Dah page ini, di bilik ginum biai Diên Hồng, Sang Quốc hội hu peih mbak mbang nyaom  ka 6, Quốc hội mbang 15. Hu mbaok tuk peih mbang nyaom hu Tổng Bí thư Nguyễn Phú Trọng; Tổng Bí thư dahlau deih ong Nông Đức Mạnh; Akaok negar Võ Văn Thưởng; akaok negar dahlau deih ong Nguyễn Xuân Phúc; Thủ tướng Rajaei ong Phạm Minh Chính; Thủ tướng Rajaei dahlau deih ong Nguyễn Tấn Dũng; Akaok Quốc hội dahlau deih ong Nguyễn Văn An, Nguyễn Sinh Hùng, Nguyễn Thị Kim Ngân. Akaok Quốc hội Vương Đình Huệ pan akaok mbang peih mbaok mbang nyaom. Mbang nyaom ini hu peih tabiak dalam 22 harei, parabha jeng dua mbang, Quốc hội meda pasang iek, brei ngak rilo asal kadha hu makna di gah kinh tế - xã hội, di bruk dak padang hukum. Jeng di mbang nyaom ini, Quốc hội meda peih bruk mek phieu “tín nhiệm” ngan haong dom urang ngak praong kayua Quốc hội pok tagok atau mbaoh tangin brei ngak. 

Meng dom phun jien di TW saong di puk palei, tỉnh Bình Thuận hu buh tabiak labaih 1.200 tỷ đồng padang ngak dom bruk duh ka patagok KT-XH bhum urang DTTS; hu pabak brei labaih 15.000 ha taneh pala drak (kuhria rah tapa 1 ha sa baoh sang); padang labaih 5.540 baoh sang ka urang DTTS; daong jien laba ka jaik 3.200 baoh sang mesraiy labaih 22 tỷ đồng; Bruk bac ta-a, iek ruak kik bhum DTTS hu iek glang siam jang. Tal urak ini, 98% baoh sang hu pandar điện negar; labaih 88% sang hu pandar ia hacih, sa-at, taong abih dom xã dalam bhum DTTS hu jalan radaih ô tô hu tuh nhựa nao tal pasak xã, hu sang ilamu, hu pabak riyak tivi, riyak rayo, taong abih dom puk palei hu sang ginum biai palei 

Thun bac ini dalam tỉnh Đắk Nông hu labaih 10.000 anek saih hu daong brah dalam  học kỳ I. Tukvak hu daong lac 5 bilan, saong yaom daong lac 15kg sa bilan sa adei. Urang hu taduan bruk daong lac dom anek saih bac pakat Tiểu học, Trung học cơ sở di dom sang bac bangsa gam bac gam daok, anek saih saong amaik ame atau urang iek glang hu hộ khẩu daok di dom xã bhum III, puk palei biak kan kandah bhum bangsa saong bhum ceik. Abih tih dom brah hu daong lac jaik 775 tấn. Dalam nan, dua huyen kan kathaot di tỉnh Đắk Nông lac Đắk G’long saong Tuy Đức hu dom anek saih hu daong rilo abih lac labaih 8.400 adei, abih tih brah daong lac labaih 630 tấn, meblah labaih 80% dom anek saih saong dom brah hu daong di mbang ini.

Tỉnh Gia Lai bahrau hu 1 urang metai kayua pandiak tabiak darah. Ini lac menuac metai ka 2 kayua pandiak tabiak darah kuhria meng akaok thun tal ini di Gia Lai. Urang ruak meta lac sa-ai Lê Vi Na, ndih tapui thun 2001, daok di palei Tư Lương, xã Tân An, huyện Đak Pơ. Harei 5/10, urang tamuh ruah saong dut iek mboh lac ruak pandiak tabiak darah Dengue taong ruak di sang. Harei 10/10, urang ruak tame Pasak Y tế ban sit An Khê. Harei 11/10, urang ruak hu ba tagok Sang iek ruak Đa khoa tỉnh Bình Định taong ruak min oh cadu saong dut iek mboh lac: njauk ruak pandiak tabiak darah trak Dengue trak saong metai di harei 12/10.

Melam blaoh, Công an ban sit Bến Cát, tỉnh Bình Dương hu cap khik chip Trần Văn Dương (umo 27 thun, palei daok di Đồng Nai) ka duas “palai pajoa drap ar”saong “co klaik drap ar”. Tui duah thau oh ka ginup abih, kayua oh hu bruk ngak, Dương saneng tal bruk jar kreih radaih ô tô piah co klaik drap ar, mek jien cai pandar. Dương duah dom sruh radaih ô tô caik langiu jalan blaoh jar kreih mek drap ar. Tui nan, Duong hu pandar búa jar kreih di 8 sruh radaih ô tô saong mek nao 20 blah harak vé số njauk jai Nhat, gam haong drap ar hu yaom labaih 50 triệu đồng. Di jabat công an, Duong hu taduan duas. Urak ini bruk daok hu Công an ban sit Bến Cát, tỉnh Bình Dương  pasang iek ngak brei cambaih laih.

Mintri Ngoại giao Mỹ melam blaoh (22/10) hu pachreih urang Mỹ tabiak truh Lebanon chip kayua an ninh kan thau dahlau lac yau habar. Dom urang halei khin daok veik Lebanon ye brei hu jalan caga dahlau ka dom bruk samar drah. Jeng dalam harei 22.10, Mintri Ngoại giao Mỹ jeng hu panuac kakei rahra drei oh nao tal Iraq hadei di dom mbang taong tame lin saong dom menuac ngak bruk ka rajaei Mỹ dalam bhum. Mỹ hu patagok bruk hu mbaok di lin tasik di Trung Đông dalam tukvak tapa, dalam nan hu dom sruh kapal praong mblang kapal haoh, dom gilai pacang khik saong jaik 2 rabau lin tasik taong angaok thu. Mỹ jeng hu ba tabiak pandar hệ thống phòng thủ tên lửa dhi glaong tukvak puac (THAAD) jeng yau dom tiểu đoàn tên lửa Patriot tal dom labik dalam bhum piah patagok bruk khik caga dom lin Mỹ di Trung Đông.

Melam kabroi (22-10), akaok Mintri Quốc phòng Indonesia, Akaok Ndang Phong trào Indonesia Vĩ đại (Gerindra), ong Prabowo Subianto, hu khan ka bruk pilih ong Gibran Rakabuming Raka, umo 36 thun, anek likei kacua di Tổng thống urak ini ong Joko Widodo, ngak urang pambuak haong drei dalam bruk pakacah tame ngak Tổng thống di akaok thun 2024. Urang ilamu mboh lac, bruk pilih ruah anek likei kacua di Tổng thống Joko Widodo ngak urang pambuak haong drei dalam pilih ruah meda  daong ka ong Prabowo pagam pambak tame amngan je di Tổng thống piah meda mek hu bruk  pachreih tui di cử tri lac yaok piluh trieu urang. Indonesia kuhria peih bruk pilih ruah Tổng thống di harei 14/12/2024. Sa urang hu mbaok tame pilih ruah njauk taduan hu dom harak pachreih tui labaih meteh piah tagok ngak Tong thong.  

Harei kabroi, Thủ tướng Australia Anthony Albanese brei thau, ong meda tapa ravang Trung Quốc meng harei 4/11 tal harei 7/11 tal piah pahadar 50 thun dua taneh ia padang talei rohim pambuak bruk. Dalam mbang ravang ini, ong meda gaok Chủ tịch Trung Quốc Tập Cận Bình haong Thủ tướng Lý Cường. Thủ tướng Australia brei thau, mbang nao, lac “sa takai yam praong piah khik ka talei pambuak bruk di 2 taneh ia  cakrok tani tanat saong kein laba”. Dalam dom mbang taom gaok dom urang dang akaok Trung Quốc, dua gah meda ginum biai rilo bruk gah kinh tế, biến đối khí hậu saong talei pambuak bruk di bhap bini dua taneh ia./.