Jaik abih dom puk palei hu peih bruk khik ramik sap ndem, panuac puac, akhan vak, adat cambat, tanarakun di bhap bini bangsa takik brei tapa dom sarak  kayua Rajaei ba tabiak. Bruk padang ngak he thong muyim piah khik ramik, urak ini hu 3 muyim pakat Trung ương peih ngak piah duah pataom, yaok kuhria saong parang iek  ilamo di dom bangsa. Hu 407 danak dak duah pataom, khik ramik saong patagok ilamu phi vat the di bhum urang bangsa takik; 145 drap ar ilamo  phi vat the di bangsa takik hu ba tame angan drap ar ilamo phi vat the pakat negar; 559 urang bangsa takik hu pok brei angan lac nghe nhan.

Urang dang akaok tỉnh Hậu Giang bahrau pasang iek saong ngak bruk haong dom gah pambuak tal ka bruk peih ngak danak dak binah 3 di dalam Danak dak padang ngak jalan nduac samar Châu Đốc - Cần Thơ- Sóc Trăng, mbang ka 1. Di mbang ngak bruk, Bí thư Tỉnh ủy Hậu Giang Nghiêm Xuân Thành caong lac, dalam tuk padang ngak, meyah hu hagait tavak tavaiy ye khan brei po đầu tư thau tapak, khan tagok akaok UBND tỉnh piah hu lang talaih. Ini lac danak dak ngak jeng labik cakrok bahrau ka Hậu Giang, pambuak dom tỉnh bhum ĐBSCL, lac danak dak praong di taneh ia nan ye ieu nhà thầu, puk palei pataom tame ngak njauk tui tukvak ba tabiak gah phun jien saong njauk tui tacei pato di Thủ tướng Rajaei.

Danak dak Dam dara halan hatian hè tỉnh Kiên Giang thun 2024 hu peih ngak dom bruk yau: Jak ba padang ngak birau takik abih 15 baoh sang anit ranam ka urang đoàn, duah bruk ngak ka takik abih lac 8.000 dam dara. Pho Akok UB bhap bini tỉnh Kiên Giang Nguyễn Lưu Trung ndom lac, Danak dak Dam dara halan hatian hu rik tame langyah dom bruk tui caong khin di dom puk palei ka dom bruk yau: padang ngak palei pala birau, do thi hadah hadai, patagok kinh te, ilamo, xa hoi, bruk an sinh XH…hu pakat uy, karja dom pakat taong yaom glong, bhap bini njauk hatai pachreih tui.

Jalan Hoàng Văn Bổn pambuak TP Biên Hòa, tỉnh Đồng Nai haong huyện Bắc Tân Uyên, tỉnh Bình Dương atah jaik 3km daok khut khang, mbaok jalan mbaih mbaoh, glut jaleih ngak ka dom radaih nao mai biak kan kandah, mbuan ba tal bala. Karja palei rilo mbang pok panuac tagok pakat angaok, min tal urak ini, jalan ini jeng oh ka hu ramik ngak pasiam veik. Tui Sở Jalan mbak pajeng ba tỉnh Đồng Nai, jhung bilan 1 meng blaoh, po đầu tư jalan ini lac Cty Sonadezi Châu Đức hu peih bruk bal jalan ini, min tal harei ini, jalan jeng daok khut, daok mbaih mbaoh

Jaik tal bilan hajan rabuk, yaok pluh baoh sang bhap bini di khu pho Ninh Chữ 1, ban sit Khánh Hải, huyện Ninh Hải, tỉnh Ninh Thuận daok haduh hatai kayua riyak tasik paoh tame dak harei dak trak, sang danaok mbuan glut jaleih tuk halei jeng oh thau hu. Ong Dương Bửu Viên, Akok UBND ban sit  Khánh Hải, huyện Ninh Hải lac, anak meta piah khik brei salamat saong khik drap ar ka mikva, karja jak ba dom baoh sang daok tapen tasik duah labik daok hu salamat, padang talaoh brei thau labik mbuan hu bala ka bhap bini thau. Tui nan, pambuak  bruk haong Chi cục Thủy lợi brei peih ngak samar ar pacang tapen tasik di khu phố Ninh Chữ 1.

Tổng thống Indonesia Joko Widodo brei thau, tok hu radaih điện meng hu adat brei peih nduac di ban ine bahrau Nusantara. Gam haong nan jeng brei thau lac, tanut chất lượng không khí di ban ine bahrau meda samu 0 tapa bruk pacap brei pandar radaih điện. Rajaei Indonesia daok kham merat padang labik caga taduan raok mbang camereip 12.000 urang jakar mai daok di bilan 9 ini. Tổng thống Jokowi jeng brei thau lac bruk pahadar Harei negar thun ini hu peih tabiak ngak di ban ine bahrau. 

Labaih 100 urang metai hadei tuk menuac di Kol bán quân sự  Gah daong samar (RSF) taong tame sa  palei di gah bhum kreh negar Sudan. Tui LHQ, kuhria meng tuk patuh tabiak bruk mesruh gauk di kreh bilan 4 thun 2023, labaih 16.000 urang Sudan  metai, 9 trieu urang brei panduan ba nao labik karei, ba tal bruk sraw kadau trak gah ngak pahala. Thun blaoh, Mỹ saong Saudi Arabia kham merat peih dom mbang ginum biai di Bol lin Sudan saong Gah Daong samar bán quân sự. Yau nan min, oh ka njauk gauk piah  padeih mesruh gauk.

Harei pataom bingu hồng Bulgaria daok rah tabiak di 2 ban sit lac Karlovo saong Kazanlak, dui pachreih hu yaok rabau tuai mai hu mbaok. Bruk nan hu peih akaok di tuk mesup haong adat paik dom baoh bingu hồng piah ngak talei bingu harei pataom meng kan. Hadei di nan, lac bruk diễu hành – labik dom urang kamei ngui cuk khan ao meng kan pan yot caik bingu hồng manei ka tuai du lịch di tapen jalan. Thun ini, meda hu labaih 6.000 menuac hu mbaok tame adat raok. Dom tuai rilo abih lac mai meng Trung Quốc, Hàn Quốc, Mỹ saong Việt Nam./.