Bhum Nam bộ hu 308 xã, meblah labaih 9% dom xã bhum mikva bangsa takik saong bhum ceik dalam taneh ia. Tukvak 2021-2023, taong abih tih phun jien hu parabha di Danak dak cak rok patagok KT-XH bhum mikva bangsa takik ka dom tỉnh Nam bộ lac labaih 2 ribau tỷ đồng meblah labaih 5,4% taong abih tih phun jien di Danak dak. Dalam 3 thun tapa, dom tinh, ban dalam bhum ngak hu saong yam tapa rilo tanut ba tabiak. Urak ini, dom baoh sang kan kathaot dalam bhum mikva bangsa takik di 13 tinh, ban gah maraong negar daok 1,89%. Min, bruk brei masaiy phun jien di danak dak bahrau hu labaih 25%. Makna lac kayua bruk paraba phun jien di dom tinh, ban daok suai damuai.

Mban bangsa tỉnh Ninh Thuận bahrau peih mbaok tal pato pasram urang hu angan je dalam bhap bini bangsa takik. Dalam tukvak 3 harei, 124 urang hu angan je dalam bhap bini bangsa takik hu khan brei thau 5 kadha pambuak tal bruk: pathau khan, jak ba dalam bhum bhap bini bangsa takik. Tapa tal pato pasram ini, piah paglaong bruk ba akaok nao dahlau di dom urang hu angan je dalam bhap bini bangsa takik, gam haong nan, paglaong hatai sahneng ka urang hu angan je ka jalan sahneng, jalan ngak di Đảng saong karja ka bruk bangsa saong peih ngak sarak bangsa.     

 UBND tỉnh Tiền Giang bahrau peih bruk padang ngak tatua Chợ Gạo. Tatua Chợ Gạo hu ngak di labik akaok ribaong Chợ Gạo pambuak  xã Tân Mỹ Chánh, ban Mỹ Tho saong xã Xuân Đông, huyện Chợ Gạo ngan haong phun jien padang ngak labaih 263 tỷ đồng. Ini lac jalan hu makna praong pambuak haong bhum kinh tế di tỉnh Tiền Giang ngak jeng jalan nduac meng huyện Cái Bè tal huyện Gò Công Đông ngak jeng prein khang cak rok patagok KT-XH di tỉnh.

 Gah An ninh điều tra, Công an tỉnh Đắk Lắk bahrau tabiak harak duah cap mek Y Huăl Êban, umo 53 thun, daok di buôn Mắp, ban sit Ea Pốk, huyện Cư M’gar. Dahlau di nan, harei 3/7, urang ini njauk Gah An ninh điều tra, Công an tỉnh Đắk Lắk khởi tố bị can ka duas “Khủng bố piah cagar veik karja bhap bini” tui paka 113, Hukum Hình sự thun 2015. Pambuak tal bruk nan, tuk dah page harei 11/6, kol nyu taong tame labik ngak bruk di UBND xã Ea Tiêu saong xã Ea Ktur dalam huyện Cư Kuin, tỉnh Đắk Lắk, ngak brei 9 urang metai, 2 urang njauk rambus.

Công an huyện Đồng Phú hu cap mek Nguyễn Minh Tuấn (umo 39 thun, daok di xã Thuận Phú, huyện Đồng Phú) piah pasang iek, ngak cambaih bruk rapeih rapai uranaih. Nguyễn Minh Tuấn lac Bí thư kapul dam dara di Công ty Cổ phần Cao su Đồng Phú. Jala pandiak harei 30/6, Tuấn blei ahar ba nao tal sang adei V.T.H.N (umo 11 thun, daok di xã Thuận Phú). Tuk mboh N saong sa adei sit daok pak sang, Tuấn hu ngak bruk jhak ngan haong adei N. tuk bo T oh caik hatai tal, N hu nduac tabiak langiu, pathau khan haong sang. Thau hu bruk nan, gauk gar mai pasang iek, khik Tuấn dalam sang, hadei di nan pathau khan ka công an.  Urak ini N. hu jabat chức năng ba nao taong yaom di Pasak pasang iek pháp y tỉnh Bình Phước. Bruk ini daok hu jabat chức năng pasang iek, duah thau.

Đài Khí tượng pakat negar Trung Quốc daok ba tabiak panuac khan brei thau dahlau di tanut hijao ka hajan praong dalam taneh ia, hadei di tuk Mban tacei pato pacang caga ia sua saong pandiak bhang pakat negar ba tabiak bruk pacang caga samar drah pakat 4 anak bruk hajan ia sua di Trùng Khánh saong dom tỉnh. Chủ tịch Trung Quốc hu tabiak tacei pato, ieu dom dom gah pambuak tal bruk nan, brei patagok bruk pambuak gauk, tacei jalan ngak, taong yaom, ngak siam bruk tui iek, khan brei thau aval, tacei pato njauk, cambaih dom labik mbuan gaok bala brei ngak siam bruk pacang caga bala meng langik tasik, dalam nan hu ia sua di angaok dom kraong, danao mbiah saong sit, jeng yau bruk dauk ia dalam ban, dalam đô thị, kham merat abih drei piah daong, pasiam dom khut khat kayua bala meng langik tasik. 

Hàn Quốc meda samar drah ba tabiak bruk di drei, hadei di tuk jabat pasang iek hạt nhân di Liên Hợp Quốc (IAEA) brei tapa jalan ngak di Nhật Bản ka bruk brei tathuak ia phóng xạ hu tapa langyah meng sang mac Fukushima tabiak tasik praong. Hàn Quốc iek praong dom bruk ngak di Jabat Năng lượng Nguyên tử dunya kayua ini lac kapul hu dunya pok brei angan. Yaom lac yau nan Hàn Quốc meda ba tabiak bruk taong yaom ka bruk IAEA pasang iek jalan tathuak ia nerak di Nhật Bảnjeng yau bruk langyah ia nerak.

Karja Taliban di Afghanistan hu panuac ieu dom thẩm mỹ viện kreik pabah mbang. Dom labik ngak mekre, ngak siam binai hu mboh rilo di Afghanistan meng di puac thun 2001. Rilo thẩm mỹ viện jeng daok peih pabah mbang hadei di tuk Taliban mai veik pan karja atah di ini 2 thun, piah ba mai bruk ngak ka dom urang kumei saong duh ka tuai damuai. Dahlau di nan, Taliban oh brei ka urang kumei bac đại học saong pacang dom urang kumei ngak bruk ka dom jabat daong ka Afghanistan. Rilo labik hu rilo menuac jeng pakauk urang kumei tame. Dom bruk ngak ini, piah patrun patakik urang kumei nao tal dom labik hu rilo menuac di taneh ia Tây Nam Á ini./.