Cục Khik iek urang ngak negar langiu ( Mentri Lao động-Thương binh saong Xã hội) birau brei thau bruk palih ruah urang tame Danak dak ba dieu duong, ho ly Viet Nam tapa ngak bruk di Nhật Bản tui Harak pambuak bruk kinh tế Việt Nam-Nhật Bản (VJEPA) mbang 12 thun 2023. Hu mbaok tame danak dak ini, dom urang nan hu brei abih jien mbang huak, labik daok, bac megru; hu daong jien karei veik dalam tuk daok bac sap Nhật dalam 12 bilan di Viet Nam. Jien bilan  di urang dieu duong saong ho ly bhian meng 160.000 tal 180.000 yen sa bilan, lac samu 28 tal 33 trieu dong. Langiu di jien bilan, dom urang nan  daok hu taduan dom jien phu cap sumu haong bruk ngak hu.

 Harei pataom Ahar Bánh mì Việt Nam kayua Kapul Du lịch saong Sở Du lịch TP.HCM pambuak gauk peih ngak ngan haong kadha “yaom glaong pandap mbang negar” daok hu peih tabiak di Quận 1- TPHCM. Dalam dom bruk di harei pataom, meng ini tal harei 2/4 hu dom bruk ngak, yau ye ginum biai asal kadha “ jalan cak rok patagok di ahar bánh mì Việt Nam”; parang iek, ba drei tame ngak ahar bánh mì; yaih khan 105 pandap mbang gam haong bánh mì... Harei pataom piah daong dak padang saong brei mboh yaom glaong, jeng yau angan je di bánh mì Việt Nam, gam haong nan, pok mayaom dom urang ngak hu saneng duah jalan ngak tabiak yaom glaong di yaok baoh ahar bánh mì.

Urak ini, Đồng Nai daok tame bilan paik baoh pa-ok blait  saong amriak kalu min thun ini, urang ngak nong gaok kan kandah kayua yaom pa-ok blait  trun biar, phun brei takik baoh takik asar jang. Dom labik hu taneh pala ralo yau TP Long Khánh, huyện Xuân Lộc, huyện Cẩm Mỹ, bhap bini daok haduh hatai kayua oh ka duah hu jalan langyah. Ong Võ Văn Phi – Phaok akok UBND tỉnh Đồng Nai lac: piah patagok khang kajap, trun takik di abih  bruk urang ngak nong pala pa-ok blait saong amriak kalu takik hu asar, trun yaom yau urak ini, gah  ngak ong njauk brei quy hoach  labik taneh pala praong, padang ngak chuoi pambuak meng bruk pabak pandap tamo tal bruk ngak tabiak saong pablei pandap.

 Di huyện Đầm Dơi, tỉnh Cà Mau bahrau hu bruk asau khla maruai kaik 3 urang di xã Ngọc Chánh. Dom urang njauk asau kaik jeng hu klauk huyết thanh  pacang maruai saong vắc xin caga maruai. Meng akaok thun tal ini, Cà Mau hu  7 urang njauk ruak asau maruai kaik. Piah pacang caga ruak maruai, gah y tế kakei lac, rahra tuk mboh asau medil lac njauk maruai ye brei khan chip ka kanja palei thau. Dom urang medil lac njauk asau maruai kaik, njauk ngak catang bruk klauk jru vắc xin maruai ginup mbang, njauk tukvak tui panuac pato tacei. Taong abih dom drei asau, mreo dalam bhum hu jit brei hu kareik, brei daok karei piah tui iek.

 Viện pasang iek bhap bini tỉnh Bình Dương hu mbaoh tangin tame harak brei adat chap mek menuac dalam samar drah ngan haong 5 urang lac jakar ngak praong, urang đăng kiểm di Pasak  Đăng kiểm xe cơ giới 61-09D, di phường Bình Hòa, ban Thuận An piah duah thau bruk “mbang jien”. Dom urang nan, njauk cong chap khik  chip di harei 29/3/2022. Kong an tỉnh Bình Dương jeng brei pacang veik, pasang iek di Pasak Đăng kiểm xe cơ giới 61-09D piah duh ka bruk duah thau dom bruk ngak suan dalam tuk pasang iek radaih.

Thủ tướng Anh brei thau lac taneh ia ini mek hu sanya tame Hiệp định pambuak gauk taong abih gah saong hadah krah tapa Thái Bình Dương (CPTPP) – hu 11 taneh ia hu mbaok tame, dalam nan hu Nhật Bản saong Australia. Bruk  ini rah tabiak  dalam tuk London daok duah jalan pambuak catang veik talei pambuak gauk dalam bhum saong padang mạng lưới pablei salih dunya hadei di tuk tabiak truh Liên minh châu Âu (EU). Jabat Thủ tướng Anh taong yaom,  ini lac sanya pablei salih praong abih di London dalam tukvak hadei di Brexit. Tui Thủ tướng Anh, sanya ini brei mboh dom kein lagaih di kinh tế biak bai meng dom quyen eng drei di kol drei dalam saman hadei Brexit”.

Takik di abih 12 urang metai dalam bruk glut bingun ia di sa kalan pak ban Indore, dalam bang Madhya Pradesh di Ấn Độ. Bruk nan rah tabiak tuk dom urang tui agama daok hu mbaok tame ngak adat Ram Navami – lac sa adat praong di agama Hindu. Bruk ba tal bala nan meda lac kayua urang pataom gauk biak ralo di labik mbaok bingun ia, ba tal tapa prein. Thu tuong Ấn Độ payua panuac klah rabha pandik harao tal baoh sang dom urang gaok bala, saong brei mboh dom kham merat di dom gah daong piah samar daong ba dom urang daok gar,  tavak.

Harei 2/4 anak tal, rajaei Australia  meda peih ngak danak dak “paglaong hatai sahaneng” ka jit praong COVID-19 bahrau, piah pabak makna praong saong yaom glaong di bruk klauk jru. Danak dak ini hu peih tabiak hadei di tuk hu Kapul langyah ilamo ka bruk klauk jru Australia kakei yaok rahra njauk nao klauk jru vắc xin mbang hadar veik piah pacang caga COVID-19 pabak ka thun 2023. Mintri Y tế Australia ndom lac, bruk klauk mbang vắc-xin hadar veik lac hu makna biak praong dalam tuk dom bruk njom mbak COVID-19 bahrau hu kuhria mboh lac meda tamuh tabiak di taneh ia ini dalam bilan laar ini./.