Kapul pa-aok blait Việt Nam (Vinacas) brei thau lac dalam 2 bilan akaok thun 2023, dom doanh nghiệp dalam taneh ia hu blei tame labaih 10.158 tấn asal pa-aok blait, samu jaik 44.000 tấn asal pa-aok blait tamo, glaong jang rilo mbang dut saong tukvak ini thun blaoh. Anak bruk ini, Vinacas hu panuac ieu dom mintri, dom gah pambuak tal daong duah jalan jang yau pok tagok Rajaei brei peih ngak dom adat piah ba bruk samu gauk dalam bruk ngak saong pablei salih asal pa-aok blait di darak pasa dunya. Langiu di bruk ieu Mintri Công thương gam haong dom mintri, dom gah pambuak tal hu jalan langyah saong daong brei, Vinacas jeng ba tabiak jalan ginum biai, mbaoh tangin tame dom sarak di dua gah ngan haong yaok taneh ia ka bruk mien jien je pablei tabiak negar langiu pandap panda di gauk.  

Viện Pasteur TP.HCM bahrau hu harak payua Sở y tế 4 tỉnh, ban saong 10 sang iek ruak bhum gah meraong ieu brei panuac ka bruk pambuak gauk peih ngak danak dak "taong yaom bruk klauk jru vaccine dii Việt Nam".  Tui Viện Pasteur TP.HCM, bruk ngak di danak dak piah taong yaom bruk klauk ginup dom mbang vaccine di Việt Nam dalam pacang caga COVID-19 meng umo 12 thun tagok njauk tame sang iek ruak atau metai.  Tui nan, 10 sang iek ruak hu ieu brei panuac lac: Sang iek ruak Chợ Rẫy, Sang iek ruak Đại học Y Dược, Sang iek ruak Nhi đồng TP.HCM, Sang iek ruak Đa khoa tỉnh Bình Dương, Sang iek ruak Đa khoa tỉnh Tây Ninh, Sang iek ruak Bà Rịa saong sang iek ruak Vũng Tàu … daok di  4 tỉnh ban lac TP.HCM, Bình Dương, Tây Ninh saong Bà Rịa - Vũng Tàu.

Dah page ini 20/4, di Công ty Cổ phần Ngak nong Mùa Xuân, di xã Tân Phước Hưng, huyện Phụng Hiệp, Sở Ngak nong saong patagok palei pala tỉnh Hậu Giang pambuak haong Giáo hội phật giáo Việt Nam tỉnh Hậu Giang peih bruk palao ikan pajaih phóng sinh, pabak veik kaya ikan thun 2023. Tapa nan, urang pan akaok dom sở, dom gah hu pambuak tal di tỉnh, gam haong Giáo hội phật giáo Việt Nam tỉnh Hậu Giang saong urang pan akaok UBND huyện Phụng Hiệp, Công ty Cổ phần Ngak nong Mùa Xuân saong rilo anek saih di pak ini hu peih bruk palao jaik 520kg ikan pajaih trun kraong, lac ikan kan, ikan kuak, ikan chép, ikan pra, ikan padoc,… Abih tih phun jien di mbang palao ikan ini lac jaik 50 triệu đồng meng jien jak ba ieu pataom dalam rahra. 

Mesup ini (20/4), Sở Thông tin & Truyền thông pambuak bruk haong Sở Ilamu, Thể thao saong Du lịch, Thành Đoàn Cần Thơ peih Harei pataom tapuk ban Cần Thơ mbang ka IV - thun 2023 saong parang iek tapuk ngan saong kadha “Cần Thơ haong ilamu kraong ia bhum taneran kraong Cửu Long”. Parang iek hu jaik 2.300 harak gar daok hu khik piah di gilang tapuk ban Cần Thơ saong ieu pataom meng Gilang tapuk Khoa học tổng hợp TP. Hồ Chí Minh gam haong 12 Gilang tapuk dom tỉnh bhum taneran kraong Cửu Long. Dom harak gar pataom tame asal kadha ka Đảng, Wa Hồ; Bac megru saong ngak tui jalan hadah krah siam mekre di Hồ Chí Minh; labik saong dom jak jeng chính trị - kinh tế - ilamu - xã hội di dom tỉnh, ban dalam bhum taneran kraong Cửu Long. Taphia dom harak gar nan, parang iek daok hu duh ka urang puac tapuk jaik 400 tài liệu số (ebook).  

