Di mbang nyaom ka 10, HĐND TP.HCM khóa X, UBND TP.HCM hu pok harak pathau khan ka jalan buh jien tame danak dak ngak pasiam veik jabat HĐND saong UBND TP.HCM di labik 86 jalan Lê Thánh Tôn, Quận 1. Phun jien piah ngak pasiam veik tui kuhria lac labaih 189 tỷ đồng meng phun jien mek tame di Ban raya, peih ngak dalam tukvak 2023 - 2025.  Asal kadha hu ngak pasiam lac  rami ramik ngak pasiam veik sang A, pabak pandap panda dalam dom bilik ngak bruk. Di sang B meda ngak pasiam veik dom danak dak anak mata, mblang jalan nao dalam labik. Jabat HĐND saong UBND TP.HCM hu padang ngak meng di thun 1889, hu ngak salah di thun 1909.

Labaih 6 bilan tapa, bruk du lịch dalam bhum gah timur bhum ĐBSCL hu rilo hadah hadai. Dom tỉnh hu pataom tame peih ngak rilo jalan ngak, kham merat peih dom bruk yaih khan, pambuak gauk ngak bruk… gam haong nan, peih ngak danak dak pambuak gauk pambak tame prein khang di yaok tinh, yaok puk palei. Abih tih dom tuai hu labaih 6.350.000 mbang, rilo jang jaik 152% duk haong tukvak ini thun bloh. Tapa nan, Hiệp hội Du lịch ĐBSCL hu jao 2 harak brei angan lac labik ravang me-in hu angan di bhum ĐBSCL brei ka tỉnh Trà Vinh, lac Inem mek Ao Bà Om saong labik du lịch sinh thái Huỳnh Kha.

Tal tukvak  ini, dalam tuk peih ngak danak dak pataom mek taneh, biyar jien daong ba, tái định cư (TĐC) mblang kapar haok dunya Long Thành, hu labaih 4 ribau baoh sang di danak dak hu ginup kadha piah hu TĐC. Piah peih ngak danak dak Mblang kapar haok Long Thành, Đồng Nai njauk peih bruk pataom mek mblang taneh praong labaih 5 ribau ha, dalam nan hu jaik 3 ribau ha taneh hu quyen pandar di baoh sang, manuac urang, rahra. Abih tih dom baoh sang hu TĐC tuk peih ngak danak dak lac labaih 5,5 ribau. Dom jabat chức năng di Long Thành daok peih bruk pasang iek, taoh talaih dom tavak tavaiy dalam bruk pasang iek brei TĐC ka dom baoh sang daok gilac veik di danak dak.

UBND tỉnh Cà Mau bahrau tabiak jalan ngak Danak dak negar cakrok bruk raong pala kaya ikan vaktu 2021 – 2030 di dalam tỉnh. Tui nan, Cà Mau meda ba pandar siam lagaih prein khang di drei piah patagok bruk raong pala kaya ikan hu kein laba, khang kajap, lagaih haong bruk di tỉnh. Kham merat tal thun 2025, abih tih kaya ikan raong pala hu 470.000 tấn; tal thun 2030 abih tih hu 570.000 tấn. Tỉnh Cà Mau jeng daok pamaong tal bruk lac tal thun 2030 meda pabak hu labaih 75% hadang pajaih, 100% aring pajaih siam, khik kajap chất lượng…

Di labik pataok gilai ikan di rạch pak di ban sit Vàm Láng, huyện Gò Công Đông, tỉnh Tiền Giang bahrau rah tabiak bala apui mbang khuah gilai. Kayua mbang khuah gilai ikan rah tabiak tuk binek ini daok thu ia nan ye bruk padam khuah di pak ini di rahra gaok kan kandah, tuk kapul urang padam khuah mai tal labik rah tabiak bala ye apui mbang ngak khut tal 8 sruh gilai ikan. Urak ini, dom jabat chức năng puk palei daok ngak cambaih laih makna di mbang apui khuah saong yaok pataom dom khat lahik meng bala nan. Jaik di ini, kayua ka oh lagaih piah tabiak tasik nan ye hu yaok piluh sruh gilai ikan daok pataok jaik gauk. Kayua yau nan ye, mayah rah tabiak bala apui khuah meda ba tal khuah pambak tapa saong khat lahik biak praong.

Hãng tin NHK di Japon bahrau brei thau bruk duah thau hatai sahneng di bhap bini brei ka Rajaei di Thủ tướng Fumio Kishida, trun 5 điểm, daok 38%, dom menuac oh njauk hatai tagok 4 điểm, jeng 41%. Ini lac bilan ka 2 gam gam bruk pachreih tui Rajaei Japon trun. Bruk duah thau hatai sahneng di bhap bini brei ka Rajaei Japon hu peih ngak yaok bilan. Mbang ini, bruk duah thau hu peih ngak tapa ieu phone meng harei 7 - 9/7 haong labaih 2 rabau 400 urang umo meng 18 thun tagok oh hu pilih ruah  dahlau. Tapa nan, hu 33% dom menuac hu tangi sua ndom lac bruk ngak di Rajaei lac lagaih, 49% lac oh, dalam tuk 18% oh javap jalei.

Ấn Độ daok tame bilan hajan khang abih ka oh bhian mboh dalam rilo piluh thun tapa di grauk dom labik di dalam taneh ia. Di dom labik di gah barak negar Ấn Độ, hajan khang, dui atah dalam 3 harei tapa ngak ka bruk glut jaleih taneh saong hajan ia sua, ngak brei 20 urang metai. Anak bruk ini, Thủ tướng Ấn Độ hu peih nyaom biai samar drah ngan haong dom akaok Mintri saong urang ngak praong di rajaei piah taong yaom ka bruk hajan dui atah. Tui Cục kuhria mboh dahlau bruk langik tasik di Ấn Độ, kayua gaok hangin tui bilan, bhum gah barak negar ini meda daok hu hajan khang dalam dom harei anak tal. 

Thun 2022 lac thun pandiak khang abih dalam sajarah yaok pataom bruk langik tasik di Thụy Sĩ hu peih tabiak meng thun 1864, haong dom băng ia patau di talei ceik Alps ralai sraiy samar jang 3 mbang tanut hu maong lac oh siam dahlau daih. Dalam pathau khan rah tapa ka bruk langik tasik dalam thun, Mintri Môi trường, Giao thông, Năng lượng & Truyền thông Thụy Sĩ brei thau  nhiệt độ kuhria rah tapa yaok thun di Thụy Sĩ lac 5,8 độ C, ye dalam thun 2022 nyu tagok jang 7,4 độ C. Dalam dom bilan Hè, langik pandiak labaih 36 độ C di gah Brak saong gah Meraong talei ceik Alps. Ia di dom danao jeng biar di abih kuhria meng kan mai, ngak ka sang mac thủy điện njauk padeih ngak di dom labik./.