Dalam 2 harei ngak bruk puac abih di bang Nyaom ka 4, Quốc hội brei tapa 4 danak dak hukum, lac Hukum Thanh tra (pasiam veik); Hukum Dầu khí (pasiam veik); Hukum pacang caga bruk rao jien (pasiam veik). 6 sarak jeng hu pasang iek brei tapa, lac Sarak patabiak Adat di mbang Nyaom Quốc hội (pasiam veik); Sarak ka bruk ngak iek dom jalan ngak, sarak karei ka bruk cak rok patagok ban Buôn Ma Thuột, tỉnh Đắk Lắk; Sarak ka bruk ngak iek brei quyen pilih ruah, pandar biển số ô tô tapa to yaom. Dom urang QH jeng ginum biai di hội trường ka 2 danak dak hu makna praong lac Hukum taneh riya (pasiam veik) saong Hukum Đấu thầu (pasiam veik). Akaok Quốc hội Vương Đình Huệ brei panuac di mbang tamat mbang nyaom ka 4 di puac harei 15/11.

Hu mbaok di harei roya jum pataom bangsa di huyện Bình Chánh, TP.HCM dalam harei 13/11, UV Mintri Chính trị, Bí thư Thành ủy TP.HCM Nguyễn Văn Nên pok meyaom bruk jum pataom, rik prein, sa hatung hatian haong gauk di bhap bini ấp 1, xã Bình Chánh dalam peih ngak dom bruk jak ba, lac labik hadah dalam bruk jum pataom, patagok talei rohim puk paga, ba gauk tame padang puk palei hijao-hacih-mekre. Tapa nan, Bí thư Thành ủy TP.HCM hu alin hadiah pandap saong brei 10 triệu đồng ka ấp 1. Thành ủy TP jeng taduan bruk alin hadiah 15 pok jien bac ka anek saih sang kan kathaot saong jaik si kan kathaot dalam thun 2023.

Huyện tapen negar Lộc Ninh, tỉnh Bình Phước bahrau peih bruk jao jaik 200 drei limo ka dom baoh sang bangsa takik kan kathaot di dalam huyện. Bruk jao alin limo pajaih hu makna biak praong, piah daong ka dom baoh sang bhap bini bangsa takik hu jalan ngak mbang, duah jien, yam tagok tabiak truh kan kathaot khang kajap. Bruk ngak ini daok dalam Danak dak bruk ngak negar ka patrun kathaot khang kajap thun ini saong rik daong ngak hu bruk lac yaok thun trun 1.000 baoh sang kan kathaot di tỉnh Bình Phước.

Pambuak tal bruk dom sang bhap bini hu baoh sang khut meng bruk padang ngak Đập hạ lưu kraong Dinh, Sở Ngak nong saong Patagok palei pala tỉnh Ninh Thuận pambuak bruk haong UBND xã An Hải, huyện Ninh Phước hu da-a 24 sang khut nan mai ngak bruk piah ginum biai ka yaom jien daong dahlau di tuk bayar brei. Tapa ngak bruk 24 sang nan njauk hatai haong yaom jien daong saong mbaoh tangin sanya oh pathau, oh yak bak. Po padang ngak jeng sanya bayar taong abih jien daong dalam bilan 11 ni haong pok jien abih tih lac labaih 1,2 tỷ đồng.

Dom harei tapa, ia ndik tagok gam haong hajan khang ngak ka ia di kraong, ribaong, binek saong dom mblang hamu jeng daok di tanut glaong, daok ngak brei dauk rilo labik dalam bhum ĐBSCL, abih di nyu nan lac di dom tinh, ban daok puac kraong Hậu. Tui Chi cục pala drak saong khik caga phun pala di tỉnh Hậu Giang brei thau, tuk camriep hu labaih 10.200ha taneh ngak nong njauk dauk kayua ia ndik, dalam nan rilo meng lac taneh ngak padai, phun mbang baoh, njam patam njauk khut meng 30% tal labaih 70%. Di ban Bạc Liêu, tỉnh Bạc Liêu, taeng mblang taneh njam patam njauk khut tagok tal labaih 200ha. Urak ini dom tinh, ban daok yaok pataom dom khat lahik piah hu jalan daong ka mikva.

Nyaom biai pakat glaong Dom taneh ia Đông Nam Á (ASEAN) mbang ka 40, 41 saong dom nyaom biai pakat glaong pambuak tal hu tamat blaoh di biar harei 13/11. Di nyaom biai ASEAN hu brei tapa saong mboh hu 70 văn kiện, tuyên bố ka labaih 3 kadha praong di ASEAN; tabiak panuac haong gauk ka Pahadar 20 thun Tabiak panuac ka ndom puac daok dang di dom gah pambuak tal di Biển Đông (DOC), panuac di dom urang dang akaok ASEAN ka pahadar 55 thun harei padang ASEAN, panuac di dom urang pan akaok ASEAN ka pambuak ASEAN hadei di thun 2025… Hadei di tuk tamat, Thủ tướng Campuchia, Akaok ASEAN 2022, hu jao mbaik kapak akaok ASEAN brei ka Tổng thống Indonesia, jao bruk ngak Chủ tịch luân phiên ASEAN 2023 ka Indonesia.

Jeng di nyaom biai pakat glaong kapul dom taneh ia Đông Nam Á (ASEAN) mbang ka 40, 41, Tổng thống Mỹ, Thủ tướng Nhật Bản saong Hàn Quốc hu tabiak panuac pathau khan haong gauk ka bruk pambuak gauk di 3 gah pamaong tal sa Ấn Độ Dương-Thái Bình Dương tự do saong peih praong. Panuac haong gauk di Mỹ-Nhật-Hàn brei thau veik bruk sanya phi hạt nhân hóa taong abih di kaoh pulao Triều Tiên tui dom Sarak di Hội đồng bảo an Liên hợp quốc. Gam haong nan jeng ndom tal bruk ndem biai nao mai saron mbon, ngoại giao saong ieu Triều Tiên pambuak veik bruk ginum biai.

Di harei 17/11 tal, labaih 500.000 anek saih di Hàn Quốc meda hu mbaok tame mbang pakacah prein bac pakat negar tame dom sang bac ĐH saong CĐ. Min dalam adit camereip di bilan 11, hu labaih 1.800 anek saih THPT mboh dương tính haong COVID-19. Tapa nan, ngak brei urang mboh huac lac dom anek saih njaom COVID-19 tagok khang. Kayua yau nan ye, meng harei ini, Hàn Quốc peih bruk klauk mbang patagok COVID-19 haong vaccine di Pfizer caga biến thể BA.4 saong BA.5 ka dom urang umo meng 18 thun tagok./.

Urang lang: Thu Thảo & M. Phương