MBan Công binh jabat Tham mưu di Bộ Chỉ huy quân sự tỉnh Bình Phước pambuak haong Ban Chỉ huy quân sự ban sit Chơn Thành bahrau  ba nao caik di labik karei baoh bom praong tal labik salamat cang piah langyah. Dahlau di nan, dalam tuk kuac ribaong, sa baoh sang daok di puk p 4, xã Nha Bích, ban sit Chơn Thành, tỉnh Bình Phước hu mboh sa baoh bom ka oh patuh nan ye pathau khan haong jabat chức năng. Taduan hu panuac khan, Công an xã Nha Bích gam haong Ban chỉ huy quân sự xã hu mbaok pasang iek. Di labik nan, kapul hu duah mboh 1 baoh bom ka oh patuh daok caraih, atah 80cm, đường kính 30cm, trak labaih 300kg kayua Mỹ ngak tabiak, daok kandaong veik hadei di mesuh metak.

Kinh tế Trung Quốc tagok samar jang kuhria mboh dahlau dalam quý 1 thun ini, tuk dom bruk pacang COVID hu taoh talaih ka dom doanh nghiệp saong urang blei pandar. Tui Kadung jien dunya (IMF), Trung Quốc meda lac prein pachreih ba praong abih ka patagok kinh tế dunya dalam 5 thun tal, rik tame 22,6% patagok dunya.  Tui Cục Yaok pataom taneh ia, GDP dalam quý 1 di Trung Quốc tagok 4,5%, samar jang tanut 2,9% dalam quý dahlau, brei mboh tanut tagok khang abih dalam 1 thun tapa. Dom urang đầu tư daok tui iek catang bruk di quý 1 piah taong yaom bruk pasiam veik hadei di tuk Trung Quốc ngak brei tatuak drei tuk yah klaak dom jalan pacang COVID di bilan 12 thun blaoh saong pacadu bruk pasang iek ngan saong dom Cty công nghệ saong sang danaok taneh riya. 

Dom urang halain hatain di kapul ngak pahla GEMA Malaysia daok rik pataom pandap mbang labaih meng dom labik darak saong alin ka urang hu jien mek tame takik dalam bilan eik Ramadan. Dalam 3 adit akaok di bilan Ramadan thun ini, kapul ngak pahla GEMA rik pataom hu labaih 20.000 kg pandap mbang. Meng di thun 2016, dom urang halain hatain di kapul ngak pahla GEMA Malaysia nao jak ba rik pataom pandap mbang labaih dalam bilan Ramadan, piah alin ka dom urang hu jien mek tame takik. Bruk rik pataom di kapul ngak pahla GEMA piah ngak brei trun manieng bruk palai pajoa pandap mbang dak harei dak tagok, ngak tachrauk alam môi trường di Malaysia urak ini.

Rajaei Đức harei ini brei tapa dự luật pakauk jaik abih dom hệ thống sưởi ấm bahrau meng menyek haong khí đốt, kuhria meng thun 2024. Akaok mintri Kinh tế Đức brei thau, sarak ini hu padang tabiak piah cakak trun khí thải sang camin, min hu dom urang ilamu brei thau lac meda  abih rilo jien padai jang, ngak ka dom sang  kan kathaot jang.  Liên minh pan karja di Đức bilan dahlau njauk gauk lac jaik abih dom hệ thống sưởi ấm bahrau hu ngak di taneh ia ini njauk nduac meng 65% năng lượng tái tạo meng thun 2024, dalam dom sang bahrau saong klak.