Pachreih tui Bilan tabung glaong kayua urang kan kathaot, danak dak “Ban raya bak hatai anit – pambuak hatai ranam” thun ini di TP.HCM hu peih tabiak di melam 30/10 anak tal. Tapa danak dak ini, UB MTTQ Việt Nam TP.HCM kham merat jak ba Kadung jien hu 40 tỷ đồng saong MTTQ dom pakat jak ba hu labaih 125 tỷ đồng. Meng pok jien ini, MTTQ TP.HCM patui jalan daong pabak dom bruk daok kurang di baoh sang kataot, sang jaik kathaot tui sarak patrun kathaot rilo gah di TP, abih di nyu lac caga ka Tết Nguyên đán anek sak ine girai 2024, daong padang ngak, ramik pasiam sang anit ranam, alin hadiah pandap ngak mbang duah jien, bac bruk ngak, brei jien bac, daong thẻ bảo hiểm y tế... 

Mban khik ramik danak dak buh jien tame padang ngak jalan mbak tỉnh Tiền Giang brei thau lac daok ngak dom harak gar, adat, peih bruk to yaom piah tal puac thun peih bruk padang ngak tatua Tân Phong. Tatua Tân Phong hu phun jien buh tame ngak abih tih lac labaih 239 tỷ đồng; dalam nan, phun jien peih mbaok taneh jaik 65 tỷ đồng, nao tapa kraong Năm Thôn (dhar di Kraong Tiền) pambuak cù lao Tân Phong haong huyện Cái Bè. Tatua hu ngak lac gah tatua praong atah 359 mét, hu 9 nhịp; mbaok tatua praong 9 mét, labik brei ka ghe gilai nao mai glaong 7 mét, gar 30 mét. Huyện Cái Bè saong Cai Lậy daok peih mbaok taneh samar drah padang ngak tatua Tân Phong, daong ka bruk nao mai, pajeng ba pandap panda hu mbuan lagaih ka mikva, oh daok bruk tapa kraong njauk cang phà yau tukvak tapa.

Urang ngak nong tỉnh Hậu Giang biak uan tabuan ka bilan padai Thu đông thun ini kayua yuak hu rilo padai brah, gam pablei hu yaom. Bilan ini, dalam tỉnh Hậu Giang hu trun pajaih yam tapa bruk ba tabiak, lac 27.100 ha, tagok labaih 2.600 ha dut saong  bruk ba tabiak. Dom pajaih padai  ralo meng lac: OM 18, OM 5451, RVT saong Đài Thơm 8. Kuhria tal urak ini, urang ngak nong di dom huyen Châu Thành A, Phụng Hiệp, Vị Thủy, Long Mỹ saong ban Vị Thanh yuak hu jaik 11.000 ha. Padai yuak hu ralo jang bilan ini thun dahlau, meng 600 - 750 kilo sa công taneh, yaom padai  glong meng 7.500 -8.000 đồng sa kilo, kuhria tui pajaih saong asar padai siam, glong jang jaik 1.500 đồng sa kilo dut saong tukvak ini thun dahlau.  Meng padai pala njauk, hu rilo saong yaom pablei glong, kuhria bilan Thu đông ini, urang nong Hậu Giang laba hu meng 30 - 35 trieu dong sa ha.

Sa urang njauk ruak đậu mùa khỉ di TP.HCM metai. Sở Y tế ban raya hu pato tacei padang ngak Kapul ilamo piah langyah saong hu panuac tamat tantu cambaih laih ka urang ruak ini. Urang ruak lac likei, umo 30 thun, hu taong ruak đậu mùa khỉ labaih 10 harei di Sang iek ruak Nhiệt đới TP.HCM. Urak ini, TP.HCM hu 20 urang njauk ruak đậu mùa khỉ daok taong ruak di Sang iek ruak Bệnh Nhiệt đới, dalam nan hu 18 urang mboh dương tính HIV. Dalam dom urang ruak nan, hu 2 urang ruak trak ngan haong dom ruak njauk nhiễm trùng darah, laka mô tế bào, laka tầng sinh môn, giang mai biak trak; áp xe phổi, laneh màng phổi, laka kalik…

