Bộ đội biên phòng taduan anek saih sang biak kan kandah mai raong di dom bilai 

Dah page ini, di Hà Nội, hu peih Nyaom roya pakat negar Kapul Doanh nhân ranaih umo Việt Nam mbang ka 7, tukvak 2022 – 2025, hu mbaok di 700 urang lambaok ka labaih 11 ribau urang dalam Kapul Doanh nhân ranaih umo Việt Nam meng grauk dom tinh, ban, dom gah dalam taneh ia.

Ong Đinh Việt Thắng, Akaok Cục Hàng không Việt Nam brei thau, hadei di tuk urang dang akaok Bamboo Airways lac ong Trịnh Văn Quyết njauk cap kreik, dalam tuk cang panuac brei thau di gah điều tra, urang dang akaok Mintri Jalan mbak Pajeng ba, Cục Hàng không Việt Nam jeng biak caik hatai sangka tal bruk ngak di Bamboo Airways, abih di nyu lac khik kajap an ninh, sron mbon bruk par saong quyền lợi tuai damuai di Bamboo Airways.

Dalam 5 thun, meng thun 2016 tal urak ini, peih ngak danak dak “Daong takai yam adei nao tal sang bac”, yaok thun, Đảng ủy, Bộ Tư lệnh Bộ đội biên phòng hu taduan daong ka jaik 3.000 anek saih, tui yaom daong yaok adei lac 500.000đ sa bilan mbiah tal tuk bac blaoh tal 12, meng kadung jien di urang jakar, urang lin halan hatian rik tame daong. Thun 2018, Bộ đội biên phòng daok hu peih tabiak bruk taduan anek saih sang biak kan kandah mai raong di dom bilai ngan haong angan ieu ac “anek raong di đồn Biên phòng”. Urang jakar đồn biên phòng hu dang tabiak pato tacei ka dom adei jeng ranaih naih joi, lac rahra hu kein laba ka taneh ia.

Tui yaok pataom di Gilang pariak sarak karja Việt Nam dhar tỉnh Đồng Nai, yaom jien brei sraiy ka dom sang kan kathaot, sang jaik kan kathaot saong sang bahrau tabiak truh kan kathaot dalam bhum urang bangsa takik, kuhria rah tapa lac 32 triệu 700 rabau đồng sa baoh sang. Langiu di nan, dom sang caong khin mesraiy rilo jang, meyah pabak hu bruk ba tabiak, hu brei mesraiy tal 100 triệu đồng. Dalam labaih 11 rabau bhap bini bangsa takik sraiy phun jien dalam vaktu 2016-2021, sang urang Low mesraiy rilo di abih, labaih 78 tỷ 400 triệu saong jaik 3 rabau 700 mbang urang sraiy. Daok urang bangsa Chơro hu labaih 2 rabau 100 mbang baoh sang hu mesraiy haong yaom jien labaih 54 tỷ đồng; 2 rabau sang urang bangsa Tày hu mesraiy labaih 47 tỷ đồng; jaik 2.500 sang bhap bini dom bangsa takik karei karei daok mesraiy yaom jien labaih 61 tỷ đồng.

Tỉnh Tiền Giang hu dom doanh nghiệp, labik ngak gilai pasei rilo di abih dalam bhum ĐBSCL.  Jaik di ini, yaom thép tagok glaong di abih dut saong dom pandap panda karei, ngak kan kandah ka gah padang ngak. abih di nyu nan lac gah ngak gilai pasei di tỉnh Tiền Giang daok joa gidang tuai damuai; rilo doanh nghiệp ngak gilai daok gaok kan kandah kayua lac meng hadei di Tết tal urak ini ka oh hu urang halei mai pambuak bruk ngak gilai bahrau.

Dom khau tin di rajaei Japon harei ini (31/3) brei thau, taneh ia ini meda brei ngak catang dom bruk ka giao dịch jien điện tử piah daong dom bruk taong phạt Nga hu siam jang. Bruk ngak nan di Japon daok dalam 1 binah di danak dak hukum pasiam ngoại hối saong pablei salih, piah pacang cakak jien tiền điện tử jeng labik huan piah plaih dom bruk taong phạt. Gam haong nan, rajaei jeng hu jalan ngak piah patrun bruk urang njauk taong phạt ba drap ar jien điện tử tapa tài khoản di gah ka 3.

Karja rilo tinh, ban di Trung Quốc daok jhul khang, ramik pasiam veik bruk ngak langiu mon “996” (meng maong 9 dah page tal maong 9 melem saong 6 harei dalam adit) piah khik kein laba saong prein yava di urang ngak. Tui hukum Trung Quốc, urang pandar urang ngak meda dui atah tukvak ngak bruk hadei di tuk sua tangi panuac di gah công đoàn saong urang ngak. Min, maong ngak langiu oh tapa 1 maong dalam harei, mayah tukvak ngak bruk dui atah jang, urang pandar urang ngak njauk khik tani tanat dom bruk ka prein yava di urang ngak, tukvak ngak bruk hu dui atah viek oh tapa 3 maong sa harei, min oh tapa 36 maong sa bilan.

Dalam tuk dom urang njauk COVID-19 tagok rilo veik di mangaok dunya, Gah Y tế dunya (WHO) hu ba tabiak 3 kadha njauk caik hatai sangka, lac bruk hu dom biến thể bahrau, bruk pacadu dom jalan pacang jit biak aval saong bruk patrun prein pacang ruak hu meng vaccine tui tukvak. WHO hu rilo mbang tacei tabiak 3 kadha ini pambuak haong gauk ba tal bruk mbuan tamuh mbang jit bahrau di mangaok dunya. Pambuak tal bruk trun prein pacang ruak meng vaccine, WHO brei thau, hu bruk trun siam lagaih di vaccine tui tukvak saong nan lac makna brei ka rahra njauk klauk mbang pabak./.

Urang lang: Thu Thao – M. Phuong – 31/03