Du thao Hukum Pacang apui khuah, padam khuah saong daong urang gaok bala hu brei pabak, asar kadha brei mboh cambaic laic bruk ngak di yaok urang dalam Pacang caga apui khuah, padam khuah saong daong duah urang gaok bala nan lac: bruk ngak di urang dang kaok cơ sở; urang peih radaih; urang ba tabiak jalan buh jien tame ngak, po buh jien tame ngak, po radaih; po sang, urang saong dom labik brei papah, brei nyim, brei sang daok oh abih jien.

Liên đoàn Lao động tỉnh Bình Dương bahrau peih bruk pok meyaom 31 po sang trọ hu angan. Dom po sang trọ hu pok meyaom oh padeih kham merat pasiam labik daok, ngak brei labik daok haci hacih, siam mekre salamat ka urang ngak. Rilo po sang trọ daok hu daong ka urang ngak gaok kan kandah. Meng nan, urang ngak mboh sahanang hatai piah ngak bruk, rik prein cakrok ka tinh. Ong Mai Hùng Dũng, Phaok akaok UBND tỉnh Bình Dương brei thau, bruk pok meyaom dom po sang tro hu angan oh lac brei mboh bruk rik daong di urang, bo daok lac panuac ieu menuac sia ba gauk padang labik daok siam mekre jang ka urang ngak.

Balai Biên phòng Lai Hòa, Bộ đội Biên phòng tỉnh Sóc Trăng pambuak haong Baha Prêy Chóp, xã Lai Hòa, ban sit Vĩnh Châu  birau peih bruk tamat tal bac akhar saong sap Khmer brei ka dom adei anek saih bangsa Khmer. Hadei di 2 bilan  hu mbaok tame tal bac, taong abih anek saih  thau ndem meyai, thau vak thau bac dom akhar huroh Khmer. Mbang ini, mban peih tal bac hu alin brei 33 paok pandap ka dom adei anek saih bac naih joi.

Bo doi bien phong An Giang pambuak haong Kapul urang kamei Việt Nam tỉnh An Giang saong tỉnh Bạc Liêu, peih bruk jao brei “Baoh sang taphia negar” saong brei jien bac ka anek saih kamei kham merat yam tapa kan kandah bac ta-a naih joi thun bac 2023 – 2024. 50 pok jien bac, yaok pok yaom 1 triệu đồng hu pok brei ka anek saih kamei kham merat yam tapa kan kandah, bac ta-a naih joi. Taduan hu pok jien bac, yau pabak prein khang ka dom adei kham merat bac ta-a, jeng menuac siam ka baoh sang saong ka puk paga. 

Jit ruak sởi di TPHCM daok rah tabiak sraw kadau hu rilo uranaih ruak trak. Yau nan min rilo amaik ame daok iek lap, takik sangka bruk klauk jru pacang caga ruak sởi ka anek bik, kayua sahaneng huac hadei klauk jru mai, anek meda mboh ruak karei; jeng yau thuvi thuvar rilo bruk…Kuhria meng akaok thun tal ini, abih tih ruak tagok baoh dreih sởi dalam rahra saong labik iek ruak di Ban raya HCM lac 597 urang. Sở Y tế TPHCM daok peih bruk klauk jru pabak vaccine sởi ka labaih 517.250 uranaih.

Dom menuac njauk ruak saong matai kayua ung thư di lakei meda tagok khang meng ini tal thun 2050, abih di nyu lac di dom menuac umo meng 65 thun tagok. Dom urang roh duah meng Australia iek tui bruk menuac njauk ruak saong matai kayua 30 janih ruak ung thư di 185 taneh ia saong bhum taneh di thun 2022 piah ba tabiak panuac kuhria mboh dahlau. Tui nan, abih tih urang likei njauk ruak ung thư meda tagok, meng 10 triệu 300 rabau menuac di thun 2022, tagaok 19 triệu di thun 2050, nan lac tagok 84%. Dom menuac matai kayua ung thư meda tagok, meng 5 triệu 400 rabau urang di thun 2022 tagok 10 triệu 500 rabau urang di thun 2050, lac tagok 93%. Urang likei metai kayua ung thư glaong kayua njuk pakao, menyum alak mbia saong taom gaok dom janih ba tal ung thư rilo di labik ngak bruk. 

Urak ini athur raong njom ruak dalah jao tagok rilo, dalam tuk urang dom taneh ia châu Âu daok haduh hatai ka ruak nan di athur raong. Negar Đức  hu 1.885 sruh jit virus ruak dalah jao kuhria meng kaok thun ini. Dalam tuk nan dalam thun 2023, hu 23 sruh jit. Ruak tamuh mbang akok meti di Đức lac harei 12/10/2023. Kuhria meng nan, rilo sruh jit ruak karei jeng mboh tamuh pataom di gah Pei saong bhum kreh negar ini. Ruak dalah jao hu mboh di Hà Lan saong B       ỉ. Ruak  daok ngak jhak tal bruk caik menek, ba tal khat lahik jien padai ralo ngan haong dom baoh sang  raong glang jeng yau ngak kurang pandap mbang ka manuac.

Khuah glai daok rah tabiak khang di gah langiu ban ine Athens, Hy Lạp. Karja daok kham merat pacang cakak mbang khuah glai khang ngak brei 1 urang matai. Dom urang jakar brei thau, langik pandiak saong ngin khang lac makna ba tal glai khuah khang, pambak praong, ngak brei rahra di labaih 30 labik njauk ba nao daok di labik karei. Dalam 24 mon, pui mbang ralai 10.000 ha. Rajaei Hy Lạp hu panuac ieu bruk daong di dom taeh ia dalam EU piah pacang padam khuah glai./.