Dah page harei 18/6, danak dak jalan Vành đai 3 TPHCM saong dua danak dak jalan nduac samar Biên Hòa - Vũng Tàu, jalan nduac samar Khánh Hòa - Buôn Ma Thuột meda hu peih ngak. Danak dak jalan Vành đai 3 nao tapa TPHCM, Bình Dương, Đồng Nai saong Long An, hu buh jien tame ngak tukvak ka 1  atah labaih 76 km, taong abih tih phun jien buh tame jaik 75.400 tỉ đồng. Dalam nan, jalan Vành đai 3 di TPHCM atah labaih 47 km, nao tapa ban Thủ Đức, huyện Bình Chánh, Hóc Môn, Củ Chi, taong abih tih jien buh tame labaih 41.000 tỉ đồng. Danak dak meda daong trun manieng bruk gar jalan, peih tabiak jalan bahrau, jalan ngak kong, pambuak rilo pabah lamnge, trun manieng tukvak nao mai jang yeu phun jien logistics.

Urak ini tỉnh Đồng Nai hu ngak salah bloh bruk ngak thẻ căn cước công dân (CCCD) brei ka jaik 2 triệu 600 rabau urang, dahlau jang 2 bilan tukvak ba tabiak. Dalam nan jaik 2,3 triệu rahra daok dalam tỉnh saong labaih 300.000 rahra meng labik karei mai daok tạm trú. Bruk Đồng Nai ngak salah tanut pabak CCCD dahlau jang 2 bilan brei mboh bruk kham merat di abih gah, bo ba akaok nao dahlau lac công an dom pakat. Đồng Nai lac 1 dalam 19 tỉnh, ban hu akaok mintri Công an pok meyaom ngak salah tanut pabak CCCD dahlau tukvak ba tabiak.

Bruk pablei pa-aok blat  meda, masaiy jien laba glaong, padang taneh, salih quyen pandar taneh dalam bhum mikva bangsa takik di tỉnh Bình Phước jeng daok sarau kadau. Tui Mban bangsa tỉnh, dalam thun 2022, dom baoh sang bangsa takik pablei pa-aok blat meda lac 90 baoh sang, padang taneh ngak lac 21 baoh sang, salih quyen pandar taneh daok lac 95 baoh sang, salih quyen pandar taneh ngak lac 208 sang. Anak bruk ini, kanja palei bhian pathau khan rahra oh padang taneh, oh salih quyen pandar taneh, pablei pa-aok blat meda, njauk caik hatai tal bruk brei masaiy jien laba glaong piah tani tanat raidiuk. Tal tukvak urak ini, bruk padang taneh, pablei pa-aok blat meda mboh takik veik.

Dom urang ruak tangin takai cambuai tui kuhria mboh dahlau, lac daok tgaok saong srau kadau tuk hu mbaok virus ngak brei ruak trak. Anak bruk ini, gah y tế saong pato megru di TP Hồ Chí Minh daok pambuak bruk samar pato pasram dom gru pato ka jalan pacang caga ruak. Bruk ini hu daong ka dom sang bac thau cambaih dom jalan caga ruak saong samar mboh uranaih njauk ruak. Meng akaok thun tal ini, dalam taneh ia hu jaik 9.000 urang njauk ruak tangin takai cambuai, dalam nan hu 3 urang metai. Di TP Hồ Chí Minh, dom urang ruak jeng tagok samar. Kayua yau nan ye, gah y tế jeng hu panuac ieu bhap bini ba gauk  tame pacang caga.

Meng akaok thun tal urak ini, tỉnh Hậu Giang hu labaih 360 urang ruak pandiak tabiak darah, tagok jang 7 mbang mateh dut saong tukvak ini thun blaoh. Jit ruak pandiak tabiak darah rahtabiak di taong abih dom palei dalam tỉnh, dalam nan ban Vị Thanh saong dom huyện Châu Thành, Châu Thành A hu dom urang ruak glaong. Tui kuhria bruk jit ruak pandiak tabiak darah di Hậu Giang daok rahtabiak sarau kadhau dalam tukvak anak tal, tuk tame bilan hajan, lac tukvak lagaih ka jamaok tamuh tabiak mayah oh hu jalan pacang caga jit ruak hu siam lagaih. Kayua yau nan ye, gah y tế meda pasang iek biak catang bruk njom mbak jit ruak, pasang iek biak catang dom sruh jit, oh caik ka jit ruak tamuh tabiak, pambak praong.

Hadei di bruk tableik gilai di langiu tasik Hy Lạp ngak brei 79 urang metai, UB châu Âu ndom lac, brei duah tabiak jalan langyah tal gha bruk urang “di cư” nao tapa Địa Trung Hải. UB châu Âu jeng ndom lac, jabat ini meda duah dom jalan ngak piah daong dom taneh ia thành viên, jeng yau padang jalan hukum haong gauk piah pacang cakak menuac urang di cư rilo. Dom urang pablei salih menuac di bhum Địa Trung Hải bhian pandar dak harei dak rilo dom sruh gilai praong piah tame bhum tasik pakat dunya di langiu tasik Hy Lạp piah plaih bruk pasang iek di gah khik caga takai tasik di taneh ia ini.

Rajaei Đức meda parabha labaih 1 tỷ Euro piah daong langyah dom mbang sarau kadau di urang tị nạn di Sirya. Akaok Mintri cak rok patagok Đức ndom lac, biak suan ba tal metai manuac meyah châu Âu var nao bruk sarau kadau urang di cư Sirya. Langiu di bruk daong gah kadung jien kanja, Đức jeng meda daong  dom jalan ngak piah langyah dom bruk urang di cư di Thổ Nhĩ Kỳ, Lebanon (Li-băng) saong Jordan, dom taneh ia urak ini daok taduan 5,6 triệu urang Sirya.

Ứng dụng video katut panak TikTok di tập đoàn Trung Quốc ByteDance brei thau, urang meda buh tabiak yaok tỷ USD tame Đông Nam Á dalam dom thun anak tal. Tui kênh CNBC, Đông Nam Á lac bhum hu 630 triệu menuac, dalam nan hu labaih meteh lac dom urang umo ala 30 thun. Ini lac sa dalam dom darak pasar praong abih di TikTok ka dom menuac pandar. TikTok oh khan brei thau cambaih laih ka jalan buh jien ngak, min brei thau lac urang meda buh jien tame ka bruk pato pakai, yaih khan saong daong dom labik pabak sit caong khin hu mbaok tame nền tảng pablei salih điện tử TikTok Shop./.