Danak dak peih praong jalan roya 13 hu abih tih yaom jien buh tame lac 1.367 tỷ đồng, tui kuhria hu peih tabiak ngak di harei 26/4 saong daok hu ngak tui jalan BOT, yaom jien peih mbaok taneh kayua gilang pariak sarak kanja tỉnh Bình Dương biyar. Tukvak 1 di danak dak meda peih praong jalan roya 13 meng labik jaik taphia Ban raya Hồ Chí Minh tal jalan Lê Hồng Phong (ban Thuận An- jaik taphia haong ban Thủ Dầu Một) atah 12,7km.

Dom harei jiak di ni, dom sang iek ruak di Đồng Nai hu taduan song iek ruak ka rilo uranaih njauk pandiak tabiak drah . Makna kayua amaik ame meluh ruak  pandiak tabiak drah song COVID-19. Kayua yau nan ye, bác sĩ hu panuac kakei, tuk mboh uranaih pandiak glong gam gam, dui atah  meng  5-7 harei gam tui pandik rup, tagok boh ia ye ba uranaih tal dom labik  y tế piah hu pasang iek tong ruak,  jhui eng drei tui iek song tame jru di sang.

  Tal tukvak ini, tỉnh Kiên Giang palao raong hadang ia meteh taba meteh mbak hu labaih 127.000 ha, lac labaih 90% bruk ba tabiak, sản lượng mek hu tal urak ini lac labaih 20.500 tấn. Dalam tukvak anak tal Kiên Giang daok brei salih taneh ngak padai takik kein laba tapa cak rok patagok dom bruk ngak yau ye: raong hadang pablak haong ngak padai, raong hadang takei hijao pablak haong raong hadang sú saong hadang pagam saong harieng tasik.

Doanh nghiệp du lịch di ban raya HCM hu peih pablei tour trực thăng mong iek ban meng mangaok glong meng di harei  29/4 ngan song yaom jien 4 triệu đồng ka yaok tuai. Ni lac, pandap camereip dalam dom pandap bahrau, biak gheih bo gah  du lịch ban raya dok patagok piah dui pachreih tuai ravang me-in, caga raok tuai  dunya tuk peih veik pabah mbang du lịch  song pamong tal bruk patagok  ban raya HCM jeng sa ban du lịch chreih  chrai dang akaok châu Á.

Tukvak lễ 30-4 saong harei 1-5 thun ini, urang ngak hu padieh 4 harei, ini lac tuk piah ka rilo baoh sang nao du lịch. Bhum ĐBSCL hu rilo tuai damuai pilih ruah saong mboh lac jaik abih vé dom tour, yaom lac daok sa adit tra meng tal harei padieh lễ. Tui gah du lịch dom tỉnh ĐBSCL, tui kuhria tukvak padieh lễ ini dom tinh ban meda raok yaok pluh ribau mbang tuai yaok harei mai main, rivang iek, padieh padai.

Gilang pariak Negar Israel meda brei pabak jien  nhân dân tệ di  Trung Quốc tame khik piah , saong cakak trun bruk khik meng jien đô la Mỹ song jien euro. Ni lac bruk piah hu rilo jalan parabha bruk khik piah saong dui atah tuk vak buh jien tame ngak mbang. Tui kadung jien dunya, tỷ trọng di jien đô la Mỹ dalam tong abih tih jien khik piah dunya daok trun tanut bier di abih dalam labaih 20 thun, ngak patagok panuac ndom ka bruk patagok di jien nhân dân tệ Trung Quốc.

Trung Quốc brei thau, hộp đen di sruh kapar haoh Boeing 737-800  laik di bilan 3 meng blaoh ngak ka taong abih 132 urang angaok sruh kapar haoh metai njauk khut trak, meda lac oh ka duah mboh makna halei ba tal bala nan. Sa bruk bahrau duah mboh hu makna praong lac, jaik abih dom candaih pacah jeng pataom di sa labik. Dom urang langyah salamat brei thau, bruk ini bhian oh rahtabiak dalam bala pacah atau patuh di angaok langik, min oh klaak tapa dom bruk lac dom labik dalam sruh kapar njauk tahak tabiak dalam tuk kapal haoh laik.        

Kayua hu bruk pambak tal pren yava, rilo urang njauk mbang taba, bruk ni ngak ka pandap mbang di urang oh dok bingi tra. Thau hu bruk ni, dom urang roh duah di Japon hu patagok janih gaiy duh dong ngak ka pandap mbang jeng mbak carak tagok song nyu pahe jang, tapa nan, nyu ngak ka urang mbang mboh bingi cambuai. Dom urang roh duah cong lac, gu gaiy duh ni meda  dong ka urang pandar khik hu rai duik siam mekre bo dok khik hu pahe bingi ka var mbang./.

Urang lang: Thu Thao & H.Pha -23/4/2022