Thành Đoàn song Sở LĐTBXH ban peih bruk truac ding hadar dhar phor dom anh hùng liệt sĩ

Dalam dom harei ni, dam dara di rilo tỉnh, ban dalam bhum ĐBSCL hu truac ding hadar dhar phor di tuk pahadar harei Thương binh - Liệt sĩ. Melam 26/7, di labik kubo Liệt sĩ ban Cần Thơ, Thành Đoàn song Sở Lao động, Thương binh song Xã hội ban peih bruki truac ding hadar dhar phor dom anh hùng liệt sĩ song danak dak doh tako hu angan “Dam dara Cần Thơ patui jalan vak veik dalikan hòa bình”. Tapa nan, tong abih urang đoàn, dam dara ban hu truac labaih 5.200 mbaik ding di dom labik kubo anh hùng liệt sĩ. Jeng tapa nan, Ban Thường vụ Thành đoàn Cần Thơ hu ba tabiak bruk dam dara ban kham merat hu mbaok tame dom bruk “thau dhar thau phor”, “menyum ia hadar halau ia” di ban Cần Thơ song dom tỉnh bhum taneran krong Cửu Long. 

Tui nan, di taneh kubo liệt sỹ Tân Biên, tỉnh Tây Ninh hu peih bruk ravang zirah taneh kubo liệt sĩ; ba dar 255 talang liệt sĩ duah pataom hu dalam tỉnh saong di Campuchia ba mai taneh ia. Dom thun tapa, Tây Ninh hu pambuak bruk haong dom labik, dom tỉnh ban, dom gah di negar Campuchia duah, pataom, ba mai palei negar yaok rabau talang urang lin halan hatian Việt Nam ndih trun dalam dom bruk mesruh metak di Campuchia mai taneh ia. Mbang ka 21, dua kapul K70 haong K71 duah pataom, ba mai palei negar hu 238 talang liệt sĩ saong dom labik dalam tỉnh duah pataom hu 17 talang liệt sĩ.

Di nyaom biai brei thau sarak padang mban tacei jalan pacang caga tham nhũng, tiêu cực tỉnh, ong Nguyễn Hồng Lĩnh, Bí thư Tỉnh ủy Đồng Nai hu pok ngak Akaok mban tacei jalan pacang caga tham nhũng, tiêu cực tỉnh. Brei panuac di mbang nyaom, ong Nguyễn Hồng Lĩnh brei thau, bruk padang mban tacei jalan piah pasang iek siam nội bộ, pato pakai kapul nyaom, oh caik rah tabiak dom bruk tham nhũng, tiêu cực dalam tỉnh. Mban tacei jalan oh ngak bruk di gah karei, oh kateik tagok bruk di dom jabat tố tụng. Bruk truy tố lac bruk di dom jabat tố tụng.

Tal harei ini, BHXH Việt Nam hu mbaoh tangin brei ka jaik 2 triệu 700 rabau urang ngak hu taduan mek jien daong pah sang daok tui sarak 08 di Rajaei. Dahlau di nan, Mintri LĐTBXH brei thau, bruk peih jien brei ka urang ngak suai kayua rilo doanh nghiệp pataom veik 3 bilan meng bayar 1 mbang. Mintri LĐTBXH kuhria mboh lac, hu 3 triệu 400 rabau urang ngak haong yaom jien peih brei tagok tal 6.600 tỷ đồng

UBND tỉnh Long An bahrau peih bruk padang ngak Cầu Kênh 79 di mangaok jalan vành đai ban Tân Hưng, di huyện Tân Hưng, tỉnh Long An. Danak dak hu peih ngak , piah dak harei dak pasiam samu gauk jalan mbak nao mai , tui bruk batabiak, pabak bruk pajeng ba pandap panda saong bruk nao mai di bhap bin, pambuak pagam bhum ni song jalan roya 819 song jalan roya 831, huyện Tân Hưng song tỉnh Đồng Tháp. Meng nan, rik dong patagok kinh tế, ilamu, xã hội, an ninh quốc phòng. Danak dak tui kuhria hu ngak salah bloh, song ba tame pandar dalam quý I/2024.

Liên minh châu Âu (EU) brei dui atah dom bruk taong phạt Nga tagok jang 6 bilan, dui atah tal puac bilan 1/2023. Dom bruk taong phạt hu: pakauk nao mai saong kreik veik oh brei mek tabiak jien padai, drap ar. Urak ini negar Anh hu ba tabiak rilo bruk taong phạt ngan saong dom tỷ phú haong chính trị gia hu angan je di Nga, dalam nan hu gam Tổng thống Vladimir Putin. Rajaei Anh ndom lac, mbiah tal harei ini, taneh ia ini hu taong phạt labaih 1.100 urang saong labaih 100 kapul nyaom di Nga.

Dom urang roh duah di sang bac Đại học Naresuan di Thái Lan daok peih bruk dut iek ia tathuak di mblang kapan haoh Suvarnabhumi di ban ine Bangkok piah pasang iek vi-rút đậu mùa khỉ. Tui dom urang roh duah, dom dut iek meda duah hu dấu vết di vi-rút dalam ia tathuak samar drah, meng dahlau di tuk urang njom vi-rút mboh dom triệu chứng ruak. Dom urang jakar Thái Lan dok patagok dom jalan pacang caga ruak đậu mùa khỉ , hadei di tuk hu sa urang njom vi-rút camereip di palao Phuket.

Takik di abih 28 urang metai saong 60 urang karei njauk jru mek kayua menyum njauk alak hu jru mek di gah pai Ấn Độ di harei 26/7. Bruk nan rah tabiak di bang Gujarat, lac labik ngak tabiak saong pablei salih alak daok njauk pakauk. Urak ini, cảnh sát daok pasang iek, duah thau janih hoá chất halei hu pandar piah ngak alak. Tui jabat hồ sơ tội phạm pakat negar, Ấn Độ hu jaik 1 rabau menuac metai yaok thun kayua menyum njauk alak hu jru mek./.

Urang lang: Hani Pha & M. Phương – 27/07