Dom uranaih rilo meng mboh hanjual, dom uranaih brei tame sang iek ruak tong ruak takik

Thủ tướng Rajaei Phạm Minh Chính birau hu panuac ieu Mentri Y tế samar peih ngak Sarak di Rajaei ka bruk blei vaccine ka uranaih umo meng 5 thun tal umo ala 12 thun; gam haong nan ieu pasang iek, taong yaom veik, ngak brei cambiac laic bruk ngak saong langyah dom kapol, urang suai blei vaccine ka uranaih umo thun ini. Dahlau di nan, Rajaei jao brei Mentri Y tế taduan bruk blei vaccine, klauk jru vaccine caga Covid -19 di Pfizer ka uranaih brei hu salamat, siam mekre ka prein yawa.

Dalam dom harei tapa, yaok harei hu dom ribau amaik ame ba uranaih umo ala 16 thun nao iek ruak, pasang iek Covid-19 di dom sang iek ruak uranaih dok di ban raya HCM. Dom uranaih rilo meng mboh hanjual, dom uranaih brei tame sang iek ruak tong ruak takik, meng 1 - 2 harei hadei lac tabiak sang iek ruak. Pagam tal bruk, anek saih nao bac njom Covid-19 dok patagok, tui Sở Y tế TP.HCM, dalam sa bilan mai ini, hu 19% dom sang bac hu njom ruak di sang bac, rilo meng lac di pakat THPT song THCS. Sở Y tế ban raya hu tacei Pasak y tế quận huyện, ban .Thủ Đức njauk patagok talei pambuak bruk khang kajap haong sang bac dalam bruk pasang iek jit ruak dalam sang bac.

Dua xã Lạc Hòa, Lai Hòa di ban sit Vĩnh Châu birau hu tỉnh Sóc Trăng brei angan lac xã palei pala birau saong xã Vĩnh Hiệp mek hu tanut chuan palei pala birau paglong. Ini lac 3 xã dalam 6 xã palei pala di ban sit Vĩnh Châu, hu ralo urang Khmer daok. Tal urak ini, tỉnh Sóc Trăng hu 58 dalam abih tih 80 xã palei pala birau, dalam nan hu 9 xã palei pala birau paglong. Langiu ban sit Ngã Năm saong huyện Mỹ Xuyên hu Thủ tướng Rajaei pok brei angan palei pala birau, dalam thun 2021, ban sit Vĩnh Châu hu ngak salah harak gal likau Trung ương brei angan lac ngak salah bruk padang ngak palei pala birau.

Công ty Cổ phần Tập đoàn Lộc Trời bahrau mbaoh tangin pambuak bruk ngak saong blei veik 2 triệu tấn padai hong Liên hiệp Hợp tác xã Thoại Sơn, tỉnh An Giang piah pabak ka bruk pandar dalam negar song pablei tabiak negar langiu ,rik dong langyah jalan tabiak ka phun padai, trun bruk "pala njauk, lahik yaom" ka mik va urang nong. Gam song nan alin hadiah 123 jamriak ngak nong yaom labaih 100 tỉ đồng ka dom hợp tác xã piah peih bruk pandar jamriak praong samu gauk meng thun ni. Ong Nguyễn Thanh Bình, Akaok UBND tỉnh An Giang jia lac, ini jalan ngak prong rik dong patagok kinh tế ngak nong, paglong kinh tế di rahra An Giang.

UBND tỉnh Bình Định birau tacei pato brei padeih bruk padeih padang ngak dom bruk pambuak tal bhum khik caga gah langiu inem krung kiến trúc nghệ thuật bimong Bánh Ít saong peih bruk duah thau panuac di urang ilamu piah pasiam veik dom bruk pambuak tal. Dahlau di nan, bhap bini mai rivang dom bimong kalan Bánh Ít jeng oh klak di duh hatai tuk gah padang ngak ba mac moc tame wua mblang taneh, kuac roh dom labik jaik takai bimong…mbuan lih tame, ngak khut bimong nan. Inem krung bimong Bánh Ít lac danak dak kiến trúc meng kan hu padang ngak meng puac abap XI, akok abap XII, ndung bak ilamu Cam. Danak dak kiến trúc meng kan nan hu angan dalam "1.001 danak dak kiến trúc njauk nao tal dalam raidiuk" di urang Anh.

Mbang ginum biai bahrau abih di Ngoại trưởng 2 taneh ia Nga song Ukraine rah tabiak dalam harei 10/3 di Thổ Nhĩ Kỳ hu tamat bloh, bo oh mek hu bruk njauk gauk halei hadei di bruk quân sự catang dui atah labaih 2 adit tapa di Nga song Ukraina. Dalam tuk nan, Mintri Quốc phòng Nga bahrau tabiak panuac lac meda brei padeih cuh di 5 ban di Ukraina meng 10tuk mesup ni (tui tuk vak Việt Nam) song peih pabah mbang ka dom bruk ngak pahla brei adat panduan ba bhap bini tabiak truh 5 ban. Min, gah Ukraina brei pabak angan menuac saong radaih dahlau di tuk dom jalan nan hu peih.

QH Hunggary hu buh phieu brei tapa bruk muk Katalin Novak lac Tổng thống birau di taneh ia ini, ini lac mbang akok meti dalam sajarah dakrai Hunggary hu urang kumei Tổng thống saong jeng lac urang kumei Tổng thống akok meti di Liên minh châu Âu (EU). Muk Katalin Novak thun ni umo 44 thun, lac Tổng thống ranaih umo abih dalam sajarah dakrai di taneh ia ini.

Labaih 250 urang Indonesia samar hu panduan ba nao tuk ceik pui Merapi pruh tabiak. Tui jabat khik ramik song patrun hanjual bala pakat negar di Indonesia, ceik pui Merapi nyu pruh dom mbang di tuk melam, pruh khí ga, thur mun song patau atah di cambuai ceik pui labaih 5km. Gah jakar hu panuac kakei bhap bini nyaih atah di cambuai ceik pui dalam bán kính 7km kayua mbuan si pruh dung nham song thur pandiak. Urak ni, Indonesia hu jiak 130 ceik pui dok pruh./.

Urang lang: Hani Pha – Bhumi – 11/03