Kuhria tal harei 8 bilan 7, dalam negar hu 18 dalam abih tih 34 bhum palei ngak blaoh danak abih baoh sang oh daok tak tahak, sumu jiak 53%. Urak ini, dalam negar daong ngak brei abih tak tahak ka 264.000 baoh sang. Sang daok veik njauk brei padang ngak meng ini tal bilan 8 labaih 25.000 baoh sang. Kuhria rah tapa, yaok bhum palei padang ngak 26 baoh sang yaok harei. Bruk kham merat ngak abih baoh sang oh daok taik tahak dalam negar dahlau harei 31 bilan 8 anak tal hu makna biak praong, uan raok 80 thun Harei negar 2/9; ta-eng bruk ngak brei abih baoh sang oh daok taik tahak ka urang hu daong taneh ia, gauk gar, urang dalam sang liet si blaoh dahlau harei 27/7 anak tal.

Mban Dam dara Kong an TPHCM pambuak haong Jabat Canh sat khik iek bruk karja ka  bruk salamat xa hoi, Kapol phuong Bàn Cờ saong Ndoan dam dara MobiFone gah meraong negar padang klau kapol ngak bruk dahlau “ Daong ka bhum palei”, daong ka bhap bini di pasak hanh chinh karja dom phuong Sài Gòn, Bàn Cờ saong Hòa Hưng. Bruk kham merat daong bhap bini ngak dom sarak hanh chinh, tui nan bac megru duah thau ilamo pacang caga dom kol duis pandar kong nghe glong saong kol co blah gah langiu, rik tame khik kajap salamat saong padang karja ngak bruk duh bhap bini.

Tui Mentri Ngak nong saong Alam moi truong, dalam adit tapa bruk kurang ia pruh di  labik luac ribaong meng binek Đồng Cam di tinh Dac Lac, taneh praong labaih 320 hecta, karja bhum palei brei njuk pruh ia caga pandiak bhang, mbiah tal ini  hu ramik pasiam. Bruk kurang ia di dom labik meda dui atah tal tuk pala drak  meyah langik daok pandiak saong suai hu hajan.

Tinh Ca Mau hu rilo kraong ribaong abih di bhum taneran kraong Cuu Long. Gam haong nan lac dom bruk kan kandah kayua langik salih karei oh lagaih, ba tal glut jaleih taneh rah tabiak dak harei dak kan kandah, kan thau dahlau. Dalam 10 thun tapa, hu labaih 28km jalan saong yaok rituh baoh sang khut tayak, kayua taneh glut jaleih, kuhria khat lahik labaih 1.120 ti dong. Dom bhum palei di huyen Nam Can klak, meng thun 2020 mbiah tal ini hu 157 mbang glut jaleih taneh tapen kraong, tapen tasik, ngak khut tayak 126 baoh sang, labaih 5km jalan saong rilo danak dak karei.

Danak dak OCOP di Vĩnh Long daok peih tabiak jalan ngak mbang birau ka bhum palei pala. Labaih 1.000 ndap nda mek hu tanut chuan, oh lac daong paglong jien mek tame ka bhap bini bo daok yaih khan ilamo bhum palei. Piah patagok yaom dom kaya OCOP, dom urang ngak tabiak kaya ini oh padeih paglong ngak pasiam, thaik thaok, paglong jalan sahaneng ka urang blei hu thau kaya OCOP. Tui nan pambuak bruk daong patagok HTX, palei ngak, pachreih bruk pablei salih tapa dom mbang nyaom darak pasar, blah web pablei salih ndien tu.

Hadei bala hat nhan thun 2011, Nhat Ban daok peih ngak brei taneh hacih njom phong xa praong abih di dunya di tinh Fukushima. Labaih pluh thun tapa, taneh ia ini tui ngak miat danak dak praong brei hacih phong xa piah pandar veik hu 75% taneh. Taneh njom phong xa hu buh tame kadung praong, caik angaok tal pacang njom, me-om tamra saong tuh tagok taneh hacih piah pacang bức xạ tabiak gah langiu. Tanut phong xa biar jang rilo mbang dut saong tanut ngak jhak tal prein yawa.

Rajaei Hàn Quốc ba tabiak rilo sarak birau daong ka bhap bini trun takik ndua nong trak jien ndien dalam tuk langik rilo mbang pandiak catang jhul tagok glong dalam bilan he ini. Jabat Pasang  iek saong Pacang caga Jit ruak Han Quoc  khan brei thau  taka so yaok kuhria meng akaok bilan he tal ini, labaih 1.200 urang njom dom janih ruak kayua langik pandiak, dalam tuk langik pandiak aval jang yaok thun, dalam nan, 7 urang metai kayua mebuh pandiak.

Jabat Ngak harak gal Di tru saong Hai quan My khan lac taneh ia ini patrauk urang ya, negar ka klau suan hukum, salih ka bruk ba urang gilac veik palei negar. Dom taneh ia taduan hu sanya oh taong paoh urang njauk patrauk saong oh ndok harak gal tui hukum. Karja My sahaneng lac, sarak ini daong trun takik urang tame negar suan hukum. Yau nan min, rilo kapol khik kein lagaih ka urang negar langiu kakei lac dom urang patrauk meda ba bao tal labik atah oh randap, oh hu gauk gar urang krein bein, oh thau panuac, oh thau ilamo saong mbuan gaok kan kandah, bala./.