Dah page ini, di Sang Quốc hội, hu peih mbang nyaom 23 di Ủy ban Thường vụ Quốc hội (TVQH). Tui kuhria di danak dak, Ủy ban thường vụ Quốc hội pasang iek, brei panuac ka dom danak dak: Hukum dom Kapul brei masaiy (pasiam veik); Hukum taneh riya (pasiam veik); Hukum pasiam veik, pabak dom paka di Hukum tame, tabiak, nao daok di negar langiu di rahra Việt Nam saong Hukum tame, tabiak, daok di urang negar langiu di Việt Nam. Taphia di nan, Ủy ban TVQH brei panuac ka bruk caga ka mbang nyaom biai ka 5 di Quốc hội; brei panuac ka dự thảo Sarak di Quốc hội ka bruk ngak iek dom jalan ngak, dom sarak angan je cak rok patagok ban raya Hồ Chí Minh… Gam tui di nan pasang iek, brei tapa dự thảo Sarak ka bruk rami ramik dom labik hành chính pakat huyện, pakat xã dalam tukvak 2023-2030.

Biar harei 8/5, Kapul urang QH mbang XV, labik ka 9 TP.HCM hu taom gaok cử tri huyện Cần Giờ dahlau di mbang nyaom ka 5, Quốc hội mbang XV, Tapa nan, mboh lac cử tri huyện Cần Giờ biak caik hatai sangka saong hu rilo panuac ka bruk likau salih bruk pandar taneh, padang ngak sang tạm, dom bruk pambuak tal taneh glai, dom tavak tavaiy dalam cơ sở hạ tầng, bruk padang ar patau pacang glut jaleih, ngak darak pasar … Ong Phan Văn Mãi, akaok UBND TP.HCM, akaok kapul urang QH TP.HCM brei thau, meng ini tal abih bilan 6/2023, TP ngak bruk samar drah haong Cần Giờ piah iek veik taong abih dom bruk daok kandaong veik di huyện ini, bruk halei njauk likau panuac di TW, bruk halei lac bruk daok dalam tangin di TP piah hu jalan lang talaih.

Hội Chữ thập đỏ tỉnh Sóc Trăng bahrau ba tabiak Bilan pahla thun 2023 ngan haong kadha: “meng baoh hatai di yaok menuac urang kol drei, ba gauk padang rahra anit ranam”. Tapa nan, Phó Bí thư Thường trực Tỉnh ủy Sóc Trăng Hồ Thị Cẩm Đào ieu kakei: dom jabat, kapul, manuac urang, doanh nghiệp, taong abih rahra halain hatain hu mbaok tame dom bruk ngak dalam Bilan pahla, piah rik tame sa tangin haong kanja palei peih ngak jalan ngak, sarak an sinh xã hội di Đảng, Kanja. Tukvak urak ini, rilo kapul, manuac urang hu jao alin 12.000 pandap halang ia, 2.500 pa-op ia tasau tabung, 3 baoh sang saong dom pandap karei hu yaom labaih 15 tỷ đồng piah daong ka dom urang gaok kan kandah.

Tui bruk peih ngak danak dak bruk ngak negar ka patagok kinh tế-xã hội bhum bhap bini bangsa takik saong bhum ceik thun 2023 bo UBND tỉnh Trà Vinh hu patabiak blaoh, ye tỉnh meda peih ngak 9/10 danak dak. Abih tih yaom jien peih ngak lac labaih 625 tỷ đồng. Dalam nan meda daong taneh daok brei ka labaih 40 sang urang bnagsa takik, sang daok ka labaih 525 sang, salih bruk ngak ka 275 sang, buh jien ngak 2 danak dak ba ia praong, padang bharau 58 danak dak hạ tầng praong, duh ka bruk pala drak, ka raidiuk dalam bhum urang bangsa takik, pasiam, papraong 6 sang bac Phổ thông Bangsa gam bac gam daok, pasiam sang ilamu – labik thể thao dalam bhum urang bangsa takik.

Chuyển sang phần tin thế giới:

Thương vụ Việt Nam di Pakistan bahrau peih mbang yaih khan pandap panda thanh long Việt Nam di darak pasa dunya. Thanh long hu ngak chip di darak jeng 2 pandap, lac thanh long that saong ia sinh tố thanh long hu parilo urang takre manyum. Hadei di tuk peih darak pasa dunya tamat blaoh, rilo urang biak pachreih haong dom pandap thanh long Việt Nam saong pandap panda ini hu yam tame veik sa bruk ngak hu makna praong di mangaok jalan tame darak Pakistan.

Ủy ban châu Âu (EC) hu ba tabiak dom jalan taong phạt bahrau pamaong tame Nga. Meyah hu brei tapa, ini meda lac pok taong phạt ka 11 bo Liên minh châu Âu (EU) ba tabiak kateik tagok Nga kuhria meng di tuk rah tabiak bruk mesruh gauk di Ukraina di akaok thun 2022. Pok taong phat ini pataom tame bruk pacang veik dom bruk patakik pablei salih di urak ini tapa taneh ia ka 3, hadei di tuk EU mboh lac Trung Quốc, Thổ Nhĩ Kỳ, dom Tiểu vương quốc A-Rập Thống nhất (UAE), saong dom taneh ia di Trung Á lac dom taneh ia ngak suan. Langiu dom Cty Trung Quốc tame angan jhak, kayua hu dom bruk pambuak tal oh patakik veik bruk pablei salih haong Nga.

Bilan laar mai aval jang di Australia ngan haong mbang laar gam haong hangin khang saong hajan patau di bhum Đông Nam negar ini. Jabat langik tasik Australia tui kuhria lac, mbang laar ini meda dui atah tal kreih adit. Rilo mbang par hu brei padeih di Sydney hadei di tuk mblang kapar haok njauk kareik dua jalan par. Tui Cục Khí tượng Australia, mbang laar di bhum Đông Nam hu tuh mai di puac adit blaoh ngan haong nhiệt độ trun daok tanut kuhria lac mbaih dalam bilan. Ia kakuan di dah page hu kuhria lac meda dui atah tal akaok harei 10/5.

Dom menuac metai kayua ia sua saong jaleih taneh di gah timur Congo tagok tal jaik 400 urang. Hajan khang di bhum Kalehe dalam tỉnh Nam Kivu meng harei 4/5 ngak brei dom kraong ia tagok glaong sraiy tapa ar, dauk abih rilo palei saong palai pajoa dom mblang hamu. Congo  peih harei quốc tang di harei 8/5, dalam taneh ia tuan dok meteh gheng piah hadar tal dom menuac metai. Dahlau di nan 2 harei, ia sua ia dauk ngak brei takik di abih 131 urang metai saong khut, tayah yaok rabau baoh sang di taneh ia jiak taphia nan, lac Rwandanằm daok di gah daih danao Kivu. CHDC Congo, taneh ia praong hu mbaok taneh samu Tây Âu, lac sa dalam dom taneh ia kan kathaot abih di dunya, njauk palai pajoa kayua tham nhũng saong mesruh gauk.