Dalam sa adit hadei Tết, dom urang njom Covid-19 yaok harei tagok glong saong yam tapa 31.000 urang dalam 1 harei. Yau nan min, dom urang ruak trak, urang metai jeng daok dreih yau tuk Tet, lac dom harei  hu menuac njom ruak bahrau takik. Tui PGS Đỗ Văn Dũng - akok khoa y tế công cộng, Đại học Y dược TP.HCM, bruk oh ka thau cambaih di biến chủng Omicron, lac urang klauk jru pacang caga COVID-19 atau bhian njom mbak Delta meda njuak ruak Omicron, yaom lac tapa pasang iek mboh ruak trak oh ralo di urang hu kluak jru blaoh, kayua yau nan ye njauk brei ngak siam taong abih dom bruk pacang caga ruak.

Sở Y tế TP.HCM pambuak haong dom quận, huyện, Ban Thủ Đức bahrau peih bruk taduan raoh jaik 300 bác sĩ bahrau bac tamat dom sang bac đại học y khoa dalam ban raya mai ngak bruk daong prein ka dom bilai iek ruak thun 2022. Ini lac bruk ngak akaok meti dalam danak dak paglaong prein iek ruak ka y tế cơ sở di gah y tế TP.HCM. Tui nan, dom bác sĩ y khoa bahrau bac tamat meda ngak bruk 12 bilan di bilai y tế ala bruk tacei pato di dom bác sĩ sang iek ruak đa khoa hạng 1 di ban raya (tui parabha bruk di Sở Y tế). Tukvak 6 bilan daok viek, dom bác sĩ ranaih umo ini mai ngak di dom sang iek ruak. Dom bác sĩ hu daong abih tih jien pasram ngak saong mbang tui sarak kanja daong jien mbang huak, nao mai, tui kuhria lac 60 triệu đồng ka 12 bilan pasram ngak di bilai y tế.

Yaom ikan pra tamo Bhum taneran kraong Cuu Long daok di tanut glong, meng 29 ribau đồng tal 30 ribau đồng, tagok 10.000 đồng sa kilo dut saong tukvak ini thun blaoh. Urang raong ikan pra daok hu laba hadei tukvak suai lavik yaom trun biar kayua jit Covid-19 ngak klaih klaoh bruk pabak ikan, sang mac kurang ikan piah ngak. Yaom ikan pra tamo tagok  glong min bhap bini njauk caik hatai ka bruk raong saong pablei  ikan piah plaik bruk ba gauk raong rilo ba tal labaih ikan saong yaom meda laik trun.

Phaok akaok UBND tỉnh Đồng Nai Võ Văn Phi brei thau, piah pacang cakak bruk kaoh taneh pablei nền, anak tal, UBND tỉnh meda ba tabiak adat bahrau ka bruk parabha taneh yau ye: mblang taneh hadei di tuk parabha mblang taneh đô thị takik di nyu lac 60m2 saong taneh ngak nong takik di nyu lac 80m2, taneh ngak nong di đô thị takik di nyu lac 500m2, taneh ngak nong di palei takik di nyu lac 1.000m2. Abih di nyu nan lac, dom mblang taneh ngak nong parabha jeng rilo binah sit saong brei ka rilo urang dang ngak po meda hu cih vak cambaih “taneh ngak nong oh hu brei adat padang ngak dom danak dak; mayah padang ngak meda hu yah klaak”, piah pacang cakak bruk parabha taneh ngak nong pambak tabiak rilo, blei mai, pablei nao mek laba, ba tal bruk padang ngak suan hukum, ngak tabiak dom labik bhap bini eng drei padang labik daok, ngak tayah quy hoạch.

Luật sư Trần Thị Ngọc Nữ - Akok Chi hội Luật sư, Hội Khik caga quyen uranaih TP.HCM, urang khik caga quyền lợi ka uranaih V.A (8 thun, njauk urang taong metai di quận Bình Thạnh, TP.HCM) brei thau, harei ini (16/2) hu payua harak tal Jabat CSĐT Công an TP ka bruk salih duis  ngan saong bị can Nguyễn Kim Trung Thái (ame pajeng di kamuan V.A) meng “ Taong paoh urang karei” saong “ Padauk duis” tapa “ Pametai manuac”  kayua pambuak bruk ngak suan. Luật sư Nữ jeng hu khan cambaic laic, meyah kaoh karei bruk suan di Trang piah langyah jeng dua duis lac oh ka njauk, njauk brei pasang iek langyah bruk taong paoh dalam tukvak dahlau harei 22/12 lac bruk trak, kuhria khung duis pametai manuac. Bị can Nguyễn Kim Trung Thái jeng yau Trang njauk duis “Ngak pap uranaih”.

Harei ini, công ty năng lượng praong abih Australia  Origin bahrau brei thau lac karieh pambang sang mac điện dang Eraring di krieh thun 2025, aval jang 7 thun dut saong bruk ba tabiak. Meng prein khang 2280 megawatt, sang mac điện dhang Eraring lac sang mac điện dhang praong abih dalam abih tih 16 sang mac điện dhang di taneh ia ini. Bruk sang mac điện dhang praong abih Australia kariek pambang aval jang dut saong jalan ba tabiak brei mboh dom sang mac điện di taneh ia ini daok gaok kan kandah praong abih mai meng caong khin di darak pasa jang yau bruk mariak gauk dak harei dak catang dom janih nhiên liệu hacih.

Tui urang ngak praong Guatemala, mbang megei baoh taneh khang 6,2 di gah Pei negar ini di page 16/2 ngak kan kandah tal raidiuk di labaih 31.000 bhap bini. Pasak di mbang megei baoh taneh daok di labik dalam 84 km ngak glut jaleih taneh  praong, khut tayah rilo baoh sang, ngak lahik điện  di dom ban dalam taneh ia ini. Glut jaleih taneh jeng rah tabiak  di jalan meng ban ine tal Antigua, ban du lịch praong  di Guatemala. 

Mỹ saong NATO brei thau lac Nga jeng daok pataom kapul vil val U-krai-na yaom lac Mát-xcơ-va hu panuac lac ba bol bala tabiak. Meng Mỹ tal NATO jeng daok medil ka bruk lac Tổng thống Nga Vla-đi-mia Pu-tin meda halain hatain ginum biai sa jalan langyah ka bruk srau kadau urak ini halei oh. Tổng thư ký NATO Jens Stoltenberg brei thau bruk nao mai di lin saong xe tăng oh ginup piah brei thau lac Nga daok ba lin tabiak saong ka oh mboh bruk Nga daok patrun bruk./.

Urang lang: Thu Thao& A.Nghiem – 17/2/2022