Bình Phước hu jalan taphia negar atah jaik 260 km. Taphia negar hu 15 xã di 3 huyen Lộc Ninh, Bù Đốp saong Bù Gia Mập. Dalam 5 thun tapa, dom pakat Kapol Dam dara Viet Nam tinh Binh Phuoc hu peih ngak 140 danakdak  ngan haong 1.625 baoh gom ia harei. Dom danak hu ba tame pandar piah rik daong khik ramik an ninh trat tu, salamat jalan mbak, abih di nyu dalam tuk jalan mbak di bhum atah bayah, bhum ceik daok rilo kan kandah. Tui nan, rik tame dak padang bruk taong abih bhap bini khik caga kajap, pabak prein pakhang piah khik bruk ngak po, an ninh bhum taphia Negar.  

Nyaom roya dom bangsa takik tỉnh Hậu Giang mbang ka 4 ngan haong “ Dom bangsa jum pataom, salih birau, patagok kien lagaih, ba drei tame saong cak rok patagok khang kajap” birau rah tabiak. Di nyaom roya, muk Nông Thị Hà, Thứ trưởng, Pho Akok Ủy ban Bangsa caong khin, tukvak tapa, pakat uy, karja dom pakat brei caik hatai kuhria bruk pato pakai, pabak ilamo, parilo urang ngak, abih di nyu lac urang jakar bangsa takik di labik; khik ramik saong patagok ilamo meng kan do dom bangsa; patui nan paglong asar saong bruk ngak pato pasram, pabak ilamo, pato bruk ngak  ka dam dara urang bangsa  takik…

Pasak Jitvu kaya nong huyen Chợ Gạo, tỉnh Tiền Giang  daok peih bruk jak ba urang ngak nong tak klak bein phun la-u kayua halak akok juk mbang palai, oh diuk veik. Tui nan, caong khin jabat chuc nang hu jalan daong urang ngak nong pala la-u gaok khat lahik nan. Mbiah tal ini, taneh pala la-u birau njom ruak di huyen Chợ Gạo lac labaih 245 ha di 620 baoh sang pala. Piah caga halak akok juk  palai mbang hu siam, Pasak Jitvu ngak nong huyen Chợ Gạo caong khin UB bhap bini huyendaong jien piah urang nong caga veik, pametai halak akok juk.

Daok dalam bhum ia kraong ribaong pacang vin taom dar, yau nan ye huyện Trần Đề, tỉnh Sóc Trăng bhian gaok kan kandah meyah njom ia mbak saong kurang ia taba di bilan pandiak thu. Piah ngak hu siam balan  Đông Xuân lac bilan padai ralo dalam thun, labaih 2 adit ini urang ngak nong thuvi thuvar hoang bruk drak trun pajaik padai caong khin brei yuak hu rilo padai brah. Thun 2016, Sóc Trăng hu yaok ribau hecta hamu padai palai lahik kayua njom ia mbak. Tapa mbang daok njom ia mbak saong pandiak bhang  dui atah, karja palei,gah ngak nong brei padang  tukvak trun pajaih ka lagaih, plaik njiak nyom ia mbak biak siam.

Tỉnh Long An birau gaok kan kandah biak trak kayua hajan praong rilo harei saong ia rubuk tagok samar, ngak ralo taneh pala padai, njam patam saong phun mbang baoh khat lahik. Di xã Bắc Hòa, ia ribuk  dauk dalam ngak brei karja samar ngak brei pakajap jaik 6km ar ribaong dalam mblang hamu. Huyện Tân Thạnh hu 236 ar pacang, dalam nan hu 189 labik ar pacang sir, labik pacang iek hu siam ka taneh pala drak labik bhum kreh ia ndik Đồng Tháp Mười. Yau nan min, tabung glong ia ndik, meng blaoh, hu labaih 30.000ha taneh ngak nong njuak ia ndik ar tame. Urak ini, dom bhum palei daok pakhang bruk pasang eik, padang dom kapol xung kich “pak bruk di sa labik” piah khik padai ka mikva

Hãng harak thông tấn di Triều Tiên KCNA khan ka Tapuk mbong, dalam nan hu ndem puac lac Tổng thống Hàn Quốc Yoon Suk Yeol ngak mbuan tagok bruk mesruh metak tapa dom sarak ngan haong Triều Tiên. Tukvak tapa, Triều Tiên hu rilo bruk ngak piah cakak dom gah di Triều Tiên yau ye ramik pasiam Hukum brei mboh Han Quoc lac “ taneh ia jhak hatai” saong lac bruk yasa 2 gah Triều Tiên oh daok tra. Bilan 10 meng blaoh, Triều Tiên patuh dom jalan raya  saong jalan pasei pambuak Hàn Quốc.

Nhật Bản hu khan lac bruk mbuan glut jaleih taneh saong ia ribuk kayua ribuk Kongrey. Jabat Khí tượng Nhật Bản khan lac yawa langik pa-uh …ba tal hajan praong haong ribuk di gah Pei taneh ia ini bo meneing kayua ribuk Kongrey ngak hajan. Karja ban Matsuyama brei pathau khan tal pakat glong abih, caong khin jaik 200 ribau urang di 10 quận panduan ba saong khik brei salamat.

Tapa bruk duah thau hatai sahaneng puac abih di dunya ka bruk meriak gauk palih ruah tổng thống Mỹ thun 2024 hu rayo papar binguk  NBC News ba di harei 3/11 mboh lac, Phó Tổng thống Kamala Harris di đảng Dân chủ saong ong Donald Trump di đảng Cộng hòa hu 49% urang cu tri njuak hatai tut angan saong hu 2% cu tri khan lac oh ka thau palih ruah thei. Harei palih ruah Tổng thống Mỹ lac harei 5/11 min kuhria tal harei 2/11, hu labaih 72 trieu hala phieu hu buh palih blaoh./.