Mik va bangsa hu tacei pato bruk pandar điện 

Phó Thủ tướng rajaei Vũ Đức Đam bahrau mbaoh tangin tame sarak 142/QĐ-TTg harei 27/1/2022, ka danakdak  “patagok siam mekre bruk pato bac dom môn sap bangsa takik dalam danak dak pato pakai  phổ thông tuk vak  2021 - 2030”. Tui nan, jalan ngak di danak dak, lac tal thun  2025, salah bloh bruk ngak tapuk  giáo khoa, harak tacei  pato bac pakat  tiểu học ngan song  08 sap bangsa takik  hu batabiak danak dak ka janih bac (lac sap Chăm, Bahnar, Ê đê, Khmer, Jrai, Mnông, Mông, Thái); khik brei hu ginup taong abih tapuk siphau, harak tacei  pato bac  pakat  tiểu học ngan song  08 sap bangsa takik  hadei di tuk biên soạn.

Dalam dom thun tapa, meng bruk buh jien tame di Karja gam haong bruk kham merat di gah điện, dom jalan điện hu peih praong meng ban sit, ban praong tal bhum atah bayah, bhum taphia negar, bhum bhap bini bangsa takik di tỉnh Bình Phước, patagok baoh sang hu pandar điện dalam tỉnh tagok 99,15%. Abih di nyu nan lac, dalam dom harei jaik Tết Nguyên đán, rilo sang bui sambai tuk bahrau hu pandar điện hadah piah uan raok thun bahrau saong duh ka bruk ngak mbang, pala drak. Bruk buh jien tame ngak jalan điện oh lac piah ngak hu tanut gah điện palei pala bahrau, bo daok jhul patagok kinh tế, paglaong raidiuk bhap bini, rik daong praong tame bruk patruh eik, patrun kathaot dalam tỉnh.

Tui bruk yaok thun , piah klah rabha song dong ka bhap bini dalam tuk Tết mai, rilo jabat, dom mban, dom gah kapul nyaom  hu peih bruk nao rivang, brei pandap ka urang kathaot, boh sang dalam sarak karja, mik va bangsa takik, hadei di ni lac dom bruk ngak njauk caik hatai .

Hadei di 10 harei peih ngak, danak dak  “Ba Tết bui sambai mai ka urang kathaot thun anek sak rimong  2022” di  Bảo hiểm xã hội Việt Nam hu lin brei 600 sổ bảo hiểm xã hội, labaih 10 ribau thẻ bảo hiểm y tế song labaih  3.100 pok pandap tal tangin urang hu rai duik kan kandah. Bảo hiểm xã hội Việt Nam brei thau, danak dak “Brei sổ bảo hiểm xã hội, thẻ bảo hiểm y tế, jao pandap - ba Tết bui sambai mai ka  urang kathaot thun anek sak rimong  2022” hu peih ngak di  63 tỉnh, ban meng harei  17/1 hu ba bruk klah rabha, pambak tabiak hatai anit ranam  piah  Tết bui sambai hu mai haong bhap bini dok kan kandah di grauk labik dalam negar. 

60 pok pandap Tết hu alin hadiah ka dom urang ngak bruk cấp dưỡng di ban sit Phan Thiết, tỉnh Bình Thuận daok lahik bruk ngak kayua COVID-19. Bruk ngak ini daok dalam danak dak Tết jim pataom hu Gilang pariak ngak nong saong patagok palei pala Việt Nam (Agribank) pambuak bruk haong Báo Lao Động daong brei. Yaok pok pandap Tết lac jien mbaok 500.000 đồng.

Jabat rayo sap ndom VN daok di bhum kreih negar bahrau pambuak bruk haong  gilang pariak Thương mại Cổ phần Đầu tư phát triển Việt Nam (BIDV) peih bruk nao rivang,  brei pandap Tết ka mik va bangsa  Cơ Tu di tỉnh Quảng Nam. 2 Jabat  hu jao  300 pok pandap Tết, yaok pok pandap 500.000 đồng, dong ka mik va  kathaot  di  xã Trà Mai, huyện Nam Trà My và xã A Tiêng, huyện Tây Giang, tỉnh Quảng Nam njauk kan kandah kayua COVID-19. Jeng dalam mbang ni, Ngilang pariak  Thương mại Cổ phần Đầu tư phát triển Việt Nam hu jao labaih  1.000 pok pandap Tết dong kaurang kathaot, boh sang kan kandah kayua jit COVID-19 di tỉnh Quảng Nam.

Jabat khik ramik pandap trị liệu Ô-xtrây-li-a (TGA) dalam harak brei thau di harei ini (28/1) brei thau lac jabat ini anak meta brei pandar vắc-xin Covid-19 di hãng jru Pfizer piah klauk veik ka uraniah umo meng 16 tal 17 thun. Ia jru vắc-xin klauk veik ka dom urang umo thun yau angaok nan, jeng samu ia jru vaccine daok hu klauk ka dom urang umo umo labaih 18 thun saong mbang klauk veik pandar vắc-xin di Pfizer meda pandar ka taong abih dom urang hu klauk ginup dom mbang haong dom jnaih vắc-xin karei.  Ô-xtrây-li-a urak ini, lac taneh ia hu bruk klauk vắc-xin Covid-19 glaong abih di dunya.

Rilo taneh ia  châu Âu jeng daok khik rilo jalan ngak khang tanign piah pacang dom urang njom tagok glong kayua  biến thể Omicron, dalam tuk dom taneh ia patui bruk pacadu hukum. Harei 27-1 Đức khan lac urang njom  COVID-19 bahrau tuk camereip  tapa  200.000 urang , dalam tuk vak negar ni dok ginum biai ka hukum pacapp klauk  vắc xinJeng dalam harei  27-1, Mintri Y tế Ba Lan brei thau, hu  57.659 urang njom bahrau.

Dom đồng minh dalam NATO daok sahneng kuhria bruk ba lin mai di gah Timur, dalam nan hu Xlô-va-ki-a, Bun-ga-ri, Hung-ga-ri haong Ru-ma-ni kayua bruk daok catang tagok di Ucraina haong Nga. Bruk nan meda hu peih ngak tui jalan padang dom kapul mesruh haong 1.000 urang. Mbiah tal urak ini, NATO hu jaik 4 rabau lin dalam dom tiểu đoàn rilo taneh ia daok di Ét-tô-ni-a, Lit-va, Lat-vi-a haong Ba Lan, hu daong prein meng  xe tăng, kapal haoh haong dom gah tình báo saong pasang iek. Dalam sa bruk hu pambuak tal, harei 27/1, Nga ndom lac, dom urang halei sahneng lac meda patuh tabiak bruk mesruh gauk di Nga haong U-crai-na lac bruk oh njauk. Panuac ini hu ba tabiak piah ngak patrun bruk catang tagok di bhum tapen negar di Nga haong U-crai-na./.

Urang lang: Hanipha-Mousaphuong-28/1