Ủy ban TVQH brei panuac ka rilo asal kadha praong caga ka mbang nyaom ka 4, Quốc hội mbang 15

Dah page ini, di Sang Quốc hội, peih mbaok mbang nyaom ka Adat Hukum bilan 8 di Ủy ban Thường vụ Quốc hội (TVQH). Mbang nyaom peih tabiak meng harei ini tal harei 18/8. Di mbang nyaom ini, Ủy ban TVQH brei panuac ka rilo asal kadha praong caga ka mbang nyaom ka 4, Quốc hội mbang 15,dalam nan hu 3 danak dak hukum tui kuhria hu pok tagok Quốc hội brei panuac mbang camriep di Mbang nyaom ka 4 anak tal, dalam nan hu Danak dak Hukum khik caga kein laba di urang blei pandar (pasiam veik); Danak dak Hukum pacang caga dân sự; Danak dak Hukum pacang caga bruk rao jien.

Mintri Pato Megru brei thau, kapul anek saih Việt Nam tame pakacah Olympic Tin học pakat dunya thun 2022 mek hu 4 medai, dalam nan hu 1 medai ameh, 3 medai pariak, brei mboh sa mbang pakacah Olympic jak jeng di Việt Nam. Olympic Tin học pakat dunya mbang ka 34 thun 2022 hu 349 anek saih mai meng 89 taneh ia saong bhum taneh tame pakacah, rah tabiak tui jalan pakacah online haong hu mbaok tame pakacah tapak, Indonesia lac taneh ia dang tabiak peih pakacah. Meng bruk mek hu dom medai nan, Việt Nam dang dalam kapul 9 taneh ia saong bhum taneh iek tui dom meda mek hu.

UBND tỉnh Ninh Thuận bahrau brei tapa danak dak “cak rok patagok bhum kinh tế praong gah maraong di tinh tal thun 2025, pamaong tal thun 2030”. Danak dak piah padang bhum kinh tế praong gah maraong jeng sa bhum hu prein khang, pambak tabiak praong piah patagok dom bhum kinh tế dalam tỉnh, daong jhull patagok kinh tế - xã hội tui jalan samar drah, khang kajap. Tui nan, Ninh Thuận pataom tame cak rok patagok dom gah dịch vụ hu prein khang di bhum, ngak jeng yaom tagok glaong, abih di nyu nan lac logistic, dịch vụ pabah lamnge tasik, dịch vụ pabak daong ka bruk nao tasik saong dom dịch vụ daong karei.

Dalam 2 bilan mai ini, dom janih ikan raong dalam lồng bè di Bà Rịa – Vũng Tàu hu urang mai blei haong yaom glaong, meng 110-290 rabau đồng sa kg, ini lac yaom glaong abih kuhria dalam rilo thun tapa. Tui panuac khan di dom sang raong ikan di xã Long Sơn, ban Vũng Tàu, tỉnh Bà Rịa – Vũng Tàu, yaom kaom tagok glaong lac kayua yaok bruk hu tani tanat, bruk du lịch hu hadah hadai veik, nhà hàng peih pabah mbang veik nan ye bruk blei ikan piah ngak pandap mbang tagok biak praong. Bruk pablei salih, pajeng ba pandap panda jeng mbuan lagaih jang nan ye urang blei mai duah blei gam gam, ikan hu du halei pablei abih du nan.

Công an tỉnh Hà Nam daok cap khik Nguyễn Trường Giang (umo 25 thun, daok di xã Chính Lý, huyện Lý Nhân, tỉnh Hà Nam) piah pasang iek, duah thau ka bruk pametai manuac. Urang ini taong, kak takoi sa uranaih umo 3 thun hadei di nan kareik tame tu laar. Uranaih njauk bala hadei di tuk duah mboh saong ba tame sang iek ruak,  hu tapa kan kandah, prein yava daok hu tani tanat.

Akaok Mintri Kế hoạch Phát triển di In-dô-nê-si-a (Indonesia) brei thau, dom taneh ia di kapul 20 nền kinh tế praong (G20) njauk hatai brei patagok jalan ngak rilo gah saong jhul patagok bruk padang kadung jien daong patagok ka dom taneh ia takik patagok, daok patagok saong dom taneh ia pulao kaoh sit. Panuac sanya nan hu ba tabiak dalam mbang nyaom kapul ngak bruk patagok G20 (DWG) mbang ka 3, hu peih tabiak di Ba-li (Bali) meng harei 10 tal harei 12/8.

Hu takik di nyu 1500 urang njauk panduan ba nao labik karei kayua khuah gilai biak khang jaik ban sit Anon de Moncayo di tỉnh Zaragoza, Đông Bắc Tây Ban Nha, pui mbuan pambak tabiak tal labik daok di bhap bini. Hu thau, pui khuah sit meng harei 13/8, hadei di nan nyu khuah biak khang kayua hangin khang, mbang ralai abih 8.000 héc-ta taneh dalam oh ka tal 24 maong. Labaih 300 urang ngak gah padam khuah hu samar ba mai tal, kham marat padam apui khuah.

Tui panuac khan brei thau di jabat công tố Ai Cập, bruk khuah praong di nhà thờ Abo Sefein dalam tỉnh Giza harei 14/8 lac kayua chập điện ngak brei 55 urang metai. Dom gah chức năng Ai Cập brei thau, dom menuac metai dalam bala ini, lac 41 urang saong njauk rambus lac 14 urang. Makna ba tal metai lahik rilo lac kayua sauk kapal meng pui khuah saong srau kadau rah tabiak ngak ka urang juak kateik mangaok gauk piah nduac tabiak. Rilo taneh ia hu payua panuac klah rabha pandik harao tal bhap bini Ai Cập saong gauk gar di dom urang njauk bala, saong hu panuac caong dom urang njauk rambus samar hu siam veik./.

Urang lang: Thu Thao & M. Phuong – 15/08