Tapa pasang iek bruk ngak mbang kinh tế, xa hoi 53 bangsa takik hu mboh, Danak dak pakat negar  1719 ngak hu jak jeng sumu bruk ba tabiak, tal abih thun 2025 brei daong labaih 18.300 baoh sang ngak bruk palei salih di sang. Hadei di jaik 4 thun peih ngak, rilo baoh sang urang bangsa takik di dom labik kan kandah saong bhum ceik, khin hu sang daok samar, hu brei mesre phun jien piah padang ngak birau, atau ramik pasiam veik sang daok khang kajap, sang kajap thun takik di nyu 20 thun. Bruk xa hoi ba gauk rik daong tame ngak brei lahik sang taik tahak, sang hluh ia thaik ka urang kathaot meng dom Danak dak  pakat negar hu daong yaok ribau  bhum urang bangsa takik saong bhum ceik paglong raidiuk.

Ong Đổng Văn Nhường, urang jakar Miuyim tỉnh Ninh Thuận brei thau, tuai mai ravang me-in Bimaong Pô Rômê saong Bimaong Pô Klong Garai oh lac hu maong iek bruk padang ngak meng kan bo daok hu ba drei tame ilamu Cam tapa dom adat cambat, tanarakun meng kan, hu maong iek danak dak daoh tamia gheih mekre. Abih di nyu nan lac, tuai hu pang langyah brei thau meng sap Việt saong sap Anh piah thau cambaih jang ka sajarah, bruk gheih mekre di ilamu urang Cam. Meng hu rilo labik piah nao tal saong bruk ngak dak harei dak siam mekre jang, dalam 7 bilan di thun ini, tỉnh Ninh Thuận hu taduan raok labaih 2 trieu 620 rabau mbang tuai, tagok jang 20% duk haong tukvak ini thun blaoh, dalam nan hu 63.000 mbang tuai dunya, jien mek tame meng bruk du lịch hu jaik 3.000 tỷ đồng.

Hadei di 10 thun peih ngak Chỉ thị 40-CT/TW, harei 22/11/2014 di Ban Bí thư “ Pakhang bruk pan akaok ba jalan di Đảng ngan haong bruk brei mesre jien meng gilang pariak sarak karja”, yaok rituh ribau baoh sang kathaot di tỉnh Gia Lai hu daong phun jien yam tapa kan kandah. Mbiah tal ini, gilang pariak sarak karja hu peih ngak di taong abih dom xã bhum atah bayah, bhum ceik, bhum urang bangsa takik di tỉnh Gia Lai. Kuhria taong abih jien brei mesre jaik 16.500 tỷ đồng, ngan haong labaih 500 ribau mbang baoh sang kathaot, jaik kathaot saong dom urang dalam sarak karja hu mesre phun jien, dalam nan hu urang bangsa takik meblah jiak meteh. Meng hu yau nan, baoh saong kathaot  di tỉnh Gia Lai hu trun,  meng labaih 23% thun 2014  trun daok labaih 8% yau urak ini.

Kapul dam dara Cục Canh sat jalan mbak gah Meraong bahrau caik pagam saong jao brei 25 baoh gom truac hadah jalan palei di xã Tà Hine, huyện Đức Trọng, tỉnh Lâm Đồng. Gam haong nan, brei labaih 100 pok pandap, yaom abih tih labaih 10 triệu đồng brei ka dom anek saih sang kan kandah tuk jaik tame thun bac bahrau. Mban peih bruk jeng hu alin hadiah 20 pok jien bac yaom abih tih 10 triệu đồng brei ka 20 anek saih kan kathaot bac ta-a naih joi,. Brei 1 pok jien bac yaom 3 triệu đồng ka 1 anek saih bac naih joi min sang biak kan kandah

Harei kabroi, Kapol Chữ thập đỏ TP. Bảo Lộc, tỉnh Lâm Đồng pambuak haong nyaom urang ngak hala Thiện Duyên Bảo Lộc peih bruk nao rivang, alin 150 paok pandap ka urang kan kandah di dom xã Lộc Lâm, B’Lá, Lộc Bảo, Lộc Ngãi saong Lộc Nam, di huyện Bảo Lâm. Yaok paok pandap, hu brah, mì tôm saong dom pandap pandar yaok harei, yaom 500 ribau đồng, hu dom urang ngak pahalak alin brei tal tangin  dom urang sang kathaot, jaik kathaot, urang mbuan gaok kan kandah saong mikva urang bangsa takik kan kandah. Kuhria abih tih  jien blei pandap mbang ini lac 75 trieu dong.

Dom urang ilamu Trung Quốc bahrau duah mboh sa jalan ngak tabiak ia meng haluk Ia Bulan bahrau di abih. Tui dom bruk roh duah, kapul roh duah hu ba tabiak jalan meda ngak hu ka bruk ngak tabiak saong ba pandar pak di labik kaya ia di Ia bulan. Dom urang ilamu mboh lac, jalan ngak ini meda pabak dom jalan praong ka bruk padang ngak dom bilai roh duah ilamu saong bilai vũ trụ Ia bulan di harei hadei. Bruk duah thau cambaih jang tui kuhria hu ngak salah dalam mbang cuh tagok langik anak tal di “sứ mệnh Hằng Nga”.

Mentri Ngak  nong, ngak glai saong Ngak ikan Campuchia birau brei panuac iew bhap bini juai palao kara tame dom labik rivnag ma-in, labik baha saong dom labik công cộng karei piah pacang caga bala saong mbuan pambak ruak. Cục Khik iek glai Campuchia di mentri angaok nan hu peih dua jalan talei phone iew drah samar piah taduan khaw tin saong langyah dom bruk kayua kara palao tabiak gah langiu. Jabat nan brei daong mek pataom dom drei kara sahanak atau mbuan pambak ruak tabiak bhap bini. Ralo drei kara chap hu  blaoh brei palao tame glai piah parilo drei kara glai.

Meng malam blaoh tal dah pagaiy ini, hajan praong di abih kuhria meng kan mai nyu tuh trun jaik abih dom labik dalam bhum Tokai - Nhật Bản, abih di nyu lac di tinh Shizuoka, haong ia hajan dalam 24 mon tapa tagok tal labaih 300mm. Di dah pagaiy harei ini, yaok rabau sang di tỉnh ini hu panduan ba nao labik karei dalam samar drah piah khik siam mekre salamat anak bruk mbuan hu jaleih taneh. Di ban Ichinomiya, tỉnh Aichi, tuk dah pagaiy ini, ia hajan jeng biak praong, lac 63 mm dalam sa tuk. Tui kuhria mboh dahlau di Gah Khí tượng Nhật Bản, dom labik dalam bhum Tokai daok hu hajan di rilo labik praong saong dui atah tal harei paguh.