Jabat chức năng jhul khang taong phạt dom bruk menyum alak peih radaih angaok jalan mbak

Dalam dom harei ini, jabat chức năng jhul khang taong phạt dom bruk ngak suan Sarak 100/2019/NĐ-CP harei 30/12/2019 ka bruk menyum alak peih radaih angaok jalan mbak. Tui yaok pataom di UB An toàn jalan mbak negar brei thau, hu labaih 40% dom bruk radaih paoh gauk saong 11% dom urang metai kayua pambuak tal bruk menyum alak, mbia saong bruk ini daok tagok samar. Dalam 6 bilan akaok thun 2022, urang metai kayua bala angaok jalan mbak trun 30 mbang, sumu 1,07% dut saong tukvak ini thun dahlau, biar jang rilo mbang dut haong bruk ba tabiak.

UBND ban raya Hồ Chí Minh bahrau peih ngak sarak karei iek glang, dong ka urang umo prong, uranaih metui medar song dom urang hu rai duik kan kandah. Dalam nan, uranaih metui hu dong 1,2 triệu đồng/sa urang sa bilan. Langiu di nan, tui yaok pataom di Sở Lao động Thương binh song Xã hội TP Hồ Chí Minh, dalam mbang jit ka 4 meng bloh, TP Hồ Chí Minh kham merat iek glang ka uranaih metui medar, uranaih hu rai duik kan kandah kayua COVID-19. Abih tih pok jien meng kadung jien karja piah iek glang ka nyaom uranaih ni, gam uranaih dok dalam dom labik dong ba xã hội, dom quận, huyện hu rilo urang nhập cư lac labaih 17tỷ meteh; Tui kuhria, yaok adei taduan hu meng từ 5-6 triệu đồng sa mbang dong

Pahadar 75 thun harei TBLS (27/7/1947- 27/7/2022), Sở LĐTB saong XH tỉnh Bạc Liêu pambuak saong Sang iek ruak đa khoa Thanh Vũ Medic Bạc Liêu peih ngak Danak dak dut iek ruak tim mạch oh mek jien ka urang hu buh prein yawa ka cach mang dalam tỉnh. Labaih 300 urang hu buh prein ka cách mạng dalam tỉnh Bạc Liêu hu tut angan tame dut iek ruak tim mạch oh abih jien. Tapa dut iek ruak hu mboh dom ruak pambuak tal tim mạch.

Meng akaok thun tal ni, urang nong bhum tapen tasik di dom huyện Châu Thành, Cầu Ngang, Duyên Hải, ban Duyên Hải, tỉnh Trà Vinh dok peih prong taneh rong arieng tasik tagok tal 21.100 ha mbaok ia danao, ngan song rieng pajaih palao rong jiak 116 triệu drei, tagok labaih 3.000 ha dut song tuk vak ni thun dahlau. Mblang taneh rong arieng tasik di tỉnh tagok khang, kayua thun ni, ia mbak hu avar jang, mbuan lagaih rong arieng tasik, nên nan ye, urang ong samar palao rieng pajaih, piah dar tuk vak rong rieng tasik mbang ka 2 atau rong pabak 1 vụ hadang thẻ takai patih di bilan 8/2022 anak tal.  

Pambuak tal bruk duah daong urang gaok bala di gilai ikan BTh 97478 TS oh daok pambuak iew phone hu di tasik meng di harei 10/7, mong 13h 11 minit harei 19/7/2022, gilai ikan BĐ 96935 TS mboh sa gilai li-I, dalam nan hu 4 urang di gilai BTh 97478 TS di labik atah puac abih di gilai gaok bala labaih 242 hải lý gah Đông- Đông Bắc. Tui panuac khan di dom urang hu daong nan, dom urang ngak apah di gilai parabha jeng dua gilai li-I, sa baoh hu 7 urang saong sa baoh 8 urang. Gilai hu 7 urang ye 3 urang metai yau nan ye dom urang palao trun tasik oh thau labik halei, gilai 8 urang urak ini oh ka duah mboh. Piah sumu daong dom urang daok lahik, UB bhap bini tỉnh Bình Thuận iew UB pakat negar Pacang bruk kandah, bala meng labik tasik saong Duah daong urang gaok bala brei kapal haok duah di labik duah mboh dom urang gaok bala di gilai BTh 97478 TS hu sraong tagok.

Mbang pandiak bhang urak ni dok rah tabiak khang di châu Âu jeng dok glong mbiah tal kreh adit dei. Tui kuhria dom mbang pandiak bhang yau nan rah tabiak gam gam jang dalam harei hadei kayua biến đổi khí hậu. Ni lac panuav khan di Tổng thư ký gah Khí tượng dunya Petteri Taalas batabiak di mbang họp báo harei kabroi (19/7).

Takik di abih 25 urang metai saong 31 urang karei njauk rambuac kayua bala trak angaok jaln mbak rah tabiak di jalan peih drah samar sa mạc gah Barak di Ai Cập jaik ban Mallawi di tỉnh Minya harei 19/7. Sa sruh radaih byt pajeng 45 urang nao meng ban Assiut tal ban ine Cairo ginuh tame iku radaih daok pataok tapen jalan peih drah samar di tỉnh Minya saong Assiut di bhum Thượng Ai Cập. Urak ini oh ka thau cambaic bruk ba tal bala nan, min tui dom pathau khan tuk camereip mboh radaih tải pajeng trak padeih piah plaik baoh radaih di jalan cao tốc tuk rah tabiak bala.

Urang lang: Hani Pha & Bhumi – 20/07