Đại học Quốc gia TP.HCM hu khan asar kadha iew lac đề ngak iek mbang pakacah taong yaom prein bac thun 2025. Cambaic laic, đề khik tamo bruk pandar akhar huroh saong Toán học, tui nan parilo panuac nuac tangin sua di dua bruk nan piah pakhang hatai jia jeng yau piah thau kadha pakacah karei di gauk. Asar kadha pakacah hu 120 kadha tangi brei cih palih ruah trắc nghiệm tui tukvak 150 minit saong pakacah cih vak angaok ba-ar. Taka tanut glong abih di kadha pakacah lac 1.200 điểm. Dalam thun 2025, Đại học Quốc gia TP.HCM patui veik bruk peih pakacah Taong yaom prein bac dalam dua mbang di harei 30/3 saong harei 1/6 di 25 tỉnh, ban.

UB MT Negar Viet Nam tỉnh Ninh Thuận birau peih bruk Padang ngak 60 baoh sang Jum pataom ka urang kathaot bangsa takik. Yaok baoh sang biar abih lac 100 trieu dong. Yau nan kuhria meng akaok thun tal ini tỉnh Ninh Thuận hu ngak salah 342 Baoh sang Jum pataom, rik daong patagok raidiuk bhap bini bangsa takik, khik brei tani tanat raidiuk, yam tapa truh kathaot. Ninh Thuận kham merat jak ba dom prein khang ralo gah piah ngak salah hu 500 baoh Sang jum pataom di puac thun ini.

Piah caga hu dahlau bruk BĐKH, ia tasik ndik, tỉnh Tiền Giang pok tagok pakat negar likau daong phun jien 1.200 tỷ đồng piah padang ngak 3 binek padang ia taba di bhum gah Timur. Yaok thun tuk ia mbak dui atah, dom huyen gah Timur  kurang ia  pandar biak trak. Dom  gah ngak pahala saong doanh nghiep hu peih ngak yaok pluh ribau  mbang radaih, kapal pajeng ia taba mai ka rahra bhap bini. Yau nan ye, bruk buh jien tame padang ngak dom danao halung padang ia gam ramik pasiam veik halung danao  ia dalam palei  piah tani tanat raidiuk bhap bini.

Adit Ilamo - Padhih - Yulit tinh Long An mbang 2 kayua UB bhap bini tỉnh Long An peih ngak, peih ngak di harei 28/11 tal harei 4/12 anak tal. Mbang ini, gam haong dom bruk yaih khan makna ilamo meng kan saong drap ar alam dunya palei pala, daok hu ralo bruk pataom ilamo, bruk ngak mbang haong labaih 50 doanh nghiep Hàn Quốc. Abih di nyu, dalam Adit Ilamo nan, hu Nyaom biai pachreih urang buh jien tame ngak mbang di Long An thun 2024 saong Nyaom biai pambuak bruk, pachreih bruk ngak yulit saong pandap OCOP di TPHCM saong bhum taneran kraong Cửu Long.

Dalam dom bruk ngak di Adat ngak yang Óoc Om Bóc – Pakacah ghe Ngo Sóc Trăng, Bhum ĐBSCL, melam kabroi 12/11, di kraong Maspero, ban Sóc Trăng hu parang iek Lôi Protip (palao Gom ia) saong ghe Cà Hâu piah duh ka bhap bini saong tuai damuai mai haong Adat ngak yang Óoc Om Bóc. Bruk nan piah meyaom dom ilamo siam gheih di bol bhap Khmer, rik tame paglong jalan sahaneng  dalam bruk khik ramik, patagok dom ilamo siam gheih di urang bangsa Khmer dalam samar ba drei tame dunya saong patagok.

Sa bala trak rah tabiak di Chu Hải, Quảng Đông, gah Meraong Trung Quốc melam 11/11 meng blaoh. Urang pambak tal bala lac likei but Phàn, umo 62 thun, peih radaih ginuk tame rilo urang di sa pasak di ban. Akok negar Trung Quốc Tập Cận Bình hadei nan hu tacei ba ngak bruk praong. Ong iew bala nan ngak metai njauk rambuac trak lac “ jhak biak jhak”, tui nan njauk ba abih kham merat piah daong dom urang njauk rambuac  saong langyah catang urang halei ngak suan hukum.  

Dom taneh ia di Gah Y te Dunya brei dui atah  dom bruk ginum biai piah hu njauk gauk di dunya ka jit ruak tapa thun 2025 kayua daok ralo sahaneng karei di gauk. Yau nan, dunya  oh ka mbaoh harak njauk gauk chip dalam thun 2024 yau hatai caong khin. Tui bruk ginum biai peih tabiak  jalan daong dom taneh ia hu caga, pacang  mesruh jit ruak  hu tani tanat dalam tukvak anak tal.  Yau nan min, dom taneh ia  mboh lac daok rilo bruk gak tavak karung karang piah ngak hu salah dalam thun ini.

Tapa langyah di dunya hu brei thau, phun kayau di dunya  daok biak takik, dom janih phun kayua praong daok pametai abih. Bruk njom nerak nhien lieu hoa thach ngak pandiak baoh taneh daok ba tal phun kayua, dom janih phun phun jhuk nerek  nan tabiak truh yawa langik. Tui nan, bruk lahik  dom phun kayau  daok ngak jhak yawa lagik. Liên minh Khik ramik alam Dunya iew da-a brei ngak chip piah pacang caga phun daok lahik di dunya.