Harei ini, Kong an huyen Bắc Tân Uyên, tỉnh Bình Dương brei thau, daok chap khik Triệu Minh Sang ( umo 26 thun, palei Bình Phước) piah pasang eik, ngak brei cambaic laic bruk “ Co blah drap ar”. Tui pasang iek, dahlau di nan, Sang ngak urang pambuak bruk pablei taneh riya di TPHCM. Min jaik ini darak pasar taneh riya dang sa labik, nan ye pablei salih gaok kan kandah. Oh hu jien pandar cai saong bayar sraiy, nan ye Sang sahaneng tal bruk blah drap ar. Melam 23 bilan 10, Sang ba tui to saong iew taxi pajeng meng TPHCM nao tỉnh Bình Phước. Tuk radaih nao tal tỉnh Bình Dương ye Sang iew  urang padeih radaih. Mboh jalan jua lange, Sang kateik to urang peih radaih taxi piah blah mek jien. Urang peih radaih  prew daong saong kong an chap hu Sang tuk daok nduac dauk jaik labik nan. Khan haong kong an, Sang taduan abih bruk drei ngak.

Đảng Cộng hòa harei kabroi hu ba Hạ nghị sỹ Mike Johnson ngak ứng cử viên di ndang ini ka labik ngak Akaok Hạ viện. Ini lac urang ka 4 hu pilih ruah di ndang Cộng hòa ka labik ngak urang dang akaok Hạ viện, 3 urang dahlau jeng eng drei likau tabiak hadei di tuk rilo urang nghị sỹ dalam ndang brei thau lac oh pachreih tui dom urang nan dalam mbang buh phieu. Hạ viện Mỹ urak ini jeng ka oh hu urang dang akaok meng di tuk ong Kevin McCarthy njauk padeih brei ngak atah di ini 3 adit. Kayua daok hu rilo menuac jang di Hạ viện nan ye bruk pok tagok ngak akaok jabat ini hu brei thau lac bruk di ndang Cộng hòa, min, dom bruk oh njauk gauk di dalam ndang daok ngak ka bruk pilih ruah sa urang ngak njauk gaok cuang kandah. Hạ viện Mỹ meng akaok thun njauk lahik tal 15 mbang buh phien meng pilih ruah hu urang dang akaok tuk nan lac ong Kevin McCarthy.

Mintri Quốc phòng Trung Quốc harei ini tabiak panuac oh njauk hatai ka pathau khan prein khang quân sự di Trung Quốc kayua Mintri Quốc phòng Mỹ bahrau ba tabiak, lac pathau khan ini oh iek tui bruk di anak meta, bo tui hatai sahneng ka bruk patagok prein khang quân sự di Trung Quốc dalam dom gah mạng, không gian saong hạt nhân. Urang brei panuac di Mintri Quốc phòng Trung Quốc Ngô Khiêm ndom lac, dalam tuk bruk an ninh dunya trak damak saong srau kadau urak ini, Trung Quốc brei padang sa bol bala khang kadang piah patrun patakik bruk ba tal mesruh metak, khik caga an ninh taneh ia saong khik ramik sron mbon dunya, oh pamaong tame taneh ia halei atau sa labik halei. 

Jabat Năng lượng Dunya (IEA) harei kabroi brei thau lac, bruk caong pandar di dunya ka dang, manjek saong janih cuh tự nhiên meda lac mbang camriep tagok tal tabung glaong di dalam piluuh thun ini. Dalam tuk bruk salih jalan kinh te di dynya hu makna biak praong ngan haong nhiên liệu hóa thạch. Dom nhiên liệu hóa thạch dalam gah pabak năng lượng dunya, tuk halei jeng khik di tanut 80% dalam rilo piluh thun tapa, meda trun daok 73% di thun 2030. Dom khí tathuak nerak carbon dioxide (CO2) pambuak tal năng lượng dunya meda mek hu tanut glaong abih di thun 2025. Tui kuhria năng lượng pasiam veik meda rik tame 80% prein phát điện bahrau di thun 2030 tui dom sarak urak ini, dalam nan taeng di năng lượng ia harei meda meblah labaih mateh di tanut peih praong ini./.