saong patagok palei pala, bruk patrun patakik tathuak ia thủy điện di gah angaok meda ngak patagok bruk njom mbak di Bhum taneran kraong Cửu Long meng urak ini tal akaok bilan 3. Piah caga kan kandah di bruk njom ia mbak tagok, Mintri hu ieu kakei dom tinh, ban dalam bhum ĐBSCL samar drah khik piah ia dalam dom kraong, ribaong, danao piah parabha, pandar dom danak dak thủy lợi lagaih piah mek ia, tani tanat bruk khik ia ginup dom ia taba pandar dalam tukvak njom ia mbak tagok saong dalam bilan thu. Abih di nyu nan lac, njauk caik hatai pabak ginup ia pandar saong ia pruh ka phun mbang baoh. 

UB bhap bini tỉnh Vĩnh Long birau mbaok tangin brei padang ngak danak dak pasiam pakajap ar krong Hai Qúy, meng jalan Phan Văn Quân tal ribong Vồn, phướng Thành Phước, ban sit Bình Minh. Danak dak hu yaom phun jien buh tame ngak abih tih labaih 47 tỷ đồng. Danak dak piah pacang glut jaleih gam haong ramik pasiam đô thị, lagaih haong bien doi khi hau, tani tanat saong patagok raidiuk ka labaih 400 baoh sang bhap bini. Tui nan, pambuak haong dom danak dak daok peih ngak piah ngak siam dom ar pacang ia dauk di phường Thành Phước.

Urang nong tỉnh Hậu Giang daok tame bilan yuak padai Đông xuân 2022-2023. Mikva urang nong biak uan tabuan tuk padai mek hu năng suất glaong saong pablei hu yaom. Urak ini, yaom padai that pablei di mblang hamu meng 6.600-7.500 đồng/kg, tui janih padai, tagok meng 500-1.000 đồng/kg dut saong vụ Đông xuân thun blaoh. Yaom padai Đông xuân akaok vụ daok di tanut glaong abih kayua bruk pablei tabiak negat langiu brah di Việt Nam hu rilo siam lagaih, dalam nan hu bruk Trung Quốc peih pabah mbang ngak ka pablei brah tabiak negar langiu tagok khang.

Tui yaok pataom birau abih, urang metai dalm mbang megei baoh taneh khang di harei 6/2 meng blaoh pak di Thổ Nhĩ Kỳ saong Syria tagok tal jaik 15.400 urang. Rajaei Thổ Nhĩ Kỳ kuhria mboh lac abih 1 thun piah padang ngak sang daok ka dom urang lahik sang danaok di 10 tỉnh kayua megei baoh taneh. Dalam tuk nan, rilo taneh ia saong dom kapol nyaom dunya daok oh padeih ba dom kapol nyaom mai daong jneg yau payua pandap mai ka dom labik gaok kan kandah kayua megei baoh taneh di Thổ Nhĩ Kỳ saong Syria.

Tui báo Yonhap di Hàn Quốc, melam kabroi (08/02), Triều Tiên hu peih bruk duyệt binh praong abih di Quảng trường Kim Nhật Thành di ban ine Bình Nhưỡng piah pahadar 75 thun harei padang Quân đội Bhap bini Triều Tiên. Triều Tiên hu ilamo meng kan lac pandar dom mbang duyệt binh piah pahadar dom harei hu makna praong di taneh ia, gam tui di nan jeng parang iek dom hệ thống phao ndao bahrau abih piah brei mboh bruk hu mbaok quân sự di drei dalam bhum.

Cảnh sát New Zealand birau chap hu labaih 3,5 tấn matúy theik ndon di tasik Thái Bình Dương. Cảnh sát medil lac bruk nan kayua sa nyaom pablei salih dauk matuy dunya meng Nam Mỹ palao di tasik piah ba tapa tasik Thái Bình Dương. Tui Yam ndoc Cơ quan Hải quan New Zealand, dalam tuk raidiuk tani tanat gilac veik hadei jit ruak praong COVID-19, tukvak jaik ini, dom kapol nyaom pablei salih matuy dunya daok jhul khang bruk pablei salih di Nam Thái Bình Dương. Khol nyu bhian ngak lac kapal taong ikan saong palao pandap dreih dom phao ndon di dom tọa độ tukvak brei thau dahlau./.