Page ini 20 bilan 8, dalam tuk pahadar Cach mang Bilan 8 saong Harei negar 2 bilan 9, pahadar 80 thun padang Rajaei hu peih ngak praong prang di Ha Noi. Brei panuac di var pahadar, Tong Bi thu To Lam mboh lac, meng dom bruk ngak akaok meti hu kuhria tani tanat tal dom bruk salih birau sarak hukum dak harei dak hu siam jeng, 80 thun tapa dom urang ngak bruk Rajaei tapa dom samar khang kajap ngak bruk daong taneh ia uak drei patagok. Tong Bi thu khan lac, bruk ngak siam gheih meng kan lavik mai di Rajaei hu ndem meyai yau ini: khang hatai- ngak tui hukum- jum pataom- tapak hatai-ngak bruk- hadah krah -jak jeng - daong ka bhap bini, piah dom sarak hu njauk manuac njauk urang lac haniem phol, trei sir di yaok bhap bini rahra Viet Nam.

Hadei 6 mbang kuhria iek bruk tut angan min oh palih ruah tapa mac di Mentri Pato megru, biar harei 20 bilan 8 dom sang bac brei thau tanut diem palih ruah tame. Anek saih halei gam tame tui hatai caong khin palih ruah, mac padeih labik nan blaoh hu ba angan tame mbang pasang iek hadei di nan tra oh; gam haong nan daong dom sang bac kuhria hu tanut chuan, takik bruk gam tame blaoh oh bac piah peih bruk palih ruah hu lagaih saong njauk.

Meng harei ini 20 bilan 8, anek saih dom tal bac 1, 9 saong 12 di TPHCM tame bac, samar jang tuk vak ba tabiak di Mentri Pato megru 2 harei. Ngan haong anek saih bac tal 1 dalam adit ini saong adit anak brei tame tal bac piah ngak randap haong sang bac, tal bac, duah thau adat bruk bac di pakat tieu hoc. Daok anek saih tal bac 9 saong 12, dahlau tuk tame thun bac birau, dom sang bac brei bac kadha bac blaoh piah kanal hadar veik dahlau tuk tame thun bac birau. Thun bac ini, TPHCM hu labaih 2,5 trieu anek saih, ralo abih dalam negar.

Bruk ngak padai He Thu 2025, urang ngak nong tinh Vinh Long khat lahik trak kayua yaom padai saong asar padai yuak hu takik. Urak ini, taong abih dom janih padai trun meng 1.500 tal 2.000 dong sa kilo dut saong 2 bilan jaik ini. Tui dom urang blei padai di Vĩnh Long, yaom padai trun biar kayua padai ngak tabiak rilo dalam tuk rilo bhum palei di Bhum taneran kraong Cuu Long yuak padai sumu gauk, dalam tuk doanh nghiep pablei brah tabiak negar langiu gaok rilo kan kandah, blei daok suai damuai kayua oh ka mbaok hu harak pablei tabiak negar langiu.

Hadei pagam tinh, Ca Mau hu taneh ngak padai praong labaih 314.000 hecta saong padai yuak labaih 1 trieu 800 tấn sa thun. Tỉnh Ca Mau ba tabiak Sarak brei peih praong bruk ngak padai brah di tinh thun ini, pamong tal bruk paglong yaom kaom, patagok khang kajap saong ramik veik bruk ngak tabiak padai brah. Tapa nan, oh lac pabak bruk blei mbang dalam tinh saong rik daong pabak ginup padai brah dalam negar, jeng yau pamong dom bruk siam lagaih, khik caga alam moi truong saong patagok jien mek tame ka urang nong.

Piah jhul pakhang bruk ngak yulit di dunya saong pachreih tuai damuai dunya mai sirah rivang ma-in dom labik, Mentri Yulit saong The thao Thai Lan birau khan lac alin brei 200 ribau harak ve kapal ahaok dalam negar nao saong mai oh mek jien ka urang negar langiu dalam 3 bilan puac thun ini. Bruk ngak nan caong khin rik tame parilo tuai damuai hu mai sirah dom bhum palei daok takik urang thau.

Rajaei Indonesia khan lac kadung jien 335 ribau ti Rupi sumu 21 ti USD ka danak dak Var mbang dinh duong oh mek jien thun 2026. Tui kuhria danak dak  hu ba mai dom kein lagaih, abih di nyu nan lac doanh nghiep sit saong mbiah. Danak dak hu padang dom labik tahaneh ngak ndap mbang duh ka bhap bini, yaok ging tahaneh mbang hu phun jien buh tame meng 500 trieu tal 2 ti Rupi saong hu mbaok labih 20 labik ba kaya kan mai meng bhum palei, lac rilo janih yau baoh manuk, ikan,  njam patam saong brah.

Dom mbang pandiak dui atah saong oh lagaih meng kreh bilan 5 mbiah tal ini di Tay Ban Nha ngak labaih 2.300 urang metai, ba Tay Ban Nha hu jeng sa dalam dom taneh ia chau Au gaok khat lahik trak damah abih kayua langik salih karei oh lagaih. Pandiak catang daok ngak rilo mbang apui khuah mbang yaok pluh ribau hecta glai. Dom urang ilamo kakei dahlau, meyah oh hu dom jalan pacang caga drah samar saong suai damuai ye Tay Ban Nha saong bhum  Địa Trung Hải meda dang anak dom “ bilan he metai lahik”.