Dah page ini, di Pasak papar sap negar, di jalan 58 Quán sứ, Hà Nội, Rayo sap ndem VN hu peih bruk pahadar Harei papar sap dunya 2023 (13/02). Ini lac mbang piah pok mayaom dom rik daong tame di papar sap ka bruk cak rok patagok di taneh ia saong rahra saong lac harei pataom piah duh ka dom urang ngak gah papar sap di dunya saong abih di nyu nan lac dom urang ngak papar sap di Việt Nam. Rilo abap tapa, papar sap jeng daok lac janih pathau khan, brei thau  samar di abih dom khau tin; rik daong paglaong ilamo, jhul samar bruk cak rok patagok di rahra. Thun ini, Harei papar sap dunya hu angan ieu lac “papar sap saong Saron mbon”, ngan haong hatai caong brei mboh bruk ngak di gah papar sap dalam jhul samar bruk pambuak gauk, klah rabha, gam haong gauk pacang veik dom bruk oh samu gauk dalam rahra, langyah dom bruk daok tavak tavaiy, meriak gauk piah pamaong tal bruk dak padang dunya saron mbon saong anit ranam gauk.  

Pambuak tal bruk khik caga rahra saong daong duah urang gaok bala dalam mbang megei baoh taneh di Thổ Nhĩ Kỳ saong Xyri, Đại sứ quán Việt Nam di Thổ Nhĩ Kỳ saong Đại sứ quán Việt Nam di Iran gam bruk Xyri brei thau lac daok pambuak bruk haong karja, dom kapul urang Việt saong dom kapul nyaom karei, bhian tui iek, duah thau bruk di rahra Việt Nam. Tal urak ini, oh ka mehit bruk urang Việt Nam metai lahik dalam mbang megei baoh taneh ini. Đại sứ quán Việt Nam dii Thổ Nhĩ Kỳ hu nao taom saong daong jien ka dom sang Việt Nam gaok bala megei baoh taneh. Saong daok tui iek, duah thau piah samar daong ka dom urang gaok bala, daong ka dom kapul tapa daong duah urang gaok bala meng taneh ia hu ba tapa daong.

Sở Ngak nong saong patagok palei pala Bình Thuận bahrau ieu kakei Chi cục Pala drak saong khik caga phun pala samar drah pasang iek veik dom bhum pala saong dom labik papaok jru tavao di dalam tỉnh piah caga siam ka bruk tut angan pablei tabiak darak pasa Trung Quốc. Gam tui di nan, pathau khan ka dom kapul, manuac urang hu caong pablei jru tavao tapa Trung Quốc ka dom adat bahrau. Tui nan, Trung Quốc meda peih bruk pasang iek veik dom bruk pasang iek ngan haong dom janih jru tavao Việt Nam pablei tapa darak pasa Trung Quốc. Gam tui di nan, peih bruk tut angan ka dom kapul ngak tabiak saong khik piah jru tavao pablei tapa Trung Quốc. Bình Thuận urak ini hu mblang taneh gilai praong, langik tasik, taneh riya siam lagaih piah pala rilo janih phun jru hu yaom angan je di dom bhum dalam tỉnh. Dalam nan hu dom janih hu yaom glaong, yau ye bimau linh chi, sâm bố chính, củ mài, đinh lăng…

Bình Dương lac labik hu pacang meng kraong Sài Gòn, kraong Đồng Nai saong 2 dhar di nyu lac kraong Thị Tính saong kraong Bé. Piah patrun tukvak nao mai, pajeng ba pandap panda haong dom tinh Đồng Nai saong Tây Ninh, UBND tỉnh Bình Dương daok ba tabiak jalan ginum biai haong haong dom tỉnh, padang ngak rilo mbaik tatua nao mai. Urak ini, langiu dom mbaik tatua daok hu, Bình Dương saong Đồng Nai daok pambuak gauk ngak 5 mbaik tatua, daok Bình Dương haong Tây Ninh ngak gac 3 mbaik tatua. Yau nan, anak tal, rah tui takai kraong Sài Gòn di dua tỉnh Bình Dương saong Tây Ninh, meng 7 - 10km meda hu sa mbaik tatua.

Jabat Thường trực mBan pato tacei pakat negar ka bruk pacang caga bala langik tasik bahrau hu Harak pathau khan payua tal Mban pato tacei pacang caga bala langik tasik saong daong duah urang njauk bala di dom tinh, ban bhum tapen tasik meng Quảng Ninh tal Kiên Giang ka bruk caga dahlau bruk pacang caga haong hangin khang di tasik. Tui khau tin di Pasak Kuhria mboh dahlau bruk langik tasik pakat negar, kayua langik laar, meng melam 13/02/2023, vịnh Bắc Bộ hangin Đông Bắc khang tagok tal pakat 6, magei pakat 7-8; bhum Bắc tasik Biển Đông (dalam nan hu bhum tasik kaoh pulao Hoàng Sa) hu hangin Đông Bắc khang pakat 6-7, magei pakat 8-9. Meng melam 14/02, bhum tasik meng Quảng Trị tal Cà Mau, bhum kreih tasik Biển Đông saong bhum tasik gah Pai bhum gah maraong Biển Đông (dalam nan bhum tasik gah Pai kaoh pulao Trường Sa) hu hangin Đông Bắc khang tagok pakat 6, hu tuk pakat 7, magei pakat 8-9.

Dalam 3 thun jaik ini, Australia daok dang anak bruk langik tasik oh lagaih La Nina. Langiu di hajan praong dui atah di rilo labik, La Nina daok dui sit veik dom takai tasik di gah Đông Nam di Australia. Dom urang ilamu di Australia bahrau mboh lac dom takai tasik di gah Đông Nam taneh ia ini nyu sit veik 20% dalam tuk hu La Nina dalam 3 thun meng blaoh kayua rilo labik glut jaleih tuk ribuk saong dom mbang rayak praong paoh tame takai tasik. Roh duah jeng brei mboh lac, dalam tuk La Nina ngak brei sit veik takai tasik gah Đông Nam Australia ye gah daih takai tasik Thái Bình Dương, dom takai tasik gah Pai di taneh ia Mỹ hu bồi đắp saong peih praong jang.

Rajaei Thái Lan bahrau ini hu brei trun veik jien je ka dom tác phẩm điện ảnh negar langiu hu ngak tabiak di Thái Lan, ngan haong jalan ba tabiak lac jhul samar dom bruk ngak phim. Urak ini, di Thái Lan biyar veik 15% jien mbaok ka yaok 50 triệu baht (1,5 triệu USD) biyar ka sa bộ phim.Tui adat bahrau hu Rajaei Thái Lan brei tapa, dom kapul ngak phim negar langiu meda hu trun yaom tal 20% dalam 100 triệu baht (3 triệu USD) biyar ka dom labik quay phim, saong meda hu trun veik 10% mayah pandar urang ngak lac Thái Lan, ngak cambaih laih ilamo Thái Lan saong quay phim di dom bhum joa tuai damuai du lịch. Harak ini di Rajaei Thái Lan hu caong lac jhul gah ngak kong điện ảnh, daong patagok jien mek tame saong prein maraik gauk, pachreih bruk patagok kinh tế, dalam tuk rilo taneh ia châu Á jeng daok ba tabiak rilo kein lagaih duh ka dom danak dak ngak phim negar langiu.

Yaok pataom ka menuac sia dunya di Liên hợp quốc brei mboh, menuac sia di Ấn Độ meda yam tapa Trung Quốc jaik 3 triệu menuac di puac thun 2023. Yau nan, Ấn Độ meda jeng taneh ia dang akaok dunya ka menuac sia dalam thun ini. Tui kuhria mboh di Liên hợp quốc, Ấn Độ yam tapa Trung Quốc ka menuac urang di bilan 4. Dua taneh ia châu Á ini meblah tal 36% menuac sia dunya di dom thun 1950. Tui dom kuhria mboh dahlau di thun 2022, Ấn Độ saong Trung Quốc meblah 35,5 – 35,6% menuac sia di dunya dalam thun 2022 saong 2023. Min di thun 2100, dua taneh ia ini tok daok meblah 22,2% meuac sia dunya min. Jeng tui dom kuhria mboh dahlau ini, menuac sia Ấn Độ urak ini jeng daok tagok saong meda tal tabung glaong di thun 2060./.