Harei pataom Tuồng saong Ragu daoh kịch bhap bini pakat negar hu peih ngak klau thun sa mbang

Dalam dom bruk ngak di Le hoi palei Sen thun 2022, Harei pataom Tuồng saong Ragu daoh kịch bhap bini  pakat negar thun 2022 meda hu peih tabiak di melam ini 17/5 di xã Kim Liên, huyện Nam Đàn, tỉnh Nghệ An. Harei pataom Tuồng saong Ragu daoh kịch bhap bini pakat negar lac bruk hu peih ngak klau thun sa mbang, lac labik pataom, pahadah di rilo đạo diễn, nghệ sĩ, diễn viên; Ini jeng lac tuk piah pataom iek, taong yaom asar nghệ thuat, bruk ngak siam lagaih saong dak padang jalan patagok ngan haong dom kapul parang iek Tuồng saong Ragu daoh kịch bhap bini chuyen nghiep dalm dom thun anak tal.

Dom gah pambuak tal di ban Châu Đốc, tỉnh An Giang hu mek mẫu dut iek mẫu ia haong mẫu ikan piah duah tabiak makna saong tabiak panuac kakei rahra jalan ngak di anak meta piah takik ikan metai. Dahlau di nan, meng harei 13 tal harei 14/5, jaik 40 tấn ikan raong pablei di dom sang raong ikan bè angaok dhar kraong Hậu labik kraong Vĩnh Nguơn hu ikan metai oh thau kayua halei. Pak dalam harei 14/5, gah chức năng brei ba 20 dalam 60 bè tabiak truh labik ini.

Pasak Pasang iek ruak kik tỉnh Bà Rịa - Vũng Tàu brei thau, yaom lac birau tame akok bilan hajan min bhum taneh ini mbuan tamuh jit ruak pandiak tabiak darah biak glong. Tui nan, meng akok thun mbiah tal ini, dalam tỉnh hu 176 sruh jit ruak pandiak tabiak darah ngan haong 902 mbang, tagok 54 mbang dut saong tukvak ini thun blaoh; oh hu urang halei metai. Urak  ini, rilo bhap bini daok meluk dom janih ruak pandiak tabiak darah saong dom ruak Covid-19 ba tal ruak trak, mbuan metai.

Dalam harei pakacah kabroi (16/5), điền kinh Việt Nam daok mek hu 4  Huy chương ameh, tapa nan daok khik labik dang akaok dalam bảng tổng sắp. Yau nan, hadei di 3 harei pakacah, điền kinh Việt Nam mek hu abih tih 13 HC ameh, jaik samu bruk ba tabiak, lac meng 15 tal 17 HC ameh di SEA Games 31.

Di huyen Bù Đốp, Bình Phước birau rah tabiak bala mblung ia ngak brei 3 uranaih metai.  Dom uraniah njauk bala nan lac 2 kamuan likei angan Đ.V.T. (umo 6 thun), Đ.V.T. (umo 4 thun, adei likei di  T.) saong kamuan kumei B.T.B.N. (umo 4 thun), daok di palei 5 xã Hưng Phước, huyện Bù Đốp. Hu thau,  mong 10 tuk, harei 16/5, 3 kamuan ma-in haong gauk jaik danao ia dalam palei. Hadei di nan, bhap bini dauh mboh 2 thong ( gu) klik juah di uranaih angaok ar danao, medil lac dom kamuan laik tame danao nan ye trun duah ye mboh 3 kamuan metai. Tui yaok pataom, meng kaok bilan 5 mbiah tal ini, Bình Phước hu 4 mbang bala ba tal 10 uranaih metai kayua mblung ia.

Dom jabat khik ramik y tế Mỹ kuhria lac harei ini (17/5) meda brei adat klauk veik mbang vắc xin Covid-19, di Hãng jru Pfizer/ BioNTech ka uranaih umo meng 5 tal 11 thun. Tui kuhria mboh di Pasak pasang iek saong pacang caga jit ruak Mỹ, tal urak ini, bahrau hu jaik 30% uranaih Mỹ umo meng 5 tal 11 thun hu klauk ginup vắc xin caga Covid-19.

Tamat harei ngak bruk kaok meti di Brussels (Bỉ) biar harei kabroi, Ngoại trưởng dom taneh ia Liên minh châu Âu oh ka njauk gaul brei tapa paok taong phạt ka 6 tame Nga, dalam nan bruk hu makna dalam lac pakauk brei pajeng ba menyek di Nga. Bruk ba tal bruk nan lac kayua rajaei Hungary cagar catang ka bruk nan kayua lac, gah châu Âu oh ka ba tabiak dom jalan ngak piah salih hu siam mekre ka Hungary tuk pakauk, dalam tuk Hungary lac sa dalam dom taneh pambak tame biak praong  ka menyek blei meng Nga.

Harei 16/5/2022, Điện Elysee brei thau, Tổng thống Prang Emmanuel Macron hu pok akaok Mintri Lao động Elisabeth Borne ngak Thủ tướng bahrau di taneh ia ini. Ini lac urang kumei camereip abih hu pok ngak Thủ tướng di Prang kuhria meng thun 1992. Dalam panuac ndom puac tuk tagok pan bruk, amuk Borne hu khan brei thau dom bruk njauk ngak dahlau di anak tal, yau ye bruk pablei salih atau pacang biến đổi khí hậu./. 

 Urang lang: M. Phuong & Bhumi – 17/05 10:30:00