Tỉnh Bà Rịa – Vũng Tàu bahrau peih bruk biyar jien bồi thường, daong ba saong tái định cư danak dak thành phần 3, di danak dak padang ngak jalan cao tốc Biên Hoà – Vũng Tàu tukvak 1 ka dom baoh sang, kapul nyaom hu taneh njauk pataom mek. Dalam mbang ini, 19 sang hu  biyar jien lac daok di xã Tóc Tiên, hu bayar jaik 70 tỷ đồng. Peih ngak danak dak jalan cao tốc Biên Hoà-Vũng Tàu, labik nao tapa xã Tóc Tiên atah labaih 8km, mblang taneh pataom mek jaik 59ha. Dalam nan, hu 428 baoh sang, manuac urang pandar taneh njauk pataom mek.

Kayua takik hu labik blei pandap, nan ye dalam thun ini Cty TNHH PouYuen Việt Nam (daok di Q. Bình Tân – TPHCM) oh daok mbaoh tangin pambuak bruk ngak haong 3.000 urang ngak hu harak pambuak bruk ngak meng 1-3 thun. Dom urang ngak nan, oh nao tal Cty ngak bruk min daok hu bayar jien bilan mbiah tal tuk taduan hu sarak. Tui Công đoàn Cty Pou Yuen, dom urang brei padeih nan, lac dom urang daok padeih cang bruk, salih gauk padeih suai lavik kayua 1 hãng takhaok padeih đơn hàng meng thun blaoh. Urak ini, Sở LĐTBXH pambuak bruk haong LĐLĐ TP saong dom gah pambuak tal, hu tacei pato bruk peih ngak sarak ka urang ngak daok ngak bruk di Cty TNHH Pou Yuen tui njauk adat hukum.

 Urak ini, urang nong di Vĩnh Long daok tame bilan paik baoh kruac cam sành praong abih. Min kayua yaom kruac trun bier, meng 2.000 - 3.000 đồng/kg nan ye urang pala khat trak. Piah trun manieng dom kan kandah ka urang nong, Sở Công Thương Vĩnh Long hu pambuak haong dom kapul dalam bhum ĐBSCL, TP. HCM saong Hà Nội piah daong ka urang nong duah jalan pablei tabiak kruac daok biak rilo. Min bruk pataom blei ini jeng njauk blei di bein kruac dalam HTX. Dom baoh sang pala sit sot jeng daok pablei ka dom urang blei haong yaom biak bier, gaok mai oh hu urang halei mai blei, nan ye caong hu bruk daong di karja palei.

Peih ngak danak dak "Salih janih phun pala, athur raong bhum gah brak roya 1 tỉnh Tiền Giang" tukvak 2021-2025, dalam thun ini, Tiền Giang daok salih jaik 4.900ha taneh padai takik kein laba di bhum gah brak roya 1 tapa dom bruk ngak mbang lagaih haong biến đổi khí hậu, paglaong jien mek tame ka urang ngak nong. Bruk ngak nan piah salih janih phun pala, athur raong tui jalan pataom veik, salamat saong khang kajap, pandar ilamu công nghệ piah mek hu năng suất, chất lượng pandap saong kein laba glaong.

Thun ini, bruk njom ia mbak di ĐBSCL rahtabiak aval jang  rilo thun dahlau. Dom tinh, ban hu tagok jalan ngak pacang caga dahlau meng aval. Di Long An, rilo bhum palei gah maraong di tỉnh hu samar caga mek dahlau ia taba piah khik piah. Tal urak ini, ia di dom binek praong saong ia dalam hamu jeng daok rilo, tani tanat hu bruk yuak  padai Đông Xuân hu siam lagaih. Min, rilo mblang taneh pala phun kayau di huyện Thủ Thừa, Bến Lức jeng daok caong hu ia piah pruh dalam bilan thu. Kayua yau nan ye, gah ngak nong kakei veik rahra njauk caga dahlau bruk piah piah ia dalam danao, kraong ribaong. Tỉnh Bến Tre jeng daok pasang iek yaok harei dom binek pacang ia mbak, samar drah pasiam veik khut khat. Khik kajap bruk pacang ia mbak, khik ia taba brei ka bruk pala phun pajaih saong bingu kiểng.   

Hãng tin Reuters ba panuac di bol bala Hàn Quốc brei thau, Triều Tiên cuh sa tên lửa đạn đạo langiu tasik gah timur negar ini. Bruk cuh nan rah tabiak dua harei hadei di tuk Triều Tiên cuh sa tên lửa đạn đạo xuyên lục địa tabiak langiu bhum tasik gah pai negar Japon. Ini lac bruk cuh iek praong ka 3 di Triều Tiên dalam thun ini. Dahlau di nan, Triều Tiên ndom lac meda ngak khang, ngak gam gam oh ka bhian mboh meyah Hàn Quốc saong Mỹ peih bruk pasram mesruh haong gauk, saong daok ndom lac dua taneh ia ini daok ngak brei catang tagok bruk dalam bhum.

Jabat khik iek bala Thổ Nhĩ Kỳ (AFAD) hu mboh 6.040 mbang megei sit dalam 2 adit tapa kuhria meng mbang megei baoh taneh biak trak damak rahtabiak di harei 6/2 meng blaoh. Kuhria tal maong 8 melam  19/2, dom urang metai dalam bala magei baoh taneh khang 7,8 di Thổ Nhĩ Kỳ saong Syria tagok tal labaih 46.000 urang. Dom urang metai di Thổ Nhĩ Kỳ lac 40.689 urang saong paka ini tui kuhria meda daok tagok tuk labaih 345.000 sang chung cư di Thổ Nhĩ Kỳ tayah abih, 105.000 baoh sang  jaleih, njauk yah klaak atau njauk khut khat trak, rilo urang jeng daok lahik.

Urang dang akaok Jabat Năng lượng Dunya (IEA) ong Pha-tih Bi-rôn (Fatih Birol) brei thau dahlau ka bruk kurang năng lượng meda rah tabiak di bilan la-an tal di châu Âu. Thun ini meda hu rilo jang 23 tỷ mét khối khí đốt hu ba tabiak darak pasar negar langiu. Dom khí đốt ini oh pabak ginup bruk pandar di dom taneh ia di dunya. Trung Quốc meda pandar abih 80% dom khí đốt ni. Kayua yau nan ye, bilan la-an jaik tal di châu Âu meda lac oh mbuan. Nan ye dom sang saong doanh nghiệp brei kham merat patrun patakik bruk pandar  khí đốt